អន្តរជាតិ
ឥណ្ឌូណេស៊ី ហាមដៃគូរកស៊ីរបស់លោក ត្រាំ ចេញពីប្រទេសព្រោះគំរាមរដ្ឋអាជ្ញា
× ដៃគូជំនួញរបស់ប្រធានាធិបតី ដូណាល់ ត្រាំ នៅឥណ្ឌូណេស៊ី ត្រូវបានអាជ្ញាធរហាមឃាត់ចាកចេញពីប្រទេស បន្ទាប់ពីរងការចោទប្រកាន់ថាបានគំរាមមន្ត្រីរដ្ឋអាជ្ញាម្នាក់តាមរយៈសារទូរសព្ទ។ លោក Hary Tanoesoedibjo បានចាប់ដៃគូជាមួយក្រុមហ៊ុនលោក ត្រាំ ដើម្បីសាងសង់កន្លែងកំសាន្តប្រណីតនៅកោះបាលី។ យ៉ាងណាក្ដី មេធាវីលោក Hary Tanoesoedibjo អះអាងថា សេដ្ឋីរូបនេះមិនបានធ្វើខុសដូចការចោទប្រកាន់ឡើយ។
មហាសេដ្ឋីឥណ្ឌូណេស៊ី លោក Hary Tanoesoedibjo ដែលរកស៊ីជំនួញជាមួយលោក ដូណាល់ ត្រាំ ត្រូវបានអាជ្ញាធរដាក់បម្រាមចាកចេញពីប្រទេសរយៈ២០ថ្ងៃ ក្រោយមានសំណើពីអង្គភាពស៊ើបអង្កេតឧក្រិដ្ឋកម្មរបស់ប៉ូលិសឥណ្ឌូណេស៊ី។ បើតាមការប្រកាសរបស់អ្នកនាំពាក្យនាយកដ្ឋានអន្តោប្រវេសន៍ឥណ្ឌូណេស៊ីនៅថ្ងៃទី២៨ ខែមិថុនា លោក Tanoesoedibjo បានបំពានច្បាប់ស្ដីពីព័ត៌មាន និងការផ្ទេរ ព័ត៌មានអេឡិចត្រូនិច។
យោងតាមទីភ្នាក់ងារព័ត៌មាន Reuters លោក Tanoesoedibjo ដែលលជាម្ចាស់ក្រុមហ៊ុន MNC រកស៊ីលើវិស័យសារព័ត៌មានដល់វិស័យអចលនទ្រព្យ ត្រូវបានជាប់ឈ្មោះជាជនសង្ស័យម្នាក់ដែលបានផ្ញើសារគំរាមទៅឲ្យរដ្ឋអាជ្ញាម្នាក់ ស្របពេលរដ្ឋអាជ្ញានេះកំពុងស៊ើបអង្កេតក្រុមហ៊ុនសារព័ត៌មានចំណុះឲ្យ MNC ។ ប៉ុន្តែមេធាវីការពារក្ដីលោក Tanoesoedibjo និយាយថា សាររបស់កូនក្ដីខ្លួនមិនបានគំរាមអ្នកណាឡើយ។
ដោយឡែកលោក Tanoesoedibjo វិញ ក៏បានទាត់ចោលការចោទប្រកាន់ទាំងឡាយមកលើរូបលោកដែរ។ ក្នុងករណីរកឃើញថាមានកំហុសមែននោះ លោក Tanoesoedibjo ត្រូវជាប់ពន្ធនាគារដល់ទៅ៤ឆ្នាំ ហើយត្រូវពិន័យទឹកប្រាក់ចំនួន៥៦០០០ដុល្លារថែមទៀត។
សូមបញ្ជាក់ថា លោក Tanoesoedibjo បានបង្កើតបក្សនយោបាយមួយក្នុងឆ្នាំ២០១៥ បន្ទាប់ពីបានចូលរួមប្រជែងកៅអីអនុប្រធានាធិបតីក្នុងការបោះឆ្នោតឆ្នាំ២០១៤ ប៉ុន្តែមិនទទួលបានជោគជ័យឡើយ។ លោកក៏កំពុងពិចារណាចូលរួមការបោះឆ្នោតប្រធានាធិបតីដែលគ្រោងធ្វើនៅឆ្នាំ២០១៩ ផងដែរ។ សេដ្ឋីរូបនេះ ចាត់ទុកជ័យជម្នះរបស់លោក ត្រាំ គឺជាការជំរុញចិត្តរបស់អ្នកនយោបាយជើងថ្មី មិនសម្បូរបទពិសោធ។
បច្ចុប្បន្ននេះ ក្រុមហ៊ុនសំណង់របស់លោក Tanoesoedibjo កំពុងសាងសង់រីសតចំនួនពីរកន្លែង មួយនៅកោះបាលី និងមួយទៀតនៅខេត្តជ្វាខាងលិច។ រីសតទាំងពីរស្ថិតក្រោមការគ្រប់គ្រងរបស់ក្រុមហ៊ុន Trump Hotel Collection ដែលជាក្រុមហ៊ុនមួយក្នុងចំណោមក្រុមហ៊ុនជាច្រើនរបស់ប្រធានាធិបតីអាមេរិក។ ដោយសារមានទំនាក់ទំនងពាណិជ្ជកម្មជិតស្និទ្ធជាមួយលោក ត្រាំ លោក Tanoesoedibjo ក៏ចង់ពង្រឹងទំនាក់ទំនងរវាងប្រទេស និងប្រទេសទៀតផង៕
Tag:
ឥណ្ឌូណេស៊ី
អាមេរិក
ដូណាល់ ត្រាំ
Hary Tanoesoedibjo
© រក្សាសិទ្ធិដោយ thmeythmey.com