អន្តរជាតិ
រដ្ឋមន្ត្រីការពារជាតិជប៉ុនអាចបាត់តំណែង ក្រោយនិយាយថាកងទ័ពគាំទ្របក្សកាន់អំណាច រដ្ឋមន្ត្រីការពារជាតិជប៉ុន Tomomi Inada (រូបភាព AP)
× រដ្ឋមន្ត្រីការពារជាតិជប៉ុន លោកស្រី Tomomi Inada បានរងការរិះគន់យ៉ាងខ្លាំង បន្ទាប់ពីលោកស្រីបានយកកងទ័ពទៅភ្ជាប់ជាមួយសារនយោបាយ។ ក្នុងពេលឃោសនាឲ្យបក្សកាន់អំណាចប្រជាធិបតេយ្យសេរីភាព (LDP) សម្រាប់ការបោះឆ្នោតសភាក្រុងតូក្យូ នៅថ្ងៃទី២៧ ខែមិថុនា លោកស្រី Inada បានប្រាប់ឲ្យអ្នកបោះឆ្នោតគាំទ្របេក្ខជនបក្សលោកស្រី ព្រោះវាជាសំណើរបស់កងទ័ព និងក្រសួងការពារជាតិ។ ប៉ុន្តែពេលមានប្រតិកម្មច្រើន លោកស្រីដកសម្ដីវិញដោយចាត់ទុកនេះជាការយល់ច្រឡំ។
សារនយោបាយមួយឃ្លារបស់រដ្ឋមន្ត្រីការពារជាតិជប៉ុន លោកស្រី Tomomi Inada ដែលយកកងស្វ័យការពារទៅឡូកឡំក្នុងរឿងនយោបាយ កំពុងធ្វើឲ្យលោកស្រីរងការរិះគន់រហូតដល់មានសំណើឲ្យលោកស្រីលាលែងពីតំណែងទៀត។ អំឡុងពេលចេញឃោសនាឲ្យបក្សកាន់អំណាចប្រជាធិបតេយ្យសេរី (LDP) នៅសង្កាត់ Itabashi លោកស្រី Inada បានប្រាប់ឲ្យប្រជាជនជ្រើសរើសបេក្ខជនបក្សលោកស្រី ព្រោះជាការចង់បានរបស់ក្រសួងការពារជាតិ កងទ័ព រដ្ឋមន្ត្រីការពារជាតិ និងបក្ស LDP ។
សារនយោបាយខាងលើរបស់លោកស្រី បង្កប់អត្ថន័យថា កងទ័ពជប៉ុនគាំទ្របេក្ខជនបក្សកាន់អំណាចក្នុងការបោះឆ្នោតសភាក្រុង តូក្យូដែលគ្រោងធ្វើនៅថ្ងៃទី២ ខែកក្កដាខាងមុខ។ បើតាមសារព័ត៌មាន Japan Times ប៉ុន្មានម៉ោងក្រោយមក រដ្ឋមន្ត្រីការពារជាតិរូបនេះបានដកការអធិប្បាយខាងលើវិញ ដោយលើកហេតុផលថា វាអាចបង្កការយល់ច្រឡំ។ ប៉ុន្តែលោកស្រី Inada មិនអាចចៀសផុតពីពាក្យរិះគន់បានឡើយ។
មេដឹកនាំបក្សប្រជាធិបតេយ្យ ដែលជាបក្សប្រឆាំង បានស្នើឲ្យលោកស្រី Inada លាលែងពីតំណែង ព្រោះលោកស្រីបង្ហាញជំហរលម្អៀងទៅរកបក្សនយោបាយមួយទៀត បើទោះជាលោកស្រីកំពុងកាន់តំណែងរដ្ឋមន្ត្រីការពារជាតិដែលត្រូវមានជំហរកណ្ដាលដាច់ខាតក៏ដោយ។ យ៉ាងណាមិញ ប្រធានលេខាធិការគណៈរដ្ឋមន្ត្រីជប៉ុន លោក Yoshihide Suga និយាយថា លោកស្រី Inada អាចបន្តតំណែងបាន ព្រោះលោកស្រីបានលុបចោលសម្ដីវិញហើយ។
សូមបញ្ជាក់ថា តាមច្បាប់របស់ជប៉ុន កងស្វ័យការពារមិនអាចលូកលាន់ ឬប្រកាន់ជំហរទៅរកបក្សនយោបាយណាមួយឡើយ តែត្រូវបម្រើផលប្រយោជន៍សាធារណៈ។ ជាមួយនឹងជំហរអព្យាក្រឹត សកម្មភាពកងស្វ័យការពារនេះ ត្រូវបានរឹតត្បិតយ៉ាងតឹងតែងបំផុតដោយច្បាប់ ហើយពួកគេក៏មិនអាចបង្ហាញសកម្មភាពនយោបាយណាមួយបានដែរ។ ដូចនេះ ការលើកឡើងរបស់លោកស្រី Inada ពិតជាបង្កការយល់ច្រឡំលើតួនាទីរបស់កងស្វ័យការពារ។
មិនត្រឹមតែបក្សប្រឆាំងទេ សមាជិកបក្សកាន់អំណាច LDP ក៏មិនសូវពេញចិត្តការអធិប្បាយរបស់រដ្ឋមន្ត្រីការពារជាតិខាងលើដែរ។ អតីតរដ្ឋមន្ត្រីម្នាក់របស់បក្ស LDP បានប្រាប់ឲ្យលោកស្រី Inada សុំទោសជាសាធារណៈ ដើម្បីការពារប្រជាប្រិយភាពរបស់បក្សមុនការបោះឆ្នោតក្រុងតូក្យូមកដល់។ ថ្វីដ្បិតជាការបោះឆ្នោតថ្នាក់តំបន់ ការបោះឆ្នោតថ្ងៃទី២ ខែកក្កដា គឺជាការសាកល្បងប្រជាប្រិយភាពបក្ស LDP របស់នាយករដ្ឋមន្ត្រី ស៊ីនហ្សូ អាបេ ដែលរងការចោទប្រកាន់មិនចេះចប់៕
© រក្សាសិទ្ធិដោយ thmeythmey.com