អន្តរជាតិ
ជំនួបកំពូល G-20 នៅអាល្លឺម៉ង់នឹងអាចជាជំនួបសោះកក្រោះ?
× មេដឹកនាំសមាជិកអឺរ៉ុបសំខាន់ៗមានបារាំង អេស្ប៉ាញ ហូឡង់ អង់គ្លេស ន័រវ៉េស និងអ៊ីតាលី បានជួបប្រជុំគ្នានៅរដ្ឋធានីបែរឡាំងនៅថ្ងៃទី២៩ ខែមិថុនា ដែលគេមើលឃើញថាជាការប្រុងប្រៀបរបស់អឺរ៉ុបសម្រាប់ជំនួបកំពូលប្រទេសមានសេដ្ឋកិច្ចរីកចម្រើនទាំង២០ (G-20) នៅសប្ដាហ៍ក្រោយ។ មេដឹកនាំរដ្ឋសមាជិកអឺរ៉ុបទាំង៦ បានពិភាក្សារកជំហរការពារផលប្រយោជន៍រួមគ្នាលើផ្នែកពាណិជ្ជកម្ម បម្រែបម្រួលអាកាសធាតុ និងសន្តិសុខ។ ជំនួប G-20 លើកនេះ ទំនងជាការជំនួបដ៏សោះកក្រោះមួយ ព្រោះចំពេលសមាជិកខ្លះមាននយោបាយផ្ទុយគ្នា ឯខ្លះទៀតមានទំនាក់ទំនងមិនល្អទៅទៀត។
មុនជំនួបប្រទេស G-20 នៅថ្ងៃទី៧ និងថ្ងៃទី៨ ខែកក្កដា មេដឹកនាំរដ្ឋាភិបាលសមាជិកអឺរ៉ុបចំនួន៦ បានជួបគ្នាជាមួយអធិការបតីអាល្លឺម៉ង់ ដើម្បីត្រៀមជំនួបសំខាន់នេះ។ នាយករដ្ឋមន្ត្រីអង់គ្លេស ហូឡង់ អ៊ីតាលី អេស្ប៉ាញ ន័រវ៉េស និងប្រធានាធិបតីបារាំង សុទ្ធតែមានវត្តមានក្នុងជំនួបនៅរដ្ឋធានីបែរឡាំង។ អធិការបតីអាល្លឺម៉ង់ Angela Merkel ដែលជាម្ចាស់ផ្ទះកិច្ចប្រជុំ G-20 ទំនងជាត្រូវឈឺក្បាលខ្លាំង ព្រោះកិច្ចប្រជុំលើកនេះខុសប្លែក និងលំបាកជាងកិច្ចប្រជុំសព្វមួយដង។
បញ្ហាសំខាន់ៗច្រើននឹងក្លាយជាឧបសគ្គសម្រាប់ជំនួប G-20 ដែលធ្វើនៅទីក្រុង Hamburg នៅសប្ដាហ៍ក្រោយ។ នយោបាយរបស់ប្រធានាធិបតីអាមេរិក ដូណាល់ ត្រាំ ដូចជាការដកខ្លួនចេញកិច្ចព្រមព្រៀងបម្រែបម្រួលអាកាសធាតុ ការរឹតត្បិតការធ្វើដំណើរ និងនយោបាយគាំពារនិយមក្នុងការធ្វើពាណិជ្ជកម្ម បានក្លាយជាចម្រូងចម្រាស និងធ្វើឲ្យសម្ព័ន្ធមិត្តអាមេរិកខកចិត្តយ៉ាងខ្លាំង ព្រោះអាមេរិកគិតតែប្រយោជន៍ខ្លួនឯងជាងប្រយោជន៍រួម។
១. អាល្លឺម៉ង់ និងបារាំង ចាប់ដៃគ្នាការពារកិច្ចព្រមព្រៀងបម្រែបម្រួលអាកាសធាតុ
ការដើរចេញរបស់អាមេរិកពីកិច្ចព្រមព្រៀងប៉ារីសស្ដីពីបម្រែបម្រួលអាកាសធាតុ គឺជាប្រធានបទសំខាន់សម្រាប់ជំនួបកំពូល G-20 ។ គេរំពឹងថាមេដឹកនាំប្រទេសផ្សេងទៀត នឹងបញ្ចុះបញ្ចូលអាមេរិកឲ្យពិចារណាម្ដងទៀតលើកិច្ចព្រមព្រៀងនេះ ជាជាងគិតតែប្រយោជន៍ផ្ទាល់ខ្លួន។ ប៉ុន្តែទោះជាអាមេរិកមិនចូលរួមកិច្ចព្រមព្រៀងនេះវិញក៏ដោយ បារាំង និងអាល្លឺម៉ង់ ឯកភាពគ្នាហើយថាកិច្ចព្រមព្រៀងអន្តរជាតិនេះនឹងនៅតែបន្តទៅមុខដដែល។
អធិការបតីអាល្លឺម៉ង់ Angela Merkel និងប្រធានាធិបតីបារាំង អេម៉ានុយអែល ម៉ាក្រុង បានប្រកាសរួមគ្នានៅសន្និសីទកាសែតថ្ងៃទី២៩ ខែមិថុនា ក្នុងការការពារកិច្ចព្រមព្រៀងប៉ារីស បើទោះជាអាមេរិកដកខ្លួនក៏ដោយ។ យ៉ាងណាក្ដី លោក ម៉ាក្រុង ហាក់មានជំហរទន់ភ្លន់ដាក់អាមេរិកជាងលោកស្រី Merkel ។ ជាមួយនឹងការសង្ឃឹមថាអាមេរិកនឹងពិចារណម្ដងទៀតនោះ លោក ម៉ាក្រុង ក៏មិនទុកឲ្យលោក ត្រាំ ឯកោក្នុងកិច្ចប្រជុំនៅសប្ដាហ៍ក្រោយដែរ។
ខុសពីប្រធានាធិបតីបារាំង លោកស្រី Merkel មានជំហរតឹងរ៉ឺងដាក់អាមេរិកតាំងពីដើមមក។ លោកស្រី Merkel បានផ្ញើសារច្បាស់ៗហើយថា លោកស្រីនឹងតទល់ជាមួយលោក ត្រាំ លើកិច្ចព្រមព្រៀងបម្រែបម្រួល ពាណិជ្ជកម្ម និងអន្តោប្រវេសន៍។ បើតាមទីភ្នាក់ងារព័ត៌មាន Reuters អធិការបតីអាល្លឺម៉ង់បាននិយាយឌឺថា បញ្ហាសកលមិនអាចដោះស្រាយតាមការផ្ដាច់ខ្លួននៅតែឯង និងការគាំពារនិយមឡើយ។
២. អាល្លឺម៉ង់ នឹងបើកដៃឲ្យមានការជួបជុំធ្វើបាតុកម្មប្រឆាំងមេដឹកនាំបរទេស
រដ្ឋាភិបាលអាល្លឺម៉ង់ នឹងបើកសិទ្ធិឲ្យមានការធ្វើបាតុកម្មអំឡុងពេលកិច្ចប្រជុំកំពូល G-20 នៅទីក្រុងកំពង់ផែ Hamburg ។ មន្ត្រីរដ្ឋាភិបាលអាល្លឺម៉ង់បញ្ជាក់ថា ការជួបជុំជាសិទ្ធិប្រជាជន និងមានចែងក្នុងគោលការណ៍ប្រជាធិបតេយ្យផងដែរ ដូចនេះរដ្ឋាភិបាលនឹងមិនរារាំងការជួបជុំនេះឡើយ។ អ្វីកាន់តែសំខាន់នោះ ការបើកសិទ្ធិឲ្យមានការធ្វើបាតុកម្មនេះ គឺជាសារសម្រាប់មេដឹកនាំផ្សេងៗដូចជាលោក ត្រាំ ប្រធានាធិបតីតួកគី និងប្រធានាធិបតីរុស្ស៊ីជាដើម។
ជាធម្មតា ជំនួបសំខាន់បែបនេះ តែងរៀបចំនៅកន្លែងឆ្ងាយពីភ្នែកច្រមុះរបស់សាធារណជន ហើយងាយស្រួលការពារសុវត្ថិភាព ប៉ុន្តែកិច្ចប្រជុំនៅទីក្រុង Hamburg នៅឆ្នាំនេះ ខុសប្លែកពីឆ្នាំមុន។ រដ្ឋាភិបាលអាល្លឺម៉ង់ បែរជ្រើសរើសកន្លែងប្រជុំនៅកណ្ដាលទីក្រុង ដែលបង្កការងាយស្រួលសម្រាប់ក្រុមបាតុករទៅវិញ ហើយលំបាកសម្រាប់ក្រុមប៉ូលិស។ ប៉ូលិសពីរម៉ឺននាក់ ព្រមទាំងសេះ ឧទ្ធម្ភាគចក្រច្រើនគ្រឿង និងរបាំងដែក នឹងត្រូវពង្រាយនៅក្បែរកន្លែងប្រជុំ។
មន្ត្រីប៉ូលិសនិយាយថា ក្រុមបាតុករជិតមួយម៉ឺននាក់ នឹងប្រមូលផ្ដុំគ្នាដើម្បីតវ៉ានយោបាយរបស់ប្រទេស G-20 ក៏ដូចជាបង្កើតជាឧបសគ្គផ្សេងដល់កិច្ចប្រជុំផងដែរ។ គេរំពឹងដែរថា ក្រុមបាតុករជនជាតិឃើដ នឹងមកប្រឆាំងវត្តមានរបស់ប្រធានាធិបតីតួកគី តៃយីប អ៊ែរដូហ្កាន់ ចំពោះនយោបាយប្រឆាំងជនជាតិឃើដរបស់លោក ខណៈជនជាតិតួកគីខ្លះក៏មកប្រមូលគ្នាដើម្បីបង្ហាញការគាំទ្រដល់លោក អ៊ែរដូហ្កាន់ ផ្ទាល់ផងដែរ។
៣. ជំនួប G-20 ដ៏សោះកក្រោះ
លោកស្រីអធិការបតីអាល្លឺម៉ង់ Merkel ត្រូវទទួលមេដឹកនាំធំៗចំនួន១៩ ផ្សេងទៀតមកពីជុំវិញពិភពលោក ក៏ដូចជាថ្នាក់ដឹកនាំអង្គការអន្តរជាតិសំខាន់ក្នុងទីក្រុង Hamburg ។ បញ្ហាអាកាសធាតុ អន្តោប្រវេសន៍ និងពាណិជ្ជកម្ម នឹងគ្រប់ដណ្ដប់កិច្ចប្រជុំនេះ ហើយច្បាស់ណាស់ថា ការខ្វែងគំនិតគ្នានឹងកើតមានមិនខាន។ លោកស្រី Merkel ដែលជាម្ចាស់កិច្ចប្រជុំនឹងប្រកាន់ជំហរដាច់ខាតខ្លាំងដើម្បីការពារប្រយោជន៍សកលលោក។
អ្វីគួរឲ្យកត់សម្គាល់នោះ ទំនាក់ទំនងរវាងលោកស្រី Merkel ជាមួយមេដឹកនាំជាភ្ញៀវមានតួកគី រុស្ស៊ី និងអាមេរិក មិនល្អឡើយ។ ជាមួយអាមេរិក លោកស្រី Merkel ប្រកាន់ជំហរជំទាស់ដាច់ណាត់នយោបាយរបស់លោក ត្រាំ មិនកិច្ចព្រមព្រៀងប៉ារីស ឬក៏នយោបាយពាណិជ្ជកម្មអ្វីឡើយ។ ដោយឡែកជាមួយរុស្ស៊ីវិញ អាល្លឺម៉ង់ នៅតែបន្តដាក់ទណ្ឌកម្មដដែល ក្នុងគោលដៅបង្ខំឲ្យរុស្ស៊ីប្រគល់តំបន់គ្រីមៀ និងបញ្ចប់វិបត្តិនៅភាគខាងកើតអ៊ុយក្រែន។
ចំណែករឿងថ្មីៗនេះវិញ អាល្លឺម៉ង់ និងតួកគី ក៏មិនត្រូវគ្នាដែរ ពាក់ព័ន្ធការប្រើប្រាស់មូលដ្ឋានកងទ័ពតួកគីពីសំណាក់អាល្លឺម៉ង់។ រឿងរ៉ាវមើលមុខគ្នាមិនចំណេះកើតឡើង បន្ទាប់ពីក្រុងអង់ការ៉ាហាមឃាត់សមាជិកសភាអាល្លឺម៉ង់ចូលសួរសុខទុក្ខកងទ័ពអាល្លឺម៉ង់នៅមូលដ្ឋាន Incirlik ដើម្បីឆ្លើយតបនឹងការហាមឃាត់មន្ត្រីតួកគីចូលរួមការជួបជុំរបស់ប្រជាជនតួកគីនៅអាល្លឺម៉ង់។ ដោយសាររឿងនេះ អាល្លឺម៉ង់ក៏សម្រេចចិត្តឈប់ប្រើប្រាស់មូលដ្ឋានទ័ពតួកគី និងរើកងទ័ពទៅដាក់នៅហ្ស៊កដានៅវិញ៕
Tag:
អឺរ៉ុប
អាល្លឺម៉ង់
G-20
© រក្សាសិទ្ធិដោយ thmeythmey.com