អន្តរជាតិ
នុយក្លេអ៊ែរកូរ៉េខាងជើង៖ អាមេរិកចង់ដាក់ទណ្ឌកម្មបន្ថែម ហើយបើចាំបាច់ប្រើទ័ព តែរុស្ស៊ីជំទាស់ អគ្គរដ្ឋទូតអាមេរិកប្រចាំអង្គការសហប្រជាជាតិ Nikki Haley និងអគ្គរដ្ឋទូតរុស្ស៊ី Vladimir Safronkov
× តំណាងរុស្ស៊ីប្រចាំអង្គការសហប្រជាតិ បានជំទាស់គំនិតរបស់អាមេរិកដែលចង់ដាក់ទណ្ឌកម្មថ្មីទៀតលើកូរ៉េខាងជើង ក្រោយការបាញ់មីស៊ីលអន្តរទ្វីបនៅថ្ងៃទី៤ ខែកក្កដា។ រុស្ស៊ីចាត់ទុកសំណើរបស់អាមេរិក ជារឿងមិនត្រឹមត្រូវ និងបានរិះគន់ការលើកឡើងថាអាមេរិកអាចប្រើទ័ពដោះស្រាយបញ្ហាទៅទៀត។ ជំនួសមកវិញ រុស្ស៊ីបានស្នើឲ្យអន្តរជាតិពិចារណាគំនិតផ្ដួចផ្ដើមរបស់ខ្លួន និងចិន ដែលមានគោលដៅដោះស្រាយវិបត្តិនៅឧបទ្វីបកូរ៉េតាមផ្លូវសន្តិភាព។
ក្រុមប្រឹក្សាសន្តិសុខអង្គការសហប្រជាជាតិបានកោះប្រជុំនៅថ្ងៃទី៥ ខែកក្កដា ដើម្បីដោះស្រាយបញ្ហានុយក្លេអ៊ែរកូរ៉េខាងជើង ដែលចេះតែសាកល្បងមីស៊ីលផ្គើនអន្តរជាតិរហូតមក។ កិច្ចប្រជុំមិនអាចទាន់រកដំណោះស្រាយអ្វីបានឡើយ ខណៈដែលរុស្ស៊ី និងអាមេរិក មិនមានជំហរដូចគ្នាឡើយ។ អាមេរិកចង់ប្រើធម៌ក្ដៅដាក់កូរ៉េខាងជើងដូចជាការដាក់ទណ្ឌកម្មបន្ថែម និងបានគំរាមប្រើកម្លាំងយោធាទៀត តែរុស្ស៊ីប្រកាន់ជំហរត្រជាក់ជាងអាមេរិក។
ប្រេសិតអាមេរិកប្រចាំអង្គការសហប្រជាជាតិ Nikki Haley បានចាត់ទុកសកម្មភាពរបស់កូរ៉េខាងជើង ជារឿងគ្រោះថ្នាក់ ព្រហើន និងមិនមានការទទួលខុសត្រូវអ្វីសោះ។ លោកស្រី ក៏បានស្នើឲ្យក្រុមប្រឹក្សាសន្តិសុខបន្ថែមសម្ពាធថ្មីលើកូរ៉េខាងជើង ខណៈប្រកាសដែរថាអាមេរិកចាត់វិធានការចាំបាច់រាប់ទាំងការប្រើប្រាស់យោធាផងដើម្បីទប់ទល់កូរ៉េខាងជើង ក៏ដូចជាការពារសម្ព័ន្ធមិត្តរបស់ខ្លួន។ លោកស្រីក៏រិះគន់រុស្ស៊ី និងចិនដែលខ្វល់ខ្វាយបញ្ហានេះ ហើយទុកឲ្យកូរ៉េខាងជើងធ្វើផ្គរធ្វើភ្លៀងតាមចិត្ត។
ដល់វេនរបស់ខ្លួន អគ្គរដ្ឋទូតរងរុស្ស៊ីប្រចាំអង្គការសហប្រជាជាតិ Vladimir Safronkov ក៏បានជំទាស់សំណើរបស់អាមេរិកជាចំហ និងទាត់ចោលបំណងដាក់ទណ្ឌកម្មថ្មីលើកូរ៉េខាងជើង។ លោកនិយាយថា ទណ្ឌកម្ម មិនអាចដោះស្រាយគ្រប់បញ្ហាឡើយ ហើយប្រវត្តិសាស្ត្របានក៏បញ្ជាក់អស់ហើយ។ លោក Safronkov ចង់សំដៅដល់ការដាក់ទណ្ឌកម្មលើកមុនៗដែលផ្ដើមគំនិតដោយអាមេរិក ប៉ុន្តែនៅតែមិនអាចធ្វើអ្វីកូរ៉េខាងជើងបានដដែល។
ទន្ទឹមនឹងការចាត់ទុកទង្វើរបស់កូរ៉េខាងជើងជារឿងមិនអាចទទួលយកបាន តំណាងរុស្ស៊ីក៏បានលើកឡើងពីការទាមទាររបស់ខ្លួនឲ្យកូរ៉េខាងជើងវិលត្រឡប់ចូលតុចរចាវិញ និងគោរពតាមសេចក្ដីសម្រេចរបស់ក្រុមប្រឹក្សាសន្តិសុខ។ ប៉ុន្តែរុស្ស៊ីក៏គំរាមពីផលប៉ះពាល់នៃការប្រើប្រាស់កម្លាំងទ័ពប្រឆាំងកូរ៉េខាងជើងដែរ ព្រោះវាប៉ះពាល់ខ្លាំងដល់សន្តិសុខតំបន់ និងពិភពលោកទាំងមូល មិនតែអាមេរិក ឬកូរ៉េខាងត្បូងនោះឡើយ។
ដោយជំទាស់សំណើអាមេរិក លោក Safronkov ក៏បានស្នើឲ្យសមាជិកក្រុមប្រឹក្សាសន្តិសុខពិចារណាគំនិតផ្ដួចផ្ដើមរបស់រុស្ស៊ី និងចិន សម្រាប់បញ្ចប់បញ្ហានៅឧបទ្វីបកូរ៉េ។ ដំណោះស្រាយរួមគ្នារបស់មហាអំណាចទាំងពីរដែលឯកភាពគ្នានោះ គឺការដោះស្រាយបញ្ហាកូរ៉េខាងជើងជាជំហានៗរបស់រុស្ស៊ី និងជំហររបស់ចិនក្នុងការផ្អាកព្រមគ្នានៃកម្មវិធីនុយក្លេអ៊ែរកូរ៉េខាងជើង និងសមយុទ្ធរួមគ្នាអាមេរិក-កូរ៉េខាងត្បូង៕
Tag:
អាមេរិក
រុស្ស៊ី
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com