លោកយាយ Deridre Larkin ជនជាតិអាហ្វ្រិកខាងត្បូង បានបង្ហាញថា អាយុគ្រាន់តែជាតួលេខប៉ុណ្ណោះ។ អតីតអ្នកលេងព្យាណូដែលនឹងប្រារព្ធខួប៨៦ឆ្នាំ នាខែកញ្ញា ខាងមុខ គឺជាអ្នករត់ប្រណាំងដ៏អស្ចារ្យម្នាក់ ជាពិសេសលើវិញ្ញាសាពាក់កណ្តាលម៉ារ៉ាតុន។
ក្នុងវ័យ៨៥ឆ្នាំ លោកយាយ Deridre Larkin ដែលរស់នៅក្រុង Johannesburg ប្រទេសអាហ្វ្រិកខាងត្បូង តែងតែហ្វឹកហាត់ការរត់ជារៀងរាល់ព្រឹក ជាពិសេសលើចង្វាយផ្លូវ៨គីឡូម៉ែត្រ។ បើតាមការផ្សាយរបស់ AFP គាត់ទើបតែចាប់ផ្តើមប្រឡូកលើកីឡាប្រភេទនេះ ក្រោយចូលនិវត្តន៍ពីការលេងព្យាណូនៅតាមមហោស្រពប្រគំតន្ត្រី។
«មុនឈានដល់វ័យ៧៨ឆ្នាំ ខ្ញុំធ្លាប់បានរត់នៅតាមសាលារៀន ប៉ុន្តែពេលនោះខ្ញុំធ្វើមិនសូវបានល្អឡើ យ »។ នេះជាការលើកឡើងទៅកាន់ AFP របស់លោកយាយ Larkin ដែលឈរពីមុខជញ្ជាំងភ្ជាប់ដោយមេ ដាយប្រមាណ៥០០ ដែលគាត់ទទួលបានពីការចូលរួមរត់ប្រណាំង។
ដើមកំណើតនៅអង់គ្លេស លោកយាយ Larkin បានទៅរស់នៅអាហ្វ្រិកខាងត្បូងចាប់តាំងពីឆ្នាំ១៩៧០មក។ កាលពីឆ្នាំមុន លោកយាយបានចូលរួមប្រកួតរហូតដល់៦៥ព្រឹត្តិការណ៍រត់ប្រណាំងដែលក្នុងនោះមានវិញ្ញាសាពាក់កណ្តាលម៉ារ៉ាតុនផងដែរ។
លើវិញ្ញាសាពាក់កណ្តាលម៉ារ៉ាតុនចម្ងាយ២១គីឡូម៉ែត្រ លោកយាយ Larkin ប្រើថិរវេលាប្រមាណជាង២ម៉ោង ហើយក៏ធ្លាប់ទទួលបានកំណត់ត្រាលើពិភពលោកក្នុងចំណោមអ្នករត់ប្រណាំងដែលមានអាយុប្រហាក់ប្រហែលគ្នាផងដែរ។
លោកយាយ Lakrin ដែលទើបបញ្ចប់ការរត់ចម្ងាយ១០គីឡូម៉ែត្រនៅក្រុង Pretoria កាលពីពេលថ្មីៗកន្លងមកនេះ បានអះអាងថា លោកយាយពិតជាមានការសប្បាយរីករាយនៅរាល់ការប្រកួត ជាពិសេសទទួលបានការស្វាគមន៍ពីមនុស្សនានា។
កាលពីអំឡុងឆ្នាំ២០០០ លោកយាយត្រូវបានរកឃើញថា មានជំងឺពុកឆ្អឹង ដោយមិនអាចព្យាបាលដោយថ្នាំពេទ្យ ឬចាក់ថ្នាំនោះឡើយ។ នៅឆ្នាំ២០១០ កូនម្នាក់ក្នុងចំណោមកូន៤នាក់របស់គាត់ បានយកគាត់ទៅរស់ជាមួយខ្លួននៅតំបន់ Randburg ជាយក្រុង Jonannesburg។ នៅទីនោះហើយ ដែលលោកយាយបានចាប់ផ្តើមអនុវត្តការរត់ចម្ងាយ តាមកូនប្រុសរបស់ខ្លួន។
៧ឆ្នាំចុងក្រោយនេះ លោកយាយមានសុខភាពកាន់តែប្រសើរឡើង។ កាលពីខែឧសភាកន្លងទៅ គាត់ត្រូវបានអញ្ជើញទៅចូលរួមរត់ពាក់កណ្តាលម៉ារ៉ាតុននៅក្រុងហ្សឺណែវ ប្រទេសស្វីស ដោយនៅពេលនោះគាត់សម្រេចបានកំណត់ត្រាថ្មី ជាមួយថិរវេលា២ម៉ោង និង៥នាទី។
ទោះបីជាឈានចូលដល់វ័យ៨៦ឆ្នាំ នាខែកញ្ញា ខាងមុខនេះ ក៏ដោយ តែលោកយាយ Larkin មិនមានបំណងរាថយនោះឡើយ។ គាត់បានអះអាងប្រាប់ AFP ថា៖ «ជីវិតដោយគ្មានការរត់ ដូចជាឈានទៅរកសេចក្តីស្លាប់បន្តិចម្តងៗ ។ ខ្ញុំនឹងបន្តការរត់តាមដែលអាចធ្វើទៅបាន ទោះបីជាមានជើងតែម្ខាងក៏ដោយ»។
ក្បួនថែទាំសុខភាពរបស់លោកយាយ Larkin គឺការពិសារគ្មានជាតិស្ករ អំបិល ឬកាហ្វេ ហើយចាប់ផ្តើមក្រោកហ្វឹកហាត់យ៉ាងទៀងទាត់ពីម៉ោង៥ព្រឹក៕