ចៀសវាងគ្រោះថ្នាក់ពេលធ្វើដំណើរផ្លូវឆ្ងាយ អ្នកបើកត្រូវអនុវត្តដូចម្តេចខ្លះ?

បទយកការណ៍ / បទសម្ភាសន៍

រថយន្ត

03, Jul 2017 , 7:00 pm

រូបភាព

ដោយ:

ភ្នំពេញ៖ មុនចេញដំណើរផ្លូវឆ្ងាយ ម្ចាស់យានយន្ត គួរតែពិនិត្យយានយន្តរបស់ខ្លួន ដើម្បីធានាថា យានជំនិះរបស់ខ្លួន មិនខូច ឬបង្កគ្រោះថ្នាក់នៅលើដងផ្លូវ។ អ្នកជំនាញផ្នែកចិត្តសាស្ត្រ បានណែនាំថា អ្នកបើកបរផ្លូវឆ្ងាយ គួរតែគេងឲ្យបានគ្រប់គ្រាន់មុនថ្ងៃចេញដំណើរ ញ៉ាំអាហារឲ្យមានកម្លាំង សម្រាកនៅតាមផ្លូវ ដោយញ៉ាំកាហ្វេ ឬចូលបន្ទប់ទឹក មុនបន្តដំណើរទៅមុខទៀត ដើម្បីបង្កើនការប្រុងប្រយ័ត្ននៅពេលបើកបរ។ ចំណែក ជាងជុសជុលម៉ូតូ និងឡាន បានណែនាំដល់អ្នកបើកបរឲ្យត្រួតពិនិត្យ មើលកង់ ហ្វ្រាំង ស៊ីញូ និងម៉ាស៊ីនយានយន្តជាដើម ដើម្បីកុំឲ្យមានបញ្ហានៅពាក់កណ្តាលផ្លូវ។

កន្លងមកគេសង្កេតឃើញថា គ្រោះថ្នាក់ចរាចរណ៍ជាច្រើនបានកើតឡើង ដោយសារតែភាពធ្វេសប្រហែលរបស់អ្នកបើកបរ។ ក្នុងនោះរួមមានយានយន្តរបូតកង់ បែកកង់ ដាច់ហ្វ្រាំង និងភាពរអាក់រអួលរបស់យានយន្តជាដើម។ លើសពីនេះអ្នកបើកបរមួយចំនួន បានបាត់បង់ស្មារតីក្នុងការបើកបរ បើកបរដោយងងុយគេង និងភាពធ្វេសប្រហែលជាច្រើនទៀត បានបង្កឲ្យមានគ្រោះថ្នាក់ចរាចរណ៍ ដោយសម្លាប់អ្នកបើកបរ អ្នករួមដំណើរ និងអ្នកដទៃទៀតនៅតាមដងផ្លូវ។

លោក ឆែម លីពៅ ជាងជួសជុលម៉ូតូនៅក្បែរសាលាសង្កាត់ទឹកថ្លា បានប្រាប់សារព័ត៌មានថ្មីៗថា មុនបើកបរផ្លូវឆ្ងាយ អ្នកជិះម៉ូតូ គួរតែត្រួតពិនិត្យលក្ខណៈបច្ចេកទេសទោចក្រយានយន្តរបស់ខ្លួន ឲ្យបានត្រឹមត្រូវជាមុនសិន។ លោកនិយាយថា៖«មុនចេញដំណើរ ត្រូវមើលកង់មុខកង់ក្រោយ ភ្លើងមុខ ស៊ីញូ ច្រវ៉ាក់មីញុង។ ជាពិសេស ត្រូវមើលសម្បកកង់មុខ ព្រោះ បើបែកតាមផ្លូវ វាងាយបង្កគ្រោះថ្នាក់»។

ជាងម៉ូតូអស់រយៈពេល១៥ឆ្នាំ និងមានស្រុកកំណើតនៅខេត្តក្រចេះរូបនេះ បានអះអាងថា លោកតែងតែជិះម៉ូតូទៅស្រុកកំណើតដោយប្រុងប្រយ័ត្នខ្ពស់ ឧស្សាហ៍ផ្លាស់ប្តូរសម្បកកង់ដែលសឹក ប្តូរប្រេងម៉ាស៊ីនញឹកញាប់ សាកល្បងស៊ីញូឆ្វេងស្តាំ និងបច្ចេកទេសជាច្រើនទៀត ដើម្បីធានាសុវត្ថិភាពក្នុងពេលបើកបរ។ លោកបន្ថែមថា ការឈប់សម្រាកតាមផ្លូវ ក៏ជួយម៉ាស៊ីនម៉ូតូបានច្រើនផងដែរ។

សូមស្តាប់ការពន្យល់របស់ ឆែម លីពៅ ខាងក្រោមនេះ៖

ដូចគ្នាដែរ លោក រិត វឌ្ឍនា ជាជាងជួសជុលរថយន្ត នៅម្តុំរង្វង់មូលផ្សារដើមថ្កូវ បានប្រាប់សារព័ត៌មានថ្មីៗថា មុនធ្វើដំណើរ អ្នកបើកបរ យកយានយន្តមកត្រួតពិនិត្យ មកយានដ្ឋាន ដែលមានអ្នកជំនាញផ្នែករថយន្តត្រួតពិនិត្យ ដើម្បីជួសជុលភ្លាមៗ ចៀសវាងការខូតខាតនៅតាមផ្លូវ ឬបង្កគ្រោះថ្នាក់។ វ័យ២២ឆ្នាំ និងមានស្រុកកំណើតនៅខេត្តកំពង់ចាម លោក វឌ្ឍនា បានបន្ថែមថា ការបើកបរផ្លូវឆ្ងាយ ម្ចាស់យានយន្ត គួរឈប់សម្រាកប្រហែល២០០គីឡូម៉ែត្រម្តង ដើម្បីត្រួតពិនិត្យម្តងទៀត និងឲ្យម៉ាស៊ីនត្រជាក់ មុនបន្តដំណើរទៅមុខទៀត។

សូមស្តាប់ការពន្យល់របស់ រិត វឌ្ឍនា និងជាងម្នាក់ទៀតនៅយានដ្ឋានជី.អេស ខាងក្រោមនេះ៖

លោក ឈឹម សុធារ៉ា វេជ្ជបណ្ឌិតឯកទេសចិត្តសាស្ត្រ បានប្រាប់សារព័ត៌មានថ្មីៗតាមសារអេឡិចត្រូនិកថា ការបើកបរផ្លូវឆ្ងាយ បានបង្កឲ្យមានគ្រោះថ្នាក់ជាច្រើននៅលើដងផ្លូវ ពីព្រោះពួកគេបានបាត់បង់ការប្រយ័ត្ននៅពេលបើកបរ។ លោកបន្តថា ការបាត់បង់បម្រុងប្រយ័ត្ន ក៏បណ្តាលមកពីអ្នកបើកបរមានជំងឺ ភាពតានតឹង ងងុយគេង ឃ្លាន និងអស់កម្លាំងជាដើម។
បណ្ឌិតចិត្តវិទ្យាមកពីអូស្ត្រាលីរូបនេះ សង្កត់ធ្ងន់ថា៖ «តាមបែបចិត្តសាស្ត្រ កូនក្មេងមានបម្រុងប្រយ័ត្នចំនួន៨នាទី មនុស្សពេញវ័យមានបម្រុងប្រយ័ត្ន២០នាទី បើសម្រាប់ការរៀន ឬអង្គុយស្តាប់ក្នុងបន្ទប់ គឺមនុស្សពេញវ័យមានបម្រុងប្រយ័ត្ន៤៥នាទី»។

ប្រធានអង្គការកម្មវិធីសុខភាពផ្លូវចិត្ត(TPO) រូបនេះ បានអត្ថាធិប្បាយថា កង្វះបម្រុងប្រយ័ត្ន បានកើតឡើងបណ្តាលមកពីការថមថយកម្លាំង ឃ្លាន ធុញ និងមានជំងឺជាដើម។   យ៉ាងណាលោកអះអាងថា អ្នកបើកបរផ្លូវឆ្ងាយដែលមានបទពិសោធច្រើន ពួកគេក៏មានបម្រុងប្រយ័ត្នបានយូរផងដែរ។

លោកណែនាំដល់អ្នកបើកបរផ្លូវឆ្ងាយទាំងឡាយ គួរតែសម្រាក ឬគេងឲ្យបានគ្រប់គ្រាន់ មុនថ្ងៃចេញដំណើរ។ លើសពីនេះ អ្នកបើកបរគួរតែឈប់នៅកំណាត់ផ្លូវណាមួយ ដើម្បីចូលបន្ទប់ទឹក ឬផឹកកាហ្វេ និងសម្រាកមុនបន្តដំណើរទៅមុនទៀត។ ការធ្វើបែបនេះ ជាការប្រយ័ត្នប្រយែងក្នុងពេលបើកបរ ចៀសវាងការបើកបរដោយបង្ខំ និងខ្វះការប្រុងប្រយ័ត្ន ដែលជាហេតុបង្កគ្រោះថ្នាក់ដល់ខ្លួន និងគ្រួសារ ព្រមទាំង     បណ្តាលឲ្យប៉ះពាល់ដល់ជីវិតអ្នកដទៃផងដែរ៕