អន្តរជាតិ
លោក ឌូទើតេ បើកដៃឲ្យទាហានសម្លាប់ពួកភេរវជន ទោះជាត្រូវលះបង់ជីវិតជនស្លូតត្រង់ក៏ដោយ ប្រធានាធិបតី រ៉ូឌ្រីហ្គោ ឌូទើតេ ថ្លែងទៅកាន់ទាហានហ្វីលីពីន (រូបភាពវិមានប្រធានាធិបតី)
× បន្ទាប់ពីបាត់មុខជាសាធារណៈអស់ពេលជិតមួយសប្ដាហ៍ ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានចេញមកចូលរួមកម្មវិធីផ្សេងវិញហើយ។ នៅថ្ងៃទី២៨ ខែមិថុនា លោក ឌូទើតេ បានចូលរួមក្នុងខួបទី១២០ ថ្ងៃបង្កើតកងការពារប្រធានាធិបតី ហើយលោកក៏បានប្រាប់ឲ្យទាហានទាំងអស់សម្លាប់ពួកភេរវករ ដោយមិនចាំបាច់រើសមុខឡើយ ទោះជាត្រូវលះបង់ជីវិតប្រជាជនក្ដី។ លោកនិយាយដូចនេះ ខណៈទាហានហ្វីលីពីនកំពុងវាយប្រយុទ្ធជាមួយពួកភេរវករនៅទីក្រុងម៉ារ៉ាវី។
ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានចេញបញ្ជាឲ្យកងទ័ពហ្វីលីពីនកម្ទេចពួកជ្រុលនិយមឲ្យអស់ ដោយមិនចាំបាច់ខ្វល់ពីជីវិតប្រជាជនឡើយ។ លោក ឌូទើតេ ក៏ធានាការពារពួកគេ ប្រសិនបើពួកគេសម្លាប់ជីវិតជនស្លូតត្រង់ អំឡុងពេលបំពេញការងាររបស់ខ្លួន។ នៅពេលនេះ ទាហានហ្វីលីពីនកំពុងបើកយុទ្ធនាការបោសសម្អាតក្រុមជ្រុលនិយមរដ្ឋឥស្លាមនៅទីក្រុងម៉ារ៉ាវី នៅភាគខាងត្បូងសម្បូរជនមូស្លីម។
ចំពោះមុខកងការពារប្រធានាធិបតីនៅថ្ងៃទី២៨ ខែមិថុនា លោក ឌូទើតេ បានប្រាប់ទាហានហ្វីលីពីនកុំមានការស្ទាក់ស្ទើរក្នុងការសម្លាប់ពួកឧក្រិដ្ឋជនដោយគ្រាន់តែឃើញមានប្រជាជនឲ្យសោះ។ ប្រធានាធិបតីរូបនេះនិយាយថា វាជាកាត្វកិច្ចរបស់ប្រជាជនដែលត្រូវរត់គេច ឬរត់រកកន្លែងមានសុវត្ថិភាព។ នេះបើតាមការផ្សាយរបស់សារព័ត៌មាន Rappler ដែលបន្តថា លោក ឌូទើតេ នឹងជួយការពារទាហានពីការកាត់ទោសទាំងឡាយ ពេលអនុវត្តតាមបញ្ជារបស់លោក។
ប្រធានាធិបតីមាត់ឆៅរូបនេះពន្យល់ថា៖ «យើងនឹងប្រឈមមុខការចោទប្រកាន់ដូចជាការសម្លាប់រង្គាលជាដើម។ ដូចដឹងហើយ គ្រាប់កាំភ្លើងតែងរត់ទម្លុះវត្ថុគ្រប់យ៉ាង ហើយពេលកេះមួយដង ចេញបីបួនគ្រាប់ឯណោះ។ ប៉ុន្តែអ្នកបន្តបាញ់រហូតទៅ ទោះជាគ្រាន់កាំភ្លើងរត់តម្រង់នរណាក៏ដោយ»។ បើតាមសម្ដីលោក ឌូទើតេ ហេតុការណ៍ដែលកើតឡើង គឺជារឿងចៃដន្យ គ្មាននរណាចង់ឲ្យកើតទេ តែលោកនឹងការពារទាហានរបស់ខ្លួនដាច់ខាត។
ការដាក់បទបញ្ជារបស់លោក ឌូទើតេ ធ្វើឡើងស្របពេលដែលការប្រយុទ្ធរំដោះទីក្រុងម៉ារ៉ាវីកំពុងបន្តនៅឡើយ ខណៈចំនួនអ្នកស្លាប់បានកើនឡើងជាលំដាប់។ មកទល់ពេលនេះ មនុស្សច្រើនជាង៤០០នាក់បានបាត់បង់ជីវិតក្នុងការវាយប្រយុទ្ធរវាងកងកម្លាំងរដ្ឋាភិបាល និងក្រុមសកម្មជនមានទំនាក់ទំនងជាមួយក្រុមរដ្ឋឥស្លាម។ នៅថ្ងៃទី២៨ ខែមិថុនា ក្រុមជួយសង្គ្រោះបានរកឃើញសាកសពចំនួន១៧ នៅតំបន់ដែលទាហានរដ្ឋាភិបាលទើបដណ្ដើមគ្រប់គ្រង។
លោក ឌូទើតេ បានប្រកាសដាក់តំបន់ភាគត្បូងនេះឲ្យស្ថិតក្រោមច្បាប់អាជ្ញាសឹក បន្ទាប់ពីក្រុមជ្រុលនិយមដណ្ដើមគ្រប់គ្រងទីក្រុងម៉ារ៉ាវី កាលពីថ្ងៃទី២៣ ខែមិថុនា ខណៈលោកកំពុងទស្សនកិច្ចនៅរុស្ស៊ីនៅឡើយ។ ទោះជាការប្រកាសច្បាប់អាជ្ញាសឹកនេះនៅចម្រូងចម្រាស់ក្ដី លោក ឌូទើតេ បានប្ដេជ្ញាដណ្ដើមទីក្រុងម៉ារ៉ាវីមកវិញ និងបោសសម្អាតពួកភេរវករឲ្យអស់។ ប៉ុន្តែការព្យាយាមរបស់កងទ័ពរដ្ឋាភិបាលនៅមិនទាន់ទទួលជោគជ័យនៅឡើយទេ៕
Tag:
ហ្វីលីពីន
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com