អន្តរជាតិ
ព្រោះរងសម្ពាធពីរដ្ឋបាល ត្រាំ UN ព្រមកាត់លុយទ្រទ្រង់ប្រតិបត្តិការរក្សាសន្តិភាពពិភពលោក
× ចុងក្រោយអង្គការសហប្រជាជាតិព្រមកាត់បន្ថយថវិកាសម្រាប់ប្រើប្រាស់ក្នុងប្រតិបត្តិការថែរក្សាសន្តិភាពពិភពលោក តាមការទាមទាររបស់ក្រុងវ៉ាស៊ីនតោនហើយ។ ថវិកាសម្រាប់គាំទ្រប្រតិបត្តិការរក្សាសន្តិភាពរបស់អង្គការសហប្រជាជាតិសម្រាប់ឆ្នាំក្រោយៗទៀត ថយចុះរហូតដល់ជិត ៦០០លានដុល្លារអាមេរិកឯណោះ។
បន្ទាប់ពីរងសម្ពាធពីរដ្ឋបាលលោក ដូណាល់ ត្រាំ មហាសន្និបាតអង្គការសហប្រជាជាតិបានឯកភាពកាត់បន្ថយថវិកាសម្រាប់ប្រតិបត្តិការថែរក្សាសន្តិភាពពិភពលោក។ ថវិកានេះនឹងត្រូវកាត់បន្ថយរហូតដល់ជិត ៦០០ លានដុល្លារអាមេរិកឯណោះចាប់ពីឆ្នាំក្រោយៗទៅ។
យោងតាមទីភ្នាក់ងារព័ត៌មាន AFP មន្ត្រីទូតដែលមិនបង្ហាញអត្តសញ្ញាណម្នាក់បានបញ្ជាក់ថា ក្រោមការចរចាគ្នា គណៈកម្មាធិការមហាសន្និបាតឯកភាពថា កញ្ចប់ថវិកាអង្គការសហប្រជាជាតិសម្រាប់គាំទ្រការថែរក្សាសន្តិភាពពិភពលោកចាប់ពីឆ្នាំក្រោយនឹងត្រូវបន្ថយមកត្រឹម ៧.៣ពាន់លានដុល្លាប៉ុណ្ណោះ ខណៈដែលថវិកាសម្រាប់ឆ្នាំនេះគឺ ៧,៨៧ ពាន់លានដុល្លារឯណោះ។
វាមានន័យថាថវិកានេះត្រូវបានកាត់បន្ថយរហូតដល់ ៧ភាគរយឯណោះ។ ថវិកាទាំងនេះគឺត្រូវបានប្រើប្រាស់ដើម្បីគាំទ្រប្រតិបត្តិការថែរក្សាសន្តិភាពចំនួន ១៦ ទូទាំងពិភពលោកចាប់ពី កោះស៊ីប (Cyprus) ទៅដល់ម៉ាលី និងដល់ជម្លោះកាស្មៀរថែមទៀត។
ក្រោយមានការសម្រេចកាត់បន្ថយថវិកានេះ ឯកអគ្គរដ្ឋទូតអាមេរិកអាមេរិកប្រចាំអង្គការសហប្រជាជាតិលោកស្រី Nikki Haley បានសរសេរបង្ហោះតាមគណនី Twitter របស់ខ្លួនដោយអួតអាងថាគ្រាន់តែក្នុងរយៈពេលខ្លីប៉ុណ្ណោះអាមេរិកអាចមានលទ្ធភាពកាត់បន្ថយលុយចំណាយរបស់អង្គការសហប្រជាជាជាតិរាប់រយលានដុល្លារ។
«គ្រាន់តែ ៥ខែប៉ុណ្ណោះដែលយើងនៅទីនេះ យើងបានកាត់បន្ថយថវិកាច្រើនជាង ៥០០លានដុល្លារអាមេរិកពីថវិកាថែរក្សាសន្តិភាពអង្គការសហប្រជាជាតិសរុប ហើយនេះត្រឹមតែជាការចាប់ផ្តើមប៉ុណ្ណោះ»។ លោកស្រី Nikki Haley បានសរសេរដូច្នេះ។
ហើយពេលបំភ្លឺក្នុងសភាអាមេរិកតាំងពីថ្ងៃអង្គារទី ២៧ មិថុនា លោកស្រី បានអះអាងផងដែរថា គ្រាន់តែអាមេរិកតែម្នាក់អាចសន្សំបានលុយ ១៥០ លានដុល្លារពីការកាត់បន្ថយលុយសម្រាប់ជួយប្រតិបត្តិការរក្សាសន្តិភាពរបស់អង្គការសហប្រជាជាតិនៅប្រទេសហៃទី។
យ៉ាងណាសម្តីរបស់លោកស្រីឯកអគ្គរដ្ឋទូតរូបនេះបានបង្កឲ្យមានប្រតិកម្មតបវិញខ្លាំងផងដែរ។ គេរិះគន់ទង្វើលោកស្រីព្រោះវាមិនមែនជារឿងដែលត្រូវសប្បាយចិត្តឡើយដែលមានការកាត់បន្ថយថវិកាសម្រាប់ថែរក្សាសន្តិភាពពិភពលោកឡើយ ព្រោះវាជាថវិកាដែលត្រូវប្រើប្រាស់សម្រាប់ទ្រទ្រង់ប្រទេសដែលរងគ្រោះដោយភ្លើងសង្គ្រាមជាពិសេសនៅអាហ្វ្រិក។
អង្គការឃ្លាំមើលសិទ្ធិមនុស្ស (HRW) បានព្រមានពីបញ្ហាដែលអាចកើតមានឡើងនៅពេលខាងមុខជាពិសេសផលប៉ះពាល់ចំពោះប្រជាជននៅតំបន់ជម្លោះនៅអាហ្វ្រិក។ ស្ថាប័ននេះហៅការសម្រេចចិត្តកាត់ថវិការក្សាសន្តិភាពនេះថាជារឿងមិនត្រឹមត្រូវទាល់តែសោះ ហើយវានឹងធ្វើឲ្យប្រជាជនស៊ូដង់ខាងត្បូងនាតំបន់ Darfur ដែលរងគ្រោះស្រាប់នោះកាន់តែស្ថិតក្នុងស្ថានភាពគ្រោះថ្នាក់ខ្លាំង។
១.ប្រមុខអង្គការសហប្រជាជាតិប្តេជ្ញាកែទម្រង់ស្ថាប័ននិងបង្កើនប្រសិទ្ធភាពការចំណាយ
សហរដ្ឋអាមេរិកជាសមាជិកដែលផ្តល់វិភាគទានដល់អង្គការសហប្រជាជាតិច្រើនជាងគេសម្រាប់ការដំណើរការជាប្រក្រតីរបស់អង្គការសហប្រជាជាតិចាប់ពីអង្គការនេះត្រូវបានបង្កើតឡើងមកនោះ។
យោងតាមសារព័ត៌មាន The Independent ក្រៅពីផ្តល់ថវិកាសម្រាប់គាំទ្រប្រតិបត្តិការរក្សាសន្តិភាព សហរដ្ឋអាមេរិកបង់វិភាគទានរហូតដល់ ២២ភាគរយនៃថវិកាសរុបដែលអង្គការសហប្រជាជាតិប្រើប្រាស់ដែលមានសរុប ៥,៤ពាន់លានដុល្លារ។
ប៉ុន្តែរដ្ឋបាលអាមេរិកស្ថិតក្រោមអាណត្តិប្រធានាធិបតី ដូណាល់ ត្រាំ មិនចង់ឃើញអាមេរិកចំណាយលុយច្រើនលើសលុបសម្រាប់អង្គការអន្តរជាតិរួមទាំងអង្គការសហប្រជាជាតិទេ ហើយរដ្ឋបាលលោកជឿជាក់ថាអង្គការសហប្រជាជាតិចាយលុយមិនត្រឹមត្រូវនិងមានប្រសិទ្ធភាព។
រដ្ឋបាល ត្រាំ បានស្នើឲ្យមានការកាត់បន្ថយលុយជំនួយដែលជួយទ្រទ្រង់អង្គការអន្តរជាតិរួមទាំងអង្គការសហប្រជាតិផងរហូតដល់ ៣១ ភាគរយឯណោះ។ រឿងដែលគួរឲ្យសោកស្តាយនោះគឺរដ្ឋបាលអាមេរិកផ្តោតសំខាន់លើកសាងកម្លាំងយោធាតែប៉ុណ្ណោះ។
ការស្នើកាត់បន្ថយថវិកានេះបានធ្វើឲ្យបណ្តាសមាជិកសភាអាមេរិកទាំងពីរបក្សព្រួយបារម្ភខ្លាំង។ បារម្ភដោយសារការកាត់លុយច្រើនសន្ធឹកសន្ធាប់នេះនឹងប៉ះពាល់គម្រោងសំខាន់ដែលរួមមានជំនួយមនុស្សធម៌និងអភិវឌ្ឍទាំងជួយទ្រង់ទ្រង់កុមារ និងស្ត្រីជាម្តាយតាមរយៈអង្គការ UNICEF ជាដើម។
«ការកាត់លុយជំនួយនេះគឺធំធេងណាស់ ហើយវាក៏ជារឿងគួរឲ្យសោកស្តាយដែរ។» នេះជាការលើកឡើងរបស់សមាជិកសភាបក្សសាធារណរដ្ឋលោកស្រី Kay Granger ក្នុងពេលបំភ្លឺនៅសភាថ្ងៃអង្គារ។
ចំណែកលោក Gerry Connolly សមាជិកសភាបក្សប្រជាធិបតេយ្យក៏បានបង្ហាញកង្វល់ចំពោះការកាត់លុយនេះដែរ ដោយលោកបញ្ជាក់ដូច្នេះថា៖«ប្រធានាធិបតីកំពុងបង្ហាញប្រាប់ថា យើងត្រូវការកសាងកម្លាំងយោធា ខណៈដែលអ្នកដែលត្រូវប្រឈមបញ្ហាគឺ ក្មេងតូចៗដែលកំពុងរងគ្រោះថ្នាក់ស្រាប់ព្រោះគ្មានអាហារបរិភោគនោះឬ?»។
ដោយសារឃើញបញ្ហាមិនស្រួល ប្រមុខអង្គការសហប្រជាជាតិលោក អែនតូនីញ៉ូ ហ្គូតេរ៉េស (Antonio Guterres) ត្រហេបត្រហបទៅក្រុងវ៉ាស៊ីនតោនដើម្បីជួបជាមួយបណ្តាសមាជិកសភាអាមេរិកសប្តាហ៍នេះ។ លោកចង់ឆ្លៀតឱកាសជួបពិភាក្សា និងស្នើសុំឲ្យសមាជិកសភាអាមេរិកជួយទប់ទល់សំណើររបស់រដ្ឋបាលលោក ត្រាំ ហើយលោកក៏បានសន្យាផងដែរថា លោកនឹងកែទម្រង់ស្ថាប័នលោកដើម្បីធានាពីការប្រើប្រាស់ថវិកាបានត្រឹមត្រូវ និងមានប្រសិទ្ធភាពខ្ពស់ផងដែរ៕
Tag:
អង្គការសហប្រជាជាតិ
ដូណាល់ ត្រាំ
Nikki Haley
© រក្សាសិទ្ធិដោយ thmeythmey.com