ពូទីន និងត្រាំ អាចជួបពិភាក្សាទ្វាភាគីលើកដំបូងក្រៅកិច្ចប្រជុំប្រទេស២០ នៅអាល្លឺម៉ង់

អន្តរជាតិ

ពូទីន និងត្រាំ អាចជួបពិភាក្សាទ្វាភាគីលើកដំបូងក្រៅកិច្ចប្រជុំប្រទេស២០ នៅអាល្លឺម៉ង់

29, Jun 2017 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

រដ្ឋមន្ត្រីការបរទេសរុស្ស៊ីលោក Sergei Lavrov បានបញ្ជាក់ថាលោក វ្ល៉ាឌីមៀ ពូទីន និងលោក ដូណាល់ ត្រាំ អាចនឹងជួបពិភាក្សាគ្នាពីបញ្ហាទំនាក់ទំនងទ្វេភាគីនិងបញ្ហាសំខាន់ផ្សេងទៀតនៅក្រៅកិច្ចប្រជុំប្រទេស ២០នៅក្រុង Hamburg ប្រទេសអាល្លឺម៉ង់សប្តាហ៍ក្រោយ។

ក្នុងសន្និសីសារព័ត៌មានជាមួយសមភាគីអាល្លឺម៉ង់លោក Sigmar Gabriel នៅថ្ងៃពុធទី ២៨ ខែមិថុនានៅក្រុង Krasnodar ប្រមុខការទូតរុស្ស៊ីលោក Sergei Lavrov បង្ហើបពីឱកាសនៃការជួបសំណេះសំណាលគ្នារវាងប្រធានាធិបតីអាមេរិក និងប្រធានាធិបតីអាមេរិកនៅសប្តាហ៍ក្រោយ។

លោក Lavrov បានលើកឡើងថា វាជារឿងដែលអាចកើតឡើងព្រោះលោក ដូណាល់ ត្រាំ និងលោក វ្ល៉ាឌីមៀ ពូទីន នឹងស្ថិតនៅក្នុងកិច្ចប្រជុំប្រទេស ២០ រួមគ្នា ហើយវាជារឿងដែលអាចរំពឹងទុកមុនបានដែរ។

សារព័ត៌មានរុស្ស៊ី RT បានស្រង់សម្តីលោក Lavrov ដូច្នេះ៖« យើងអាចសន្និដ្ឋានជាមុនបានថាការជជែកពិភាក្សាគ្នារវាងប្រមុខរដ្ឋទាំងពីរនឹងកើតឡើង ព្រោះមេដឹកនាំទាំងពីរនឹងស្ថិតនៅក្នុងទីក្រុងតែមួយ អាគាររួមគ្នា និងកន្លែងប្រជុំតែមួយផង។ គិតថាខ្ញុំរំពឹងខុសទៅចុះ បើសិនអុ្នកទាំងពីនៅតែមិនអាចជួបជជែកគ្នាពីបញ្ហាប្រឈមជាច្រើននោះ»។

បន្ទាប់ពីលើកឡើងពីលទ្ធភាពនៃជំនួបរវាងមេដឹកនាំទាំងពីរលោក Lavrov បានបន្ថែមផងដែរ ក្នុងករណីដែលមានជំនួបទ្វេភាគីដាច់ដោយឡែកពីកិច្ចប្រជុំប្រទេស២០ លោក ត្រាំ និងលោក ពូទីន នឹងមានឱកាសជជែកពីបញ្ហាច្រើន។ មិនត្រឹមតែរឿងស៊ីរី និងអ៊ុយក្រែនដែលជាបញ្ហាក្តៅទេ មេដឹកនាំទាំងពីរនឹងផ្តោតសំខាន់លើការដោះស្រាយបញ្ហាចំពោះមុខដោយស្តារទំនាក់ទំនងទ្វេភាគីសិន ព្រោះវាសំខាន់។

«ជំហានដំបូងបំផុត យើងគួរតែព្យាយាមស្តារកិច្ចសន្ទនាទ្វេភាគីឲ្យបានជោគជ័យសិន ដោយកិច្ចសន្ទនាទ្វេភាគីនោះផ្អែកសំខាន់លើផលប្រយោជន៍ស្នូលរបស់ប្រទេសទាំងពីរដែរ»។ លោក Lavrov បានបញ្ជាក់ដូច្នេះ។

រដ្ឋមន្ត្រីការបរទេសអាល្លឺម៉ង់ក៏បានស្វាគមន៍ផងដែរ បើសិនជាកិច្ចសន្ទនារវាងមេដឹកនាំកំពូលមហាអំណាចទាំងពីរកើតឡើងនៅពេលខាងមុខមែននោះ។

តាមពិតទៅទំនាក់ទំនងរវាងអាមេរិកនិងរុស្ស៊ីនៅតែល្អក់កករខ្លាំង ទោះបីជាលោក ដូណាល់ ត្រាំ មានជំហរចង់ស្តារទំនាក់ទំនងនោះឡើងវិញក៏ដោយ។ ចលនាប្រឆាំងរុស្ស៊ីកើតឡើងយ៉ាងផុសផុលនៅអាមេរិកជាពិសេសគេចោទប្រកាន់ថា រុស្ស៊ីបានលូកលាន់ការបោះឆ្នោតអាមេរិកនិងជួយឲ្យ ត្រាំជាប់ឆ្នោតផង។ ប៉ុន្តែទាំងរដ្ឋបាលត្រាំ និងវិមានក្រេមឡាំងបដិសេធការចោទប្រកាន់នេះ។

ក្រៅពីបញ្ហានេះ អាមេរិក និងរុស្ស៊ីកាន់តែប្រឈមមុខគ្នាខ្លាំងនៅក្នុងជម្លោះស៊ីរី ចាប់ពីមានការប្រើប្រាស់អាវុធគីមីនៅខែមេសាកន្លងមកដែលបណ្តាលឲ្យជនស៊ីវិលយ៉ាងហោចណាស់ ៨០នាក់ស្លាប់។ អាមេរិកចោទប្រកាន់រដ្ឋាភិបាលស៊ីរីពាក់ព័ន្ធការប្រើប្រាស់អាវុធគីមី ហើយលោក ត្រាំ បានបញ្ជាឲ្យកងទ័ពអាមេរិកបាញ់ផ្លោងមីស៊ីលជិត ៦០ គ្រាប់ចូលមូលដ្ឋានទ័ពអាកាសស៊ីរី Shayrat ដែលបំផ្លាញយន្តហោះចម្បាំងស៊ីរីអស់ជាច្រើនគ្រឿងផង។

មកដល់ខែមិថុនានេះ ទំនាក់ទំនងកាន់តែធ្លាក់ចុះ ហើយរុស្ស៊ីបានសម្រេចកាត់ផ្តាច់ការប្រាស្រ័យទាក់ទងបញ្ចៀសការប៉ះទង្គិចពេលបើកប្រតិបត្តិការផ្លូវអាកាសនៅស៊ីរីផង ឆ្លើយតបការបាញ់ទម្លាក់យន្តហោះរដ្ឋាភិបាលស៊ីរីដែលកំពុងទម្លាក់គ្រាប់ប្រឆាំងក្រុមភេរវជនរដ្ឋឥស្លាមនោះ៕