អន្តរជាតិ
ប្រធានាធិបតីកូរ៉េថ្មីលោក មូន ចេអ៊ីន ត្រៀមជួបលោក ដូណាល់ ត្រាំ ជាលើកដំបូង
× ប្រធានាធិបតីកូរ៉េខាងត្បូងលោក មូន ចេអ៊ីន ទៅក្រុងវ៉ាស៊ីនតោនថ្ងៃ ២៨ ខែមិថុនាដើម្បីជួបជាមួយ ប្រធានាធិបតីអាមេរិកលោក ដូណាល់ ត្រាំ។ ជំនួបរវាងប្រធានាធិបតីទាំងពីរ នឹងផ្ដោតសំខាន់លើការស្វែងរកវិធានការដែលអាចទប់ស្កាត់ការអភិវឌ្ឍអាវុធនុយក្លេអ៊ែរកូរ៉េខាងជើង និងពង្រឹងសម្ព័ន្ធភាពរវាងប្រទេសទាំងពីរផងដែរ។
លោក មូន ចេអ៊ីន ចេញពីកូរ៉េនៅថ្ងៃពុធទី ២៨ មិថុនាដើម្បីបំពេញទស្សនកិច្ចផ្លូវការរយៈពេលបួនថ្ងៃនៅអាមេរិក និងជួបជាមួយប្រធានាធិបតីអាមេរិក ដូណាល់ ត្រាំ។ វាជាជំនួបលើកដំបូងបំផុតដែរចាប់ពីពេលដែលលោកឡើងកាន់តំណែងខែមុន។
កន្លងមកលោក ត្រាំ ក៏បានចូលរួមអបអរលោក មូន ចេអ៊ីន តាមទូរសព្ទដែរមុនពេលលោកឡើងកាន់តំណែងជាផ្លូវការ។ ដំណើរទស្សនកិច្ចលោកទៅកាន់អាមេរិលនេះ ធ្វើឡើងតាមតាមការអញ្ជើញរបស់ប្រធានាធិបតី ត្រាំ។
មន្ត្រីការិយាល័យប្រធានាធិបតីកូរ៉េខាងត្បូងបានលើកឡើងថា ការកសាងចំណងមិត្តភាព និងសេចក្ដីទុកចិត្តរវាងលោក មូន ចេអ៊ីន និងលោក ដូណាល់ ត្រាំ ពិតជាសំខាន់ខ្លាំងណាស់។ នេះក៏ព្រោះថា ប្រធានាធិបតីទាំងពីរនឹងត្រូវដឹកនាំប្រទេសសម្ព័ន្ធមិត្តយ៉ាងហោចណាស់ក៏បួនឆ្នាំទៀតដែរ។
លោកChung Eui-yong ប្រធានផ្នែកសន្តិសុខជាតិនៃការិយាល័យប្រធានាធិបតីកូរ៉េខាងត្បូងបានពោលដូច្នេះថា៖«យើងសង្ឃឹមថាប្រធានាធិបតីទាំងពីរនឹងមានទំនាក់ទំនងជិតស្និទ្ធ និងមានទំនុកចិត្តចំពោះគ្នាទៅវិញទៅមក។ដូច្នេះ ក្នុងរយៈពេល៥ឆ្នាំខាងមុខទៀតអ្នកទាំងពីរប្រឹក្សាយោបល់តាម ទូរស័ព្ទនៅពេលដែលមានការចាំបាច់ និងអាចដំណើរទស្សនកិច្ចទៅវិញទៅមកឬមានជំនួបជាមួយគ្នាផងដែរ »។
គួរបញ្ជាក់ផងដែរថា លោក ដូណាល់ ត្រាំនឹងចប់អាណត្តិនៅឆ្នាំ២០២២ ចំណែកឯលោកមូនចេអ៊ីននឹងចប់អាណត្តិក្នុងឆ្នាំ២០២៣ ខែឧសភា។
ដើម្បីបង្ហាញពីសំខាន់នៃសម្ព័ន្ធភាពរវាងអាមេរិកនិងកូរ៉េខាងត្បូង ហើយលោកមូនចេអ៊ីនផ្ទាល់ក៏មានប្រវត្តិទាក់ទងនឹងសង្គ្រាមកូរ៉េឆ្នាំ ១៩៥០ ដែរនោះ លោកនឹងអញ្ជើញទៅទស្សនកិច្ចនៅកន្លែងគោរពវិញ្ញាណក្ខន្ធ Jangjin Lake Campaign ដែលស្ថិតនៅរដ្ឋ Virginia។
បន្ថែមពីនេះ លោក មូន ចេអ៊ីន និងភរិយាក៏នឹងចូលរួមពិសារអាហារពេលល្ងាចជាមួយនឹងក្រុមគ្រួសាររបស់លោក ដូណាល់ ត្រាំ នៅសេតវិមាននាថ្ងៃព្រហស្បតិ៍ ដែរ។
សូមជម្រាបផងដែរថា សមរភូមិឆ្នាំ១៩៥០ គឺជាការប្រយុទ្ធគ្នាដ៏ខ្លាំងក្លាបំផុតមួយក្នុងចំណោមសមរភូមិផ្សេងទៀតក្នុងសង្គ្រាមកូរ៉េចន្លោះពីឆ្នាំ១៩៥០ ដល់១៩៥៣។ សមរភូមិនេះហើយបាន បានពន្យារការរុលចូលមកដល់របស់កងទ័ពចិន និងកូរ៉េខាងជើង ហើយវាអនុញ្ញាតឲ្យមានការជម្លៀសប្រជាជនប្រមាណជា៩ម៉ឺននាក់ចេញពីខេត្តHungnamដែលបច្ចុប្បន្នជាទឹកដីកូរ៉េខាងជើង។អ្វីដែលគួរឲ្យកត់សម្គាល់នោះ ក្រុមគ្រួសាររបស់លោក មូន ក៏បានស្ថិតក្នុងចំណោមប្រជាជន៩ម៉ឺននាក់ដែលត្រូវជម្លៀសនេះដែរ ដោយសារតែការជម្លៀសចេញនេះហើយទើបលោក និងក្រុមគ្រួសារអាចមានជីវីតមកដល់សព្វថ្ងៃ៕
Tag:
ដូណាល់ ត្រាំ
មូន ចេអ៊ីន
© រក្សាសិទ្ធិដោយ thmeythmey.com