កីឡាអន្តរជាតិ
អន្តរជាតិ
Pacquiao អាចជួប Floyd ម្តងទៀត បើឈ្នះការប្រកួតជាមួយ Horn
× ការប្រកួតរវាង Floyd Mayweather និង Manny Pacquiao អាចនឹងកើតឡើងម្តងទៀតប្រសិនបើអ្នកប្រដាល់ហ្វីលីពីនដ៏ល្បីល្បាញរូបនេះ ឈ្នះការប្រកួតជាមួយនឹងកីឡាករអូស្ត្រាលី Jeff Horn នៅចុងសប្តាហ៍នេះ។ នេះជាសម្តីលោកគ្រូបង្វឹករបស់ Pacquiao ដែលបានប្រាប់ក្រុមអ្នកការសែតក្នុងទីក្រុង Brisbane នៅថ្ងៃអង្គារ ទី២៧ ខែមិថុនានេះ។
គ្រូបង្វឹករបស់ស្តេចប្រដាល់អាស៊ីលោក Freddie Roach មិនបានបោះបង់ការប្រកួតជាមួយ អ្នកប្រដាល់មិនស្គាល់ចាញ់ Mayweather ឡើយហើយបានប្រាប់អ្នកយកព័ត៌មានថាការប្រកួតរវាងកំពូលអ្នកប្រដាល់ទាំងពីរនឹងកើតឡើងជាលើកទី២។
លោក Freddie Roach (ឆ្វេង) គ្រូបង្វឹក Manny Pacquiao
សារព័ត៌មានកីឡាប្រដាល់ពិភពលោក World Boxing News បានបង្ហាញសេចក្តីអធិប្បាយរបស់ Roach នៅមុខការប្រកួតរវាង Pacquiao-Horn យ៉ាងនេះថា៖«Pac-Man ត្រូវតែឈ្នះក្នុងការប្រកួតនៅចុងសប្តាហ៍នេះ ដើម្បីជួបជាមួយ Floyd នៅលើសង្វៀនម្តងទៀត។ តែបើសិនជាគាត់ចាញ់ ខ្ញុំប្រហែលជាជំរុញឲ្យគាត់ចូលនិវត្តន៍ហើយ»។
ម្ចាស់ជើងឯកខ្សែក្រវាត់៨ស្ថាប័នវ័យ៣៨ឆ្នាំសញ្ជាតិហ្វីលីពីន ធ្លាប់ចាញ់អ្នកប្រដាល់អាមេរិកវ័យ៤០ឆ្នាំម្តងរួចមកហើយកាលពីឆ្នាំ២០១៥ ដែលការប្រកួតនោះត្រូវបានគេចាត់ទុកថាជាការជួបគ្នាប្រចាំសតវត្សរ៍ក្នុងប្រវត្តិសាស្ត្រកីឡាប្រដាល់ផងដែរ។
Pacquiao នឹងឡើងការពារខ្សែក្រវាត់ WBO របស់ខ្លួនជាមួយអ្នកប្រដាល់អូស្ត្រាលី Jeff Horn នាកីឡដ្ឋាន Suncorp Arena ស្ថិតក្នុងទីក្រុង Brisbane ប្រទេសអូស្ត្រាលី នៅថ្ងៃទី២ខែកក្កដាសប្តាហ៍នេះ។ ចំណែក Floyd នឹងឡើងវាយជាមួយកំពូលអ្នកវាយក្នុងទ្រុង Conor McGregor ក្នុងប្រភេទទម្ងន់មធ្យម នាថ្ងៃទី២៦ ខែសីហាខាងមុខនេះ នៅទីក្រុង Las Vegas៕
Tag:
ប្រដាល់
Manny Pacquiao
Floyd Mayweather
© រក្សាសិទ្ធិដោយ thmeythmey.com