បារាំងស៊ើបអង្កេតករណីមន្ត្រីយោធាជាន់ខ្ពស់យកយន្តហោះចម្បាំងជិះទៅផ្ទះខ្លួនឯង

អន្តរជាតិ

បារាំងស៊ើបអង្កេតករណីមន្ត្រីយោធាជាន់ខ្ពស់យកយន្តហោះចម្បាំងជិះទៅផ្ទះខ្លួនឯង

28, Jun 2017 , 4:51 pm

រូបភាព

ដោយ: ថ្មីៗ

រដ្ឋមន្ត្រីការពារជាតិបារាំងបានបញ្ជាឲ្យគេស៊ើបអង្កេតករណីមន្ត្រីជាន់ខ្ពស់ម្នាក់ដែលមានឋានន្តរស័ក្តិជាមេបញ្ជាការរងកងទ័ពអាកាស លួចប្រើប្រាស់យន្តហោះចម្បាំងសម្រាប់ជិះទៅផ្ទះពេលចុងសប្តាហ៍។ បើសិនព័ត៌មាននេះជាការពិត មន្ត្រីរូបនេះនឹងត្រូវរងពិន័យកងទ័ពធ្ងន់ធ្ងរផងដែរ។

ថ្ងៃពុធទី ២៨ មិថុនានេះ ទស្សនាវដ្តីរូបត្លុកបារាំង Canard Enchaîné បានផ្សព្វផ្សាយថាលោក Richard Reboul ដែលជាមេបញ្ជាការរងកងទ័ពជើងអាកាសបារាំងនោះបានប្រើប្រាស់យន្តហោះចម្បាំង Dornier Alpha ដែលជាយន្តហោះសម្រាប់ហ្វឹកហ្វឺនសម្រាប់ធ្វើជិះទៅផ្ទះរបស់ខ្លួនចុងសប្តាហ៍។

សារព័ត៌មាននោះបានចោទថា លោក Richard Reboul ជួលយន្តហោះចម្បាំងរបស់កងទ័ពអាកាសជាច្រើនដងមកហើយចាប់ពីខែសីហាឆ្នាំមុន ដើម្បីជិះពីសាលារៀនបើកយន្តហោះចម្បាំងពីក្រុង Bordeaux ទៅកាន់ភូមិ Salon-de-Provence ដែលស្ថិតនៅភាគខាងត្បូងប្រទេសដែលជាមូលដ្ឋានទ័ពអាកាសបារាំងតាំងនៅនោះ។ គេដឹងច្បាស់ថា ការជួលយន្តហោះចម្បាំងជិះទៅភូមិ Salon-de-Provence មិនមានពាក់ព័ន្ធការងារស្ថាប័នឡើយ ហើយលោកគ្រាន់តែជិះទៅលំហែកាយនៅលំនៅដ្ឋានរបស់ខ្លួនប៉ុណ្ណោះ។

ក្រៅពីនេះ ទស្សនាវដ្តីដដែលក៏បានអះអាងថែមទៀតថា លោក Richard Reboul ក៏រក្សាទុកយន្តហោះដឹកយោធាសម្រាប់ដឹកជញ្ជូនមួយគ្រឿងដែលមានអ្នកបើកផងដែរ សម្រាប់ប្រើប្រាស់ពេលចាំបាច់ផ្ទាល់ខ្លួនផង។

សារព័ត៌មានបារាំង Le Monde ផ្សាយថា ឆ្លើយតបនឹងការចោទប្រកាន់នេះ ក្រសួងការពារជាតិបារាំងបានចេញបញ្ជាឲ្យមានការស៊ើបអង្កេតបន្ទាន់មួយពាក់ព័ន្ធបញ្ហានេះ។ លោកស្រី Florence Parly រដ្ឋមន្ត្រីការពារជាតិបារាំងចេញបញ្ជាផ្ទាល់ទៅកាន់ភ្នាក់ងារអធិការកិច្ចប្រចាំក្រសួងការពារជាតិចាប់ផ្តើមស៊ើបអង្កេតបញ្ហាដើម្បីជម្រះមន្ទិលសង្ស័យថា តើរបាយការណ៍នេះត្រឹមត្រូវឬអត់នោះ។

ដោយឡែក នាយសេនាធិការកងទ័ពអាកាសបារាំងលោក André Lanata ក៏បានចេញបញ្ជាឲ្យមានការស៊ើបអង្កេតផ្ទៃក្នុងពាក់ព័ន្ធបញ្ហានេះដែរ ហើយការស៊ើបអង្កេតនេះចាប់ផ្តើមតាំងពីថ្ងៃ២៣ ខែមិថុនាសប្តាហ៍មុនម្ល៉េះ។

ក្នុងករណីដែលគេរកឃើញថា មេបញ្ជាការរងកងទ័ពអាកាសខាងលើពិតជាប្រើប្រាសើយន្តហោះចម្បាំងរបស់ស្ថាប័នដើម្បីបម្រើប្រយោជន៍ផ្ទាល់ខ្លួនមែន លោកនឹងត្រូវប្រឈមមុខទណ្ឌកម្មធ្ងន់ធ្ងរសម្រាប់កងទ័ពផងដែរ៕