ត្រាំ ថា ពូទីនទំនងសប្បាយជាងឥឡូវនេះ បើ គ្លីនតុន ឈ្នះឆ្នោត

អន្តរជាតិ

ត្រាំ ថា ពូទីនទំនងសប្បាយជាងឥឡូវនេះ បើ គ្លីនតុន ឈ្នះឆ្នោត

13, Jul 2017 , 11:47 am

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក លោក ដូណាល់ ត្រាំ បាននិយាយក្នុងកិច្ចសម្ភាសមួយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន អាចរីករាយជាងពេលសព្វថ្ងៃ បើប្រធានាធិបតីអាមេរិកមិនមែនជាលោក តែជាលោកស្រី ហ៊ីឡារី គ្លីនតុន វិញនោះ។ លោក ត្រាំ អះអាងថា គោលនយោបាយរបស់លោកបង្កផលប៉ះពាល់ដល់ផលប្រយោជន៍របស់រុស្ស៊ី តែនយោបាយរបស់លោកស្រី គ្លីនតុន គឺទន់ភ្លន់ដាក់រុស្ស៊ី ហើយនេះជាអ្វីដែលរុស្ស៊ីចង់បាន។

មើលពីខាងក្រៅ ទំនាក់ទំនងរវាងលោក ដូណាល់ ត្រាំ និងលោក វ្ល៉ាឌីមៀ ល្អូកល្អឺនណាស់ ប៉ុន្តែមើលឲ្យកាន់តែច្បាស់លាស់វិញ ទំនាក់ទំនងនេះមិនល្អដូចខាងក្រៅ។ ប្រធានាធិបតីអាមេរិក ដូណាល់ ត្រាំ បានបង្ហើបថា សមភាគីរុស្ស៊ីរបស់លោកមិនសូវសប្បាយចិត្តនឹងជ័យជម្នះរបស់លោកលើលោកស្រី ហ៊ីឡារី គ្លីនតុន ឡើយ។ ការលើកឡើងបែបនេះ ហាក់ផ្ទុយពីការចោទប្រកាន់ទាំងឡាយដែលថារុស្ស៊ីជួយលោក ត្រាំ ឲ្យឈ្នះលោកស្រី គ្លីនតុន ក្នុងការបោះឆ្នោតឆ្នាំ២០១៦ ។

ក្នុងកិច្ចសម្ភាសជាមួយលោក Pat Robertson នៃ CBN News ដែលចាក់ផ្សាយនៅថ្ងៃទី១៣ ខែកក្កដានេះ លោក ត្រាំ និយាយថា លោក ពូទីន អាចនឹងរីករាយខ្លាំង បើលោកស្រី គ្លីនតុន ជាប់ឆ្នោតជាប្រធានាធិបតីអាមេរិកព្រោះលោកស្រីនឹងមិនពង្រីកឥទ្ធិពលកងទ័ពអាមេរិក ឬក៏អនុវត្តនយោបាយបញ្ចុះតម្លៃថាមពលដែរ។ បើតាមលោក ត្រាំ នេះគឺជាអ្វីដែលរុស្ស៊ីចង់បាន ព្រោះរុស្ស៊ីពឹងផ្អែកខ្លាំងលើការនាំចេញថាមពល ហើយក៏មិនចង់ប្រណាំងប្រជែងខាងយោធាដែរ។

លោក ត្រាំ ដែលធ្លាប់និយាយលើកសរសើរលោក ពូទីន នាពេលកន្លងមក បានពន្យល់ហេតុផលដែលប្រធានាធិបតីរុស្ស៊ីមិនសប្បាយចិត្ត នឹងជ័យជម្នះរបស់លោកថា អាមេរិកជាមហាអំណាចយោធាលើពិភពលោក ហើយយោធាអាមេរិក នឹងកាន់តែខ្លាំងក្រោមការដឹកនាំរបស់លោក ប៉ុន្តែបើលោកស្រី គ្លីនតុន ដឹកនាំប្រទេសវិញ យោធាអាមេរិក នឹងចុះខ្សោយមិនខាន។ លោកបន្តថា លោកបានអនុវត្តនយោបាយបញ្ចុះតម្លៃថាមពល និងបង្កើនការនាំចេញទៀតផង។

ជាការពិត លោក ត្រាំ បានអនុវត្តនយោបាយបង្កើនការផលិតថាមពល ជាពិសេសថាមពលដែលមិនកកើតឡើងវិញ ទោះជាត្រូវបង្កបញ្ហាដល់បរិស្ថាន ហើយអាមេរិកត្រូវដកខ្លួនចេញពីកិច្ចព្រមព្រៀងក្រុងប៉ារីសស្ដីពីបម្រែបម្រួលអាកាសធាតុក៏ដោយ។ តាំងពីចូលកាន់តំណែងមក លោក ត្រាំ បានបញ្ជាឲ្យបើករោងចក្រផលិតថាមពលដើរដោយធ្យូងថ្ម និងឧស្ម័នធម្មជាតិឡើងវិញ។ ច្បាស់ណាស់ថា រឿងនេះពិតជាធ្វើឲ្យរុស្ស៊ីមិនសប្បាយចិត្តឡើយ។

មិនត្រឹមតែរឿងយោធា និងតម្លៃថាមពលនេះឡើយ ប្រធានាធិបតីអាមេរិករូបនេះបញ្ជាក់ទៀតថា មានរឿងជាច្រើនទៀតដែលលោកត្រូវធ្វើ ហើយផ្ទុយស្រឡះពីអ្វីដែលប្រធានាធិបតីរុស្ស៊ីចង់បាន។ ដោយសារហេតុនេះ ទើបលោក ពូទីន ចូលចិត្តលោកស្រី គ្លីនតុន ជាង ព្រោះលោកចង់បានអ្វីដែលមានប្រយោជន៍សម្រាប់រុស្ស៊ី ហើយនយោបាយរបស់លោកស្រី គ្លីនតុន ពិតជាផ្ដល់ឱកាសឲ្យរុស្ស៊ីទាញយកប្រយោជន៍មែន។

ការលើកឡើងរបស់ប្រធានាធិបតី ត្រាំ ដូចនេះ ក៏មានន័យថាលោកនៅតែមិនទទួលស្គាល់ការលូកលាន់កិច្ចការបោះឆ្នោតអាមេរិកពីសំណាក់រុស្ស៊ី ព្រោះលោកមិនយល់ហេតុអ្វីលោក ពូទីន ត្រូវជ្រៀតជ្រែកការបោះឆ្នោត និងជួយឲ្យលោកឈ្នះឆ្នោត បើលោក ពូទីន មិនចូលចិត្តលោកផងនោះ។ ទោះជាយ៉ាងណាក្ដី លោក ត្រាំ អះអាងដែរថា លោកបន្តទំនាក់ទំនងល្អជាមួយរុស្ស៊ី ក៏ដូចជាប្រទេសផ្សេងទៀតដើម្បីប្រយោជន៍ទាំងសងខាង៕