ហ្វីលីពីនអនុម័តច្បាប់ដាក់ពិន័យធ្ងន់ធ្ងរចំពោះអ្នកច្រៀងបទភ្លេងជាតិមិនបានត្រឹមត្រូវ

អន្តរជាតិ

ហ្វីលីពីនអនុម័តច្បាប់ដាក់ពិន័យធ្ងន់ធ្ងរចំពោះអ្នកច្រៀងបទភ្លេងជាតិមិនបានត្រឹមត្រូវ

28, Jun 2017 , 9:35 am

រូបភាព

ដោយ:

ដើមសប្តាហ៍នេះ សភាហ្វីលីពីនបានសម្រេចអនុម័តបទបញ្ញត្តិដែលមានគោលដៅផាកពិន័យយ៉ាងធ្ងន់ធ្ងរលើប្រជាជនដែលសម្ដែងខុសឬច្រៀងបទភ្លេងជាតិខុស ហើយក៏តម្រូវឲ្យសាធារណៈជនទាំងអស់ច្រៀងតាមគ្រប់គ្នានៅពេលដែលមានការគោរពទង់ជាតិ។

ដោយសារតែប្រជាជនហ្វីលីពីនច្រៀង និងគោរពបទភ្លេងជាតិ Lupang Hinirang មិនត្រឹមត្រូវ សភាហ្វីលីពីនសម្រេចអនុម័តច្បាប់ដែលអាចផាកពិន័យជាទឹកប្រាក់ហ្វីលីពីនចំនួនពី មួយពាន់ដុល្លារ ទៅដល់ជិត ពីរពាន់ដុល្លារចំពោះប្រជាជនណាដែលច្រៀង និងសម្ដែងខុសពីលំនាំបទដើមនៃបទភ្លេងជាតិ រួមមានកាយវិការ ចង្វាក់ និងពាក្យពេចន៍ក្នុងចំរៀងផង។

យោងតាមសារព័ត៌មានហ្វីលីពីន Inquirer ខ្លឹមសារនៃបទបញ្ញត្តិថ្មីនេះបានចែងថា នៅពេលដែលមានការគោរពទង់ជាតិ ប្រជាជនទាំងអស់ដាច់ខាតត្រូវឈរឲ្យត្រង់ខ្លួននិងច្រៀងតាមបទភ្លេងទាំងអស់គ្នាឲ្យបានត្រឹមត្រូវ ។ នៅពេលដែលភ្លេងបន្លឺឡើង ប្រជាជនទាំងអស់ត្រូវគោរពដោយយកដៃស្ដាំដាក់ពីលើទ្រូងខាងឆ្វេង។

ក្រោមបទបញ្ញត្តិដែលសភាស្នើឡើងមកនេះ រាល់មន្ត្រីរដ្ឋការសាធារណៈទាំងអស់អ្នកដែលមិនគោរពនិងប្រតិបត្តិតាមបានត្រឹមត្រូវពេលមានការគោរពទង់ជាតិនោះ នឹងត្រូវប្រឈមមុខនឹងការអនុវត្តវិធានរដ្ឋបាលតាមស្ថាប័នផងដែរ។

យ៉ាងណាមិញ ក្នុងការរៀបចំបទបញ្ញត្តិថ្មី សភាហ្វីលីពីនក៏បានអនុគ្រោះដល់ប្រជាជនកាន់សាសនាផ្សេងដែលហាមច្រៀងតាម ដោយពួកគេត្រឹមតែឈរគោរពដោយយកចិត្តទុកដាក់បាន។ សភាក៏បានលុបចោលការហាមឃាត់ការដាក់បង្ហាញទង់ជាតិហ្វីលីពីននៅមុខស្ថាប័នឬអគារដែលគ្រប់គ្រងដោយជនបរទេសដែរ។
ម្យ៉ាងបទភ្លេងជាតិ Lupang Hinirang ដែលសភាទទួលស្គាល់ គឺច្រៀងដោយតារាចម្រៀង Julian Felipeតែប៉ុណ្ណោះ។

សេចក្ដីព្រាងច្បាប់នេះនឹងត្រូវរួមធានាអនុវត្តដោយស្ថាប័នជាតិមួយចំនួនមានដូចជាក្រសួងអប់រំ គណៈកម្មការអប់រំថ្នាក់ខ្ពស់ និងអាជ្ញាធរអភិវឌ្ឍជំនាញនិងការអប់រំបច្ចេកវិទ្យាធ្វើយ៉ាងណាឲ្យសិស្សស្គាល់និងច្រៀងបទភ្លេងជាតិLupang Hinirangឲ្យបានត្រឹមត្រូវ។ ក្រសួងប្រវត្តិសាស្ត្រជាតិហ្វីលីពីនក៏បានទទួលបញ្ជាចែកចាយក្រដាសចម្រៀងបទភ្លេងជាតិដើម្បីឲ្យប្រជាជនច្រៀងឲ្យត្រូវលំនាំនិងស្ដង់ដាបទដើម។

សូមជម្រាបផងដែរថា ក្រោយសភាអនុម័តកាលពីថ្ងៃចន្ទ ច្បាប់នេះនឹងបញ្ជូនទៅឲ្យព្រឹទ្ធសភាពិចារណា៕