ជប៉ុនតវ៉ាវត្តមានយន្តហោះចិននៅក្បែរកោះរបស់ខ្លួន តែចិនប្រាប់វិញថា យូរទៅស៊ាំហើយ

អន្តរជាតិ

ជប៉ុនតវ៉ាវត្តមានយន្តហោះចិននៅក្បែរកោះរបស់ខ្លួន តែចិនប្រាប់វិញថា យូរទៅស៊ាំហើយ

14, Jul 2017 , 3:47 pm

រូបភាព

លោកវរសេនីយ៍ Ren Guoqiang អ្នកនាំពាក្យក្រសួងការពារជាតិ ក្នុងសន្និសីទសារព័ត៌មាន (រូបភាពគេហទំព័រក្រសួងការពារជាតិចិន

ដោយ: តន ចាន់រិទ្ធារ៉ា

វត្តមានជាញឹកញាប់់របស់យន្តហោះចម្បាំង និងនាវារបស់ចិននៅក្បែរច្រកសមុទ្រ Miyako ធ្វើឲ្យជប៉ុនជ្រួលច្របល់យ៉ាងខ្លាំង និងបានចាត់ទុកជាសកម្មភាពមិនធម្មតាទៀត។ យ៉ាងណាមិញ ចិន បានប្រាប់ឲ្យជប៉ុនកុំបារម្ភ និងមិនចាំបាច់ភ័យអ្វីឡើយ ព្រោះវាជាសកម្មភាពធម្មតាប៉ុណ្ណោះ។ ចិនក៏បានប្រាប់ជប៉ុនទុកមុនដែរថា យន្តហោះចម្បាំងជាច្រើនទៀតនឹងហោះហើរកាត់តំបន់នេះនៅពេលក្រោយៗទៀត។

ក្រសួងការពារជាតិជប៉ុន បានចេញសេចក្ដីប្រកាសព័ត៌មានមួយនៅយប់ថ្ងៃទី១៣ ខែកក្កដា បន្ទាប់ពីយន្តហោះទម្លាក់គ្រាប់បែកយុទ្ធសាស្ត្ររបស់ចិនចំនួន៦គ្រឿង ធ្វើដំណើរកាត់ច្រកសមុទ្រ Miyako ដែលនៅចន្លោះកោះភាគខាងត្បូងពីររបស់ជប៉ុន។ ក្រសួងការពារជាតិជប៉ុន ហៅវត្តមានយន្តហោះទម្លាក់គ្រាប់បែក Xian H-6 ជាទង្វើមិនធម្មតា ប៉ុន្តែក៏បានបញ្ជាក់ដែរថា យន្តហោះចិនមិនបានបំពានដែនអាកាសរបស់ខ្លួនទេ។

នៅថ្ងៃទី១៤ ខែកក្កដា ក្រសួងការពារជាតិចិន ក៏បានចេញមកឆ្លើយតបនឹងសេចក្ដីប្រកាសព័ត៌មានរបស់ក្រសួងការពារជាតិជប៉ុន ដោយនិយាយការពារវត្តមានយន្តហោះទាំង៦គ្រឿងនៅចន្លោះកោះ Miyako និងកោះ Okinawa ថាជារឿងត្រឹមត្រូវតាមច្បាប់។ អ្នកនាំពាក្យក្រសួងការពារជាតិចិន លោក Ren Guoqiang និយាយក្នុងសេចក្ដីប្រកាសព័ត៌មានមួយថា យន្តហោះចិនជាច្រើនគ្រឿង នឹងត្រូវធ្វើដំណើរកាត់តំបន់នោះ ដើម្បីចូលរួមសមយុទ្ធនៅតំបន់ប៉ាស៊ីហ្វិកខាងលិច។

ដោយចង់សំដៅដល់ជប៉ុន សេចក្ដីប្រកាសព័ត៌មានរបស់ក្រសួងការពារជាតិចិនបន្ថែមថា ភាគីទាំងអស់ មិនចាំបាច់ខ្វល់ខ្វាយហួសប្រមាណ ឬគិតអ្វីផ្ដេសផ្ដាសឡើយ។ ក្រុងប៉េកាំង ក៏បានស្នើឲ្យក្រុងតូក្យូរៀនសម្របខ្លួនតាមស្ថានការណ៍ទៅ ព្រោះពេលខាងមុខ ក្រុងប៉េកាំងនឹងរៀបចំសមយុទ្ធរបៀបនេះច្រើនដងទៀត។ នេះក៏ព្រោះតែវាមិនមែនជាលើកទីមួយដែលយន្តហោះចិនហោះកាត់ច្រកសមុទ្រ Miyako ដែលជាច្រកចេញទៅមហាសមុទ្រប៉ាស៊ីហ្វិក។

ប៉ុន្មានឆ្នាំចុងក្រោយនេះ កងទ័ពជើងទឹក និងជើងអាកាសចិន បានបង្កើនការធ្វើសមយុទ្ធយ៉ាងខ្លាំងនៅតំបន់មហាសមុទ្រប៉ាស៊ីហ្វិក ដែលនៅឆ្ងាយពីដែកគោករបស់ខ្លួន ព្រោះដើម្បីសាកល្បងអានុភាពកងទ័ព និងដើម្បីសម្ញែងឥទ្ធិពលរបស់ខ្លួននផង។ ដោយសារហេតុនេះ ទើបគេឃើញយន្តហោះចិនធ្វើដំណើរជាក្រុមៗ ហើយញឹកញាប់នៅក្បែរកោះជប៉ុន ដែលធ្វើឲ្យជប៉ុនបារម្ភ និងបានបញ្ជូនយន្តហោះរបស់ខ្លួនតាមដានយន្តហោះចិនផងដែរ។

មិនមែនតែជប៉ុនឡើយ សូម្បីតែកោះតៃវ៉ាន់ ក៏មិនសូវស្រួលចិត្តដែរ ពេលយន្តហោះរបស់ចិនហោះក្បែរដែនអាកាសរបស់ខ្លួន។ នៅថ្ងៃទី១៣ ខែកក្កដា ក្រសួងការពារជាតិតៃវ៉ាន់ក៏បានចេញសេចក្ដីប្រកាសព័ត៌មានដែរថា យន្តហោះទម្លាក់គ្រាប់បែករបស់ចិនហោះកៀកតំបន់កំណត់អត្តសញ្ញាណអាកាសរបស់មែនទែន។ តៃវ៉ាន់បារម្ភ ព្រោះចិនតែងអះអាងថានឹងដណ្ដើមគ្រប់គ្រងតៃវ៉ាន់ឲ្យបានទោះប្រើមធ្យោបាយអ្វីក៏ដោយ រាប់ទាំងយោធាផង៕