អាមេរិកព្រមានថា របប អាសាដនឹងប្រឈមបញ្ហាធំ បើហ៊ានប្រើប្រាស់អាវុធគីមីជាថ្មីទៀត

អន្តរជាតិ

អាមេរិកព្រមានថា របប អាសាដនឹងប្រឈមបញ្ហាធំ បើហ៊ានប្រើប្រាស់អាវុធគីមីជាថ្មីទៀត

27, Jun 2017 , 9:39 pm

រូបភាព

ដោយ: ថ្មីៗ

ក្រុងវ៉ាស៊ីនតោនបានព្រមានថា រដ្ឋាភិបាលស៊ីរីនឹងប្រឈមបញ្ហាធំ បើសិនជារបបនេះហ៊ានប្រើប្រាស់អាវុធគីមីជាថ្មីទៀតប្រឆាំងជនស៊ីវិលនោះ។ អាមេរិកអះអាងថា ស៊ីរីពិតមានគម្រោងនិងកំពុងរៀបចំប្រើប្រាស់អាវុធគីមីជាថ្មីទៀត ដូចដែលរបបនេះធ្លាប់ធ្វើនៅថ្ងៃ ៤ ខែមេសាកន្លងមកដែរ។

ថ្ងៃចន្ទទី ២៦ មិថុនា សេតវិមានបានចេញមុខចោទប្រកាន់ថា រដ្ឋាភិបាលស៊ីរីនិងកងទ័ពខ្លួនកំពុងត្រៀមលក្ខណៈប្រើប្រាស់អាវុធគីមីជាថ្មីទៀតដើម្បីកម្ចាត់អ្នកប្រឆាំងខ្លួន។ អាមេរិកបានព្រមានផងដែរថា រដ្ឋាភិបាលស៊ីរីនឹងប្រឈមបញ្ហាធំជាក់ជាមិនខាន។

យោងតាមទីភ្នាក់ងារព័ត៌មាន Reuters អ្នកនាំពាក្យសេតវិមាន Sean Spicer បញ្ជាក់ថា៖« សហរដ្ឋអាមេរិកបានរកឃើញថា របបដឹកនាំ បាសា អាល់អាសាដ រៀបចំការវាយប្រហារដោយប្រើប្រាស់អាវុធគីមីជាថ្មីទៀតដែលអាចបណ្តាលឲ្យមានមនុស្សស្លាប់ច្រើនសន្ធឹករួមទាំងកុមារតូចៗផងដែរ»។

លោក Spicer សង្កត់ធ្ងន់ថា៖ «បើសិនជាមានការប្រើប្រាស់អាវុធគីមីម្តងទៀតដែលសម្លាប់រង្គាលជនស៊ីវិល អាសាដ និងកងទ័ពរបស់គេនឹងត្រូវប្រឈមបញ្ហាធំជាក់ជាមិនខាន»។

បើតាមការចោទប្រកាន់របស់សេតវិមានអាមេរិក ស៊ីរីកំពុងរៀបចំការវាយប្រហារដោយអាវុធគីមីដូចកាលពីថ្ងៃ ៤ មេសាកន្លងដែរ។ នៅថ្ងៃ ៤មេសា រដ្ឋាភិបាលស៊ីរីរងការចោទប្រកាន់មួយពាក់ព័ន្ធការប្រើប្រាស់អាវុធគីមីនៅក្រុង Khan Sheikhoun ដែលបណ្តាលឲ្យមនុស្សយ៉ាងហោចណាស់ ៧០នាក់ស្លាប់បាត់បង់ជីវិតនោះ។ ប៉ុន្តែស៊ីរីបានបដិសេធការចោទប្រកាន់នេះ។ ឆ្លើយតបការវាយប្រហារដោយអាវុធគីមីនេះ ប្រធានាធិបតី ដូណាល់ ត្រាំ បានបញ្ជាឲ្យកងទ័ពអាមេរិកបាញ់ផ្លោងមីស៊ីលជិត៦០គ្រាប់ចូលមូលដ្ឋានទ័ពអាកាស Shayrat

ត្រឡប់មកវិញ បើទោះជាមានការចោទប្រកាន់បែបនេះក៏ដោយ សហរដ្ឋអាមេរិកមិនបានបកស្រាយឲ្យបានច្បាស់លាស់ឡើយពាក់ព័ន្ធបញ្ហានេះឡើយ។ អ្វីដែលគួរឲ្យកត់សម្គាល់នោះ សេតវិមានក៏មិនឆ្លើយតបចំពោះការស្នើសុំមតិយោបលបន្ថែមពាក់ព័ន្ធព័ត៌មានលម្អិតឬរបាយការណ៍ចារកម្មដែលអាមេរិកទទួលបានមុនចោទប្រកាន់រដ្ឋាភិបាលស៊ីរីបែបនេះដែរ។

មន្ត្រីចារកម្មអាមេរិកម្នាក់ដែលធ្វើការងារជាមួយមន្ត្រីចារកម្មសម្ព័ន្ធមិត្តអាមេរិកដែលមិនបានបញ្ចេញអត្តសញ្ញាបង្ហើបថា គេពិតជាកំណត់បានសញ្ញាមិនប្រក្រតីមួយចំនួនដែលគេសង្ស័យថា អាសាដ ពិតជាលួចការលាក់ទុកអាវុធគីមីថ្មីទុកផង។ ដូច្នេះហើយទើបបានជា សេតវិមានអាមេរិកព្រមានរបបដឹកនាំស៊ីរីជាមុន ក្រែងមានការវាយប្រហារដោយប្រើប្រាស់អាវុធគីមីដូចការសង្ស័យមែននោះ។

កាលពីខែមេសាកន្លងទៅ រដ្ឋាភិបាលស៊ីរីបានអះអាងថា ខ្លួនបោះបង់ចោលអាវុធគីមី ១០០ភាគរយហើយ គ្មានអាវុធពីណាយកទៅប្រើប្រាស់ប្រឆាំងជនស៊ីវិលដូចគេចោទប្រកាន់ឡើយ។

ចាប់ពីមានការប្រើប្រាស់អាវុធគីមីខែមេសាមក សហរដ្ឋអាមេរិកបង្កើនការវាយប្រហារតាមផ្លូវអាកាសប្រឆាំងទាហានរដ្ឋាភិបាល អាសាដ ផង ហើយអាមេរិកក៏បង្ហាញឆន្ទៈវាយប្រហារកម្លាំងដែលជួយជ្រោមជ្រែងទាហានអាសាដ រួមទាំងអ៊ីរ៉ង់ផងដែល។ ក្នុងខែមិថុនានេះ អាមេរិកបានបាញ់ទម្លាក់យន្តហោះចម្បាំងរដ្ឋាភិបាល អាសាដ មួយគ្រឿងដោយចោទថា យន្តហោះនេះវាយប្រហារលើទីតាំងដែលកងទ័ពសម្ព័ន្ធអន្តរជាតិស្ថិតនៅ។ ប៉ុន្តែស៊ីរីអះអាងថា ខ្លួនវាយប្រហារលើក្រុមភេរវជនដែស្ហ (Daesh) ឬក្រុមរដ្ឋឥស្លាមប៉ុណ្ណោះ ហើយអាមេរិកកំពុងព្យាយាមការពារក្រុមភេរវជនទាំងនេះផង៕