ជាតិ
ចៅក្រមស៊ើបសួរចោទនារីឈ្មោះ ហេង លក្ខិណា ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍
× ភ្នំពេញ៖ ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកា បង្គាប់ឲ្យសមត្ថកិច្ចនាំខ្លួននារីម្នាក់ឈ្មោះ ហេង លក្ខិណា ដែលចោទសម្តេច ហ៊ុន សែន រួមទាំងក្រុមគ្រួសារ តាមបណ្តាញសង្គមហ្វេសប៊ុក ថាសុទ្ធតែជាឃាតក ទៅឃុំក្នុងពន្ធនាគារជាបណ្តោះសន្ន នៅថ្ងៃទី១៣ ខែកក្កដា ឆ្នាំ២0១៧នេះ។ ការសម្រេចបែបនេះ ធ្វើឡើងបន្ទាប់ពីសាកសួរនារីនោះរួច ជំវិញការចោទប្រកាន់លើក្រុមគ្រួសារសម្តេច ហ៊ុន សែន។
យោងតាមដីការបស់ចៅក្រមស៊ើបសួរនៃសាលាដំបូងរាជធានីភ្នំពេញ នារីនោះ ត្រូវបានចោទពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។ សមត្ថកិច្ច បានឃាត់ខ្លួននាង បន្ទាប់ពីបង្ហោះវីដេអូ ដោយចោទសម្តេច ហ៊ុន សែន និងក្រុមគ្រួសារថា សុទ្ធតែជាឃាតក កាលពីថ្ងៃទី៩ ខែកក្កដា ឆ្នាំ២0១៧ ក្នុងអំឡុងពេលនាង កំពុងស្ថិតក្នុងពិធីបុណ្យរម្លឹកខួបមួយឆ្នាំ នៃការបាញ់សម្លាប់លោកបណ្ឌិត កែម ឡី អ្នកវិភាគនយោបាយ ដែលរៀបចំឡើងនៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ។
នាង បាននិយាយក្នុងវីដេអូនោះ យ៉ាងដូច្នេះថា៖«លោក ហ៊ុន សែន ហ្នឹងហើយ គ្រួសារគាត់ហ្នឹងហើយ កូនចៅរបស់គាត់ អ្នកណាក៏ជាឃាតកដែរ។ គ្រួសារគាត់ហ្នឹង អ្នកណាក៏ប្រឡាក់ឈាមលោក បណ្ឌិត កែម ឡី ដែរ»៕
Tag:
តុលាការ
ហ៊ុន សែន
ហេង លក្ខិណា
© រក្សាសិទ្ធិដោយ thmeythmey.com