អន្តរជាតិ
អូស្ត្រាលីប្រាប់កូរ៉េខាងជើង «កុំចង់សាកល្បងការអត់ធ្មត់របស់អាមេរិក» ឧបនាយករដ្ឋមន្ត្រីអូស្ត្រាលី Barnaby Joyce (រូបភាព ABC)
× ឧបនាយករដ្ឋមន្ត្រីអូស្ត្រាលី លោក Barnaby Joyce បានព្រមានកូរ៉េខាងជើងថា ក្រុងកង់បេរ៉ានឹងចាត់វិធានការយោធាប្រឆាំងកូរ៉េខាងជើង បើហ៊ានបាញ់មីស៊ីលដាក់អាមេរិកនោះ។ ការព្រមាននេះធ្វើឡើង ក្រោយកូរ៉េខាងជើងសាកល្បងមីស៊ីលអន្តរទ្វីបដែលអាចបាញ់ដល់អាមេរិក។ អូស្ត្រាលី ដែលជាសម្ព័ន្ធមិត្តជិតស្និទ្ធរបស់អាមេរិកនៅតំបន់ប៉ាស៊ីហ្វិក បានប្រាប់ឲ្យកូរ៉េខាងជើងកុំធ្វើអ្វីហួសហេតុព្រោះអាមេរិក និងសម្ព័ន្ធមិត្តមិនរារែកនឹងឆ្លើយតបរាល់សកម្មភាពមិនសមគួរណាមួយនោះឡើយ។
«ប្រទេសណាក៏ដោយមិនគួរធ្វើអ្វីហួសហេតុដើម្បីសាកល្បងការអត់ធ្មត់របស់អាមេរិកឡើយ»។ នេះជាពាក្យសម្ដីព្រមានរបស់មន្ត្រីជាន់ខ្ពស់រដ្ឋាភិបាលអូស្ត្រាលី Barnaby Joyce សម្រាប់កូរ៉េខាងជើង ដែលទទួលជោគជ័យក្នុងការបាញ់សាកល្បងមីស៊ីលរយៈចម្ងាយឆ្ងាយនៅថ្ងៃទី៤ ខែកក្កដា ដែលនេះក៏មានន័យថាកូរ៉េខាងជើងមានសមត្ថភាពបាញ់គោលដៅទាំងឡាយនៅលើទឹកអាមេរិកបាន។ លោក Joyce បានប្រាប់កូរ៉េខាងជើងមិនត្រូវបានបាញ់ដាក់អាមេរិកឡើយ ព្រោះអូស្ត្រាលីក៏មិននៅស្ងៀមដែរ។
លោក Joyce ដែលជាឧបនាយករដ្ឋមន្ត្រីអូស្ត្រាលីបានប្រាប់សារព័ត៌មាន Sky News ក្នុងកិច្ចសម្ភាសមួយថា ប្រសិនកូរ៉េខាងជើងបាញ់មីស៊ីលដាក់អាមេរិក នោះកងទ័ពសម្ព័ន្ធមិត្តអូស្ត្រាលី-នូវែលសេឡង់ នឹងចូលជួយអាមេរិកមិនខាន។ ចំណែកឯការឆ្លើយតបវិញយ៉ាងនោះ លោក Joyce បញ្ជាក់ថា បើកូរ៉េខាងជើងទម្លាក់គ្រាប់នុយក្លេអ៊ែរ ការតបតក៏ច្បាស់ជានុយក្លេអ៊ែរវិញដែរ។
ជាមួយគ្នានោះ ក្រុងកង់បេរ៉ា ក៏បានគាំទ្រជំហររបស់អាមេរិក ដែលចង់ដាក់ទណ្ឌកម្មលើប្រទេសដែលបន្តរកស៊ីជាមួយកូរ៉េខាងជើង។ នៅថ្ងៃទី៦ ខែកក្កដា លោក Joyce បានប្រាប់វិទ្យុក្នុងស្រុកថា អូស្ត្រាលីមិនគាំទ្រប្រទេសដែលជួយ និងសមគំនិតជាមួយកូរ៉េខាងជើងបានឡើយ ហើយចិនដែលជាអ្នកជិតខាង និងជាដៃគូពាណិជ្ជកម្មធំជាងគេរបស់កូរ៉េខាងជើង ពិតជាមានឥទ្ធិពលខ្លាំងក្នុងការដោះស្រាយវិបត្តិនេះ។
តាមពិតទៅ រដ្ឋបាលប្រធានាធិបតីអាមេរិក ដូណាល់ ត្រាំ ក៏បានដាក់សម្ពាធខ្លាំងលើចិនឲ្យជួយបញ្ឈប់មហិច្ឆតានុយក្លេអ៊ែរកូរ៉េខាងជើង តែគេមិនឃើញលេចចេញលទ្ធផលផ្លែផ្កាអ្វីសោះ ដោយចិនហាក់មិនអើពើនឹងការអំពាវនាវរបស់អាមេរិកឡើយ។ បន្ទាប់ពីកូរ៉េខាងជើងបាញ់មីស៊ីលនៅថ្ងៃទី៤ ខែកក្កដា លោក ត្រាំ បានបង្ហោះសារមួយលើ Twitter ដែលបង្ហាញពីការកើនឡើងទំនាក់ទំនងពាណិជ្ជកម្មទ្វេភាគីចិន និងកូរ៉េខាងជើង ដែលផ្ទុយស្រឡះពីការចង់បានរបស់អាមេរិក។
ថ្មីៗនេះ ប្រធានាធិបតី ត្រាំ ក៏បានផ្ញើសាររំឭកូរ៉េខាងជើងឲ្យប្រុងប្រយ័ត្នទង្វើរបស់ខ្លួន ព្រោះអាមេរិកបានអស់ភាពអំណត់ទៅហើយ។ ដោយគំរាមប្រើកម្លាំងយោធាដើម្បីដោះស្រាយបញ្ហា លោក ត្រាំ បាននិយាយពីប៉ូឡូញថា ក្រុងព្យុងយ៉ាងនឹងប្រឈមមុខវិបត្តិដ៏ធ្ងន់ធ្ងរ ដោយសារតែសកម្មភាពមិនល្អរបស់ខ្លួនក្នុងការសាកល្បងមីស៊ីលមិនឈប់ឈរ។ ប៉ុន្តែជំហរប្រើកម្លាំងរបស់អាមេរិក ត្រូវជំទាស់ដោយរុស្ស៊ី និងចិន ដោយប្រទេសទាំងពីរចង់ដោះស្រាយតាមផ្លូវត្រជាក់វិញ៕
Tag:
អូស្ត្រាលី
កូរ៉េខាងជើង
អាមេរិក
Barnaby Joyce
© រក្សាសិទ្ធិដោយ thmeythmey.com