វិបត្តិឧបទ្វីបកូរ៉េ៖ ចិននិយាយថាខ្លួនខំពន្លត់ភ្លើង ឯអាមេរិកប្រឹងចាក់សាំងថែម

អន្តរជាតិ

វិបត្តិឧបទ្វីបកូរ៉េ៖ ចិននិយាយថាខ្លួនខំពន្លត់ភ្លើង ឯអាមេរិកប្រឹងចាក់សាំងថែម

12, Jul 2017 , 10:56 am

រូបភាព

អ្នកនាំពាក្យក្រសួងការបរទេសចិន Geng Shuang ក្នុងសន្និសីទកាសែតថ្ងៃទី១១ ខែកក្កដា (រូបភាពក្រសួងការបរទេសចិន)

ដោយ: តន ចាន់រិទ្ធារ៉ា

ចិនមិនសប្បាយចិត្តចំពោះពាក្យដដែលៗរបស់ប្រទេសដទៃ ជាពិសេសអាមេរិកដែលបានស្នើឲ្យចិនជួយដោះស្រាយវិបត្តិនុយក្លេអ៊ែរកូរ៉េខាងជើងឡើយ។ ចិនអះអាងថា ការដោះស្រាយវិបត្តិកូរ៉េខាងជើង មិនមែនជាការទទួលខុសត្រូវតែមុខរបស់ខ្លួនឡើយ តែជាបញ្ហារួមដែលតម្រូវឲ្យភាគីពាក់ព័ន្ធសហការគ្នាដោះស្រាយបញ្ហានេះតាមផ្លូវសន្តិវិធី។ ចិនក៏បន្ទោសអាមេរិកដែលមិនបានធ្វើអ្វី ហើយបែរជាបង្កបញ្ហាឲ្យកាន់តែតានតឹងទៅវិញ។

ពាក្យសម្ដីដដែលៗរបស់ប្រធានាធិបតី ដូណាល់ ត្រាំ ដែលទទូចឲ្យចិនដាក់សម្ពាធលើកូរ៉េខាងជើង កំពុងធ្វើឲ្យចិនធុញទ្រាន់ខ្លាំង។ ជារឿងមិនធម្មតាមិនធ្លាប់មាន នៅថ្ងៃទី១១ ខែកក្កដា ក្រុងប៉េកាំងបានប្រកាសថាខ្លួនបោះបង់គំនិតទទួលខុសត្រូវរបស់ខ្លួនចំពោះបញ្ហាកូរ៉េខាងជើងទៀតហើយ និងបានទាមទារឲ្យប្រទេសផ្សេងចូលរួមដោះស្រាយបញ្ហានេះ។ ចិននិយាយច្បាស់ៗថា ដំណោះស្រាយបញ្ហានេះមិនមែនស្ថិតក្នុងដៃរបស់ខ្លួនឡើយ។

នេះជាការលើកឡើងរបស់លោក Geng Shuang អ្នកនាំពាក្យក្រសួងការបរទេសចិនក្នុងសន្និសីទកាសែតប្រចាំថ្ងៃទី១១ ខែកក្កដា។ ការលើកឡើងនេះ ជាសារឆ្លើយតបប្រធានាធិបតី ដូណាល់ ត្រាំ ដែលតែងប្រើបណ្ដាញ Twitter របស់លោក ដើម្បីទទូចម្ដងហើយម្ដងទៀតឲ្យចិនជួយដោះស្រាយបញ្ហាកូរ៉េខាងជើង តាមរយៈការប្រើប្រាស់ទំនាក់ទំនងសេដ្ឋកិច្ច និងការទូត។ លោក ត្រាំ និយាយថា ចិនជួយមិនទាន់គ្រប់គ្រាន់ឡើយចំពោះរឿងនេះ។

លោក ត្រាំ បានលើករឿងកូរ៉េខាងជើងនេះម្ដងទៀត ពេលជួបជាមួយលោក ស៊ី នៅអាល្លឺម៉ង់ ប៉ុន្តែបានប្រើពាក្យសម្ដីទន់ភ្លន់ជាងមុនក្នុងការទាមទារឲ្យចិនធ្វើតាមការចង់បានរបស់អាមេរិក។ កន្លងមក លោក ត្រាំ តែងយកបញ្ហាពាណិជ្ជកម្មដើម្បីគំរាមចិនឲ្យបញ្ចប់វិបត្តិនៅឧបទ្វីបកូរ៉េ។ ដូចដឹងស្រាប់ អាមេរិក និងជប៉ុនជាដើមតែងចង្អុលមុខចិន ពេលកូរ៉េខាងជើងបាញ់មីស៊ីល ឬសាកល្បងនុយក្លេអ៊ែរ ដោយយកលេសថាចិនជាបងធំរបស់កូរ៉េខាងជើង។

យ៉ាងណាមិញ ក្រុងប៉េកាំង ក៏តែងតែអះអាងថាខ្លួនប្រឹងអនុវត្តតាមសេចក្ដីសម្រេចក្រុមប្រឹក្សាសន្តិសុខ និងបានប្រកាន់ជំហរដោះស្រាយតាមការចរចា និងបញ្ឈប់សកម្មភាពរករឿងគ្នាទៅវិញទៅមក។ លោក Geng Shuang បានចោទសួរវិញថា៖ «ពេលចិនប្រឹងពន្លត់ភ្លើង អនុវត្តតាមក្រុមប្រឹក្សាសន្តិសុខដើម្បីដោះស្រាយបញ្ហាកូរ៉េខាងជើង អ្នកផ្សេងប្រឹងចាក់សាំងថែម ហើយបង្កគ្រោះថ្នាក់ដល់សន្តិសុខចិនទៀត បើអ៊ីចឹងឲ្យចិនជួយយ៉ាងម៉េចទៀត?»

សម្ដីមិនពេញចិត្តខាងលើ គឺសំដៅដល់សមយុទ្ធរួមគ្នារវាងអាមេរិក និងកូរ៉េខាងត្បូងទាំងជើងគោក ជើងទឹក ជើងអាកាស ហើយពេលខ្លះមានសមយុទ្ធមីស៊ីលទៅទៀត។ មិនទាន់អស់ឡើយ ចិនរឹតតែខឹងខ្លាំងនឹងការពង្រាយប្រព័ន្ធការពារមីស៊ីល (THAAD) នៅកូរ៉េខាងត្បូង ទោះជាចិនជំទាស់ក៏ដោយ។ បញ្ហាទាំងនេះហើយដែលធ្វើឲ្យកូរ៉េខាងជើងមិនសប្បាយចិត្តដូចចិនដែរ រួចបង្កបញ្ហាផ្គើនត្រឡប់វិញ ដែលធ្វើឲ្យឧបទ្វីបកូរ៉េទាំងមូលស្ថិតក្នុងស្ថានភាពរង្គោះរង្គើ៕