អន្តរជាតិ
សភាអាមេរិកអនុម័តទណ្ឌកម្មថ្មីទៀតលើរុស្ស៊ី អ៊ីរ៉ង់ និងកូរ៉េខាងជើង
× រដ្ឋសភាអាមេរិក នៅថ្ងៃទី២៥ ខែកក្កដា បានបោះឆ្នោតគាំទ្រដោយសំឡេងលើសលប់លើកញ្ចប់ទណ្ឌកម្មថ្មីមួយទៀតប្រឆាំងរុស្ស៊ី អ៊ីរ៉ង់ និងកូរ៉េខាងជើង។ ការអនុម័តទណ្ឌកម្មថ្មីលើរុស្ស៊ី គឺផ្ទុយពីជំហររបស់ប្រធានាធិបតី ដូណាល់ ត្រាំ ដែលចង់ពង្រឹងទំនាក់ទំនងជាមួយរុស្ស៊ី។ ប៉ុន្តែរដ្ឋបាលលោក ត្រាំ ក៏ទំនងសប្បាយចិត្ត ព្រោះទណ្ឌកម្មថ្មីក៏មានបញ្ចូលឈ្មោះអ៊ីរ៉ង់ និងកូរ៉េខាងជើងផងដែរ ដោយសារតែប្រទេសទាំងពីរនៅមានគោលដៅអភិវឌ្ឍនុយក្លេអ៊ែរដដែល ។
សមាជិករដ្ឋសភាអាមេរិកចំនួន៤១៩នាក់ បានបោះឆ្នោតគាំទ្រកញ្ចប់ទណ្ឌកម្មថ្មីប្រឆាំងរុស្ស៊ី អ៊ីរ៉ង់ និងកូរ៉េខាងជើង ខណៈសមាជិកចំនួន៣នាក់ប៉ុណ្ណោះបានបោះឆ្នោតប្រឆាំងក្នុងកិច្ចប្រជុំថ្ងៃទី២៥ ខែកក្កដា។ សេចក្ដីព្រាងច្បាប់ដែលទើបត្រូវបានអនុម័តនេះ ក៏បានដាក់កំហិតឲ្យប្រធានាធិបតី ដូណាល់ ត្រាំ សុំការអនុញ្ញាតពីសភាសិន មុននឹងព្យួរ ឬលុបចោលទណ្ឌកម្មបាន។ ចេញពីរដ្ឋសភា សេចក្ដីព្រាងនេះ ត្រូវបញ្ជូនទៅកាន់ព្រឹទ្ធសភា មុនផ្ញើទៅសេតវិមានចុងក្រោយ។
ការដាក់ទណ្ឌកម្មលើអ៊ីរ៉ង់ និងកូរ៉េខាងជើង គឺជារឿងដែលគេរំពឹងទុក ព្រោះលោក ត្រាំ ខ្វល់ខ្វាយយ៉ាងខ្លាំងនឹងសកម្មភាពរបស់ប្រទេសទាំងពីរនេះលើកម្មវិធីនុយក្លេអ៊ែរ ហើយលោកក៏គំរាមដាក់ទណ្ឌកម្មលើប្រទេសទាំងពីរយូរមកហើយដែរ។ ប៉ុន្តែអ្វីគួរឲ្យចាប់អារម្មណ៍នោះ គឺទណ្ឌកម្មលើរុស្ស៊ីទៅវិញ ដ្បិតលោក ត្រាំ កំពុងតែចង់ស្ដារទំនាក់ទំនងទ្វេភាគីឡើងវិញផង។ នេះមានន័យថារដ្ឋសភាអាមេរិកកំពុងតែដើរលើផ្លូវផ្សេងគ្នាជាមួយលោក ត្រាំ ហើយ។
រដ្ឋសភាអាមេរិកដាក់ទណ្ឌកម្មថ្មីលើរុស្ស៊ី ដោយចោទរុស្ស៊ីថាបានជ្រៀតជ្រែកការបោះឆ្នោតឆ្នាំ២០១៦ គាំទ្ររដ្ឋាភិបាលស៊ីរីនៃប្រធានាធិបតី Bashar al-Assad លូកលាន់កិច្ចអ៊ុយក្រែន និងការលេបយកតំបន់គ្រីមៀជាដើម។ សេចក្ដីព្រាងទណ្ឌកម្មថ្មីនេះ មានគោលដៅលើបុគ្គល ក្រុមហ៊ុនថាមពល និងធនាគាររបស់រុស្ស៊ី ដែលអាមេរិកចោទថាបានពាក់ព័ន្ធការបោះឆ្នោតអាមេរិកតាមរយៈការលួចយកទិន្នន័យ និងវិធីសាស្ត្រផ្សេងៗទៀត។
យ៉ាងណាក្ដី កញ្ចប់ទណ្ឌកម្មមួយនេះត្រូវឆ្លងឧបសគ្គច្រើន មុននឹងចេញជាច្បាប់។ ចេញពីរដ្ឋសភា ទណ្ឌកម្មថ្មីនេះត្រូវការការយល់ព្រមពីព្រឹទ្ធសភាសិន ដែលគេរំពឹងថាការជជែកដេញដោលនឹងធ្វើឡើងដោយក្ដៅគគុករវាងក្រុមសាធារណរដ្ឋ និងក្រុមប្រជាធិបតេយ្យ។ បើតាមទីភ្នាក់ងារព័ត៌មាន Reuters សេតវិមានវិញក៏និយាយដែរថា លោក ត្រាំ មិនទាន់សម្រេចចិត្តច្បាស់ថាត្រូវចុះហត្ថលេខា ឬក៏ប្រើសិទ្ធិវ៉េតូប្រឆាំងទណ្ឌកម្មថ្មីនៅឡើយទេ។
នៅព្រឹទ្ធសភាឯណោះ គេឃើញមានសមាជិកខ្លះមិនពេញចិត្តនឹងទណ្ឌកម្មនេះដែរ។ ខុសពីលោក ត្រាំ ដែលមិនចង់ឃើញទណ្ឌកម្មលើរុស្ស៊ី ថ្នាក់ដឹកនាំព្រឹទ្ធសភាអាមេរិកខ្លះបែរជាជំទាស់ការដាក់ទណ្ឌកម្មលើកូរ៉េខាងជើងទៅវិញ។ លោក Bob Corker ប្រធានគណៈកម្មាធិការទំនាក់ទំនងការបរទេសនៃព្រឹទ្ធសភានិយាយថា លោកមិនច្បាស់ថាទណ្ឌកម្មថ្មីនេះអាចឆ្លងផុតដំណាក់កាលព្រឹទ្ធសភាឬយ៉ាងណាឡើយ៕
Tag:
អាមេរិក
រុស្ស៊ី
អ៊ីរ៉ង់
កូរ៉េខាងជើង
© រក្សាសិទ្ធិដោយ thmeythmey.com