អន្តរជាតិ
លោកស្រី យីងឡាក់ ប្រកាសមិនរត់ចោលស្រុក និងទទួលរាល់ការសម្រេចរបស់តុលាការ អតីតនាយករដ្ឋមន្ត្រីថៃ យីងឡាក់ ស៊ីណាវ៉ាត់ ពេលចូលបំភ្លឺនៅតុលាការ (រូបភាព EPA)
× អតីតនាយករដ្ឋមន្ត្រីស្ត្រីទីមួយរបស់ថៃ លោកស្រី យីងឡាក់ ស៊ីណាវ៉ាត់ ដែលកំពុងជាប់បណ្ដឹងនៅតុលាការរឿងទិញស្រូវពីកសិករ បានប្រកាសជាចំហថា លោកស្រី នឹងមិនចាកចេញពីប្រទេសឡើយ ហើយលោកស្រីក៏សុខចិត្តទទួលរាល់ការសម្រេចចិត្តទាំងអស់របស់តុលាការលើលោកស្រី។ ក្នុងកិច្ចសម្ភាសជាមួយកាសែតបាងកកប៉ុស្តិ៍ លោកស្រី យីងឡាក់ បញ្ជាក់ច្បាស់ថា លោកស្រីនឹងមិនទៅណាឡើយ ហើយបន្តការពារភាពបរិសុទ្ធរហូតដល់ទីបញ្ចប់។
លោកស្រី យីងឡាក់ ស៊ីណាវ៉ាត់ នឹងមានឱកាសចុងក្រោយដើម្បីការពារខ្លួនពីការចោទប្រកាន់ជុំវិញភាពមិនប្រក្រតីក្នុងកម្មវិធីទិញអង្ករតម្លៃថោកពីកសិករដែលធ្វើឲ្យរដ្ឋខាតបង់លុយរាប់លានដុល្លារ។ នៅថ្ងៃទី២១ ខែកក្កដា តុលាការថៃនឹងបើកសវនាការចុងក្រោយសម្រាប់សាកសួរសាក្សីរបស់លោកស្រី យីងឡាក់ មុននឹងបន្តបើកសវនាការសម្រាប់ភាគីទាំងសងខាងក្នុងសំណុំរឿងនេះប្រកាសសេចក្ដីថ្លែងការណ៍រៀងៗខ្លួនចុងក្រោយ។ ការប្រកាសដីកាអាចធ្វើឡើងនៅខែកញ្ញាខាងមុខ។
បើរកឃើញកំហុស លោកស្រី យីងឡាក់ នឹងត្រូវជាប់ពន្ធនាគារដល់ទៅ១០ឆ្នាំ ហើយអាចត្រូវចាប់ខ្លួនបញ្ជូនទៅកាន់ពន្ធនាគារភ្លាមៗតែម្ដង។ យ៉ាងណាក្ដី អតីតនាយករដ្ឋមន្ត្រីថៃរូបនេះបាននិយាយថា លោកស្រី នឹងមិនរត់ទៅក្រៅប្រទេសឡើយ ហើយបន្តជម្នះឧបសគ្គនេះដល់ដំណាក់កាលចុងក្រោយ។ លោកស្រី យីងឡាក់ បានប្រាប់កាសែតបាងកកប៉ុស្តិ៍ថា លោកស្រីនឹងបង្ហាញខ្លួននៅតុលាការតាមកាលកំណត់។
ការប្រកាសរបស់លោកស្រីខាងលើ ធ្វើឡើងក្រោយមានការលើកឡើងថាលោកស្រីអាចធ្វើតាមបងប្រុសរបស់ខ្លួន គឺអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ដែលបានចាកចេញពីប្រទេស មុនពេលតុលាការប្រកាសដាក់ទោសពីរឆ្នាំ។ ជាមួយនឹងទឹកមុខក្រៀមក្រំ លោកស្រី យីងឡាក់ បញ្ជាក់ថា លោកស្រីនឹងប្រឈមមុខចំពោះអ្វីដែលនឹងកើតឡើង និងជឿជាក់ថាសាក្សីចុងចោទនឹងបង្ហាញពីភាពបរិសុទ្ធរបស់លោកស្រី។
ក្រៅពីកំពុងការពារខ្លួនរឿងក្ដីក្ដាំនៅតុលាការ អតីតនាយករដ្ឋមន្ត្រីថៃរូបនេះ ក៏ត្រូវតស៊ូករណីមួយទៀត គឺការរឹបអូសទ្រព្យសម្បត្តិរបស់លោកស្រីធ្វើជាសំណងនៃការខាតបង់ក្នុងការកម្មវិធីទិញស្រូវរបស់រដ្ឋាភិបាលលោកស្រី។ រដ្ឋាភិបាលយោធាបានចេញបញ្ជារដ្ឋបាលមួយ បង្គាប់ឲ្យលោកស្រីសងប្រាក់ជិតមួយពាន់លានដុល្លារ ដើម្បីចេញថ្លៃខូចខាតចូលឃ្លាំងរដ្ឋវិញ។ ប៉ុន្តែលោកស្រីចង់ឲ្យករណីនៅតុលការចប់សិន មុននឹងចាប់់ផ្ដើមនិយាយរឿងសំណងនេះ។
ការចេញចំណាត់ការបន្ទាន់របស់របបយោធាថៃ ត្រូវបានលោកស្រី យីងឡាក់ ចាត់ទុកជារឿងអយុត្តិធម៌ ហើយលោកស្រីក៏បានចេញប្ដឹងទៅកាន់តុលាការរដ្ឋបាលដើម្បីផ្អាកការអនុវត្តបញ្ជាខាងលើនេះសិនដែរ។ ជាមួយការសម្រេចបន្តប្រយុទ្ធក្នុងស្រុក គេរំពឹងថា ប្រជាប្រិយភាពលោកស្រី នឹងកើនឡើងខ្លាំង ហើយអាចឈានដល់ការទទួលជ័យជម្នះក្នុងការបោះឆ្នោតទៀតផង ពេលលោកស្រីអនុវត្តទោសរួចរាល់នោះ៕
Tag:
ថៃ
យីងឡាក់ ស៊ីណាវ៉ាត់
© រក្សាសិទ្ធិដោយ thmeythmey.com