រុស្ស៊ីត្រៀមឆ្លើយតប ឯអឺរ៉ុបកំពុងជ្រួលច្របល់ ខណៈទណ្ឌកម្មថ្មីលើរុស្ស៊ីធ្លាក់ដល់ដៃលោក ត្រាំ

អន្តរជាតិ

រុស្ស៊ីត្រៀមឆ្លើយតប ឯអឺរ៉ុបកំពុងជ្រួលច្របល់ ខណៈទណ្ឌកម្មថ្មីលើរុស្ស៊ីធ្លាក់ដល់ដៃលោក ត្រាំ

28, Jul 2017 , 9:39 pm

រូបភាព

ប្រធានាធិបតីរុស្ស៊ី វ្ល៉ាឌីមៀ ពូទីន ជួបជាមួយប្រធានាធិបតី ដូណាល់ ត្រាំ នៅទីក្រុង Hamburg (រូបភាព Xinhua)

ដោយ: តន ចាន់រិទ្ធារ៉ា

បន្ទាប់ពីឆ្លងកាត់ដំណាក់កាលរដ្ឋសភាដោយស្រួល ហើយព្រឹទ្ធសភាឯកភាពដោយសំឡេងលើសលប់ទៀត ពេលនេះកញ្ចប់ទណ្ឌកម្មថ្មីលើរុស្ស៊ី អ៊ីរ៉ង់ និងកូរ៉េខាងជើង បានទៅដល់សេតវិមានហើយ។ ទណ្ឌកម្មថ្មីលើអ៊ីរ៉ង់ និងកូរ៉េខាងជើង មិនមែនជាស្មុគស្មាញឡើយ តែទណ្ឌកម្មលើរុស្ស៊ីឯណោះទេ ដែលធ្វើឲ្យលោក ដូណាល់ ត្រាំ ឈឺក្បាលខ្លាំង។ រុស្ស៊ី និងអឺរ៉ុប បានរិះគន់ទណ្ឌកម្មថ្មីនេះយ៉ាងខ្លាំង និងត្រៀមចាត់វិធានការតបវិញទៀតផង បើលោក ត្រាំ ចុះហត្ថលេខាមែននោះ។

នៅថ្ងៃទី២៥ ខែកក្កដា រដ្ឋសភាអាមេរិកបានបោះឆ្នោតគាំទ្រកញ្ចប់ទណ្ឌកម្មថ្មីប្រឆាំងរុស្ស៊ី អ៊ីរ៉ង់ និងកូរ៉េខាងជើងដោយសំឡេង៤១៩ ទល់៣សំឡេង។ មកដល់ថ្ងៃទី២៧ ខែកក្កដាម្សិលមិញ ព្រឹទ្ធសភាអាមេរិកក៏បានឯកភាពលើកញ្ចប់ទណ្ឌកម្មថ្មីនេះដោយសំឡេងស្ទើរតែឯកច្ឆន្ទទៅហើយ គឺ៩៨សំឡេងទល់នឹង២សំឡេង។ ពេលនេះ ទណ្ឌកម្មថ្មីនេះអាចលេចជារូបរាងឬអត់ គឺអាស្រ័យលើប្រធានាធិបតី ដូណាល់ ត្រាំ វិញម្ដង។

ព្រឹទ្ធអាមេរិក ដែលកំពុងញាប់ដៃក្នុងការពិភាក្សាលើការលុបចោលច្បាប់សុខាភិបាលអូបាម៉ា បែរជាអាចឆ្លៀតពេលអនុម័តទណ្ឌកម្មថ្មី ដែលផ្ដោតសំខាន់លើរុស្ស៊ីទៅវិញ។ ការណ៍នេះធ្វើឲ្យលោក ត្រាំ ស្ថិតក្នុងស្ថានភាពទ័លច្រក ដែលពិបាកសម្រេចចិត្តបំផុត ព្រោះលោកមានជំហរពង្រឹងទំនាក់ទំនងជាមួយរុស្ស៊ី។ ប៉ុន្តែសមាជិកសភាទាំងពីរ ដែលរួមមានសមាជិកបក្សសាធារណរដ្ឋដែរនោះ មិនមានជំហរស្របគ្នានឹងលោក ត្រាំ ឡើយ។

ក្នុងសេចក្ដីព្រាងទណ្ឌកម្មថ្មីនេះ សភាទាំងពីររបស់អាមេរិកបានដាក់កំហិតច្រើនទៅលើរដ្ឋបាលប្រធានាធិបតី ត្រាំ ។ បញ្ញត្តិមួយក្នុងសេចក្ដីព្រាងទណ្ឌកម្មបានកំណត់ឲ្យរដ្ឋបាលលោក ត្រាំ សុំការអនុញ្ញាតពីសភាសិន មុននឹងព្យួរ ឬលុបចោលទណ្ឌកម្មណាមួយ។ លោក ត្រាំ មានសិទ្ធិទទួល ឬវ៉េតូទណ្ឌកម្មថ្មីនេះ ប៉ុន្តែសភាក៏មានសិទ្ធិទាត់ចោលការវ៉េតូរបស់ប្រធានាធិបតី រួចប្រកាសចេញជាច្បាប់ក៏បានដែរ។

១. រុស្ស៊ីលែងទ្រាំទៀតហើយ! ពូទីន ប្រកាសឆ្លើយតបទណ្ឌកម្មរបស់អាមេរិក

នៅពេលនេះ រុស្ស៊ីកំពុងតាមដានយ៉ាងដិតដល់ស្ថានការណ៍នៅអាមេរិក និងត្រៀមខ្លួនដើម្បីតបតទណ្ឌកម្មថ្មី ក្នុងករណីលោក ត្រាំ ចុះហត្ថលេខាដាក់ឲ្យអនុវត្តមែននោះ។ អាមេរិកដាក់ទណ្ឌកម្មថ្មីលើរុស្ស៊ី ដោយចោទបានជ្រៀតជ្រែកការបោះឆ្នោតឆ្នាំ២០១៦ គាំទ្ររដ្ឋាភិបាលស៊ីរី លូកលាន់កិច្ចអ៊ុយក្រែន និងការលេបយកតំបន់គ្រីមៀជាដើម។ សេចក្ដីព្រាងទណ្ឌកម្មថ្មីនេះ មានគោលដៅលើបុគ្គល ក្រុមហ៊ុន និងធនាគាររបស់រុស្ស៊ី ដែលអាមេរិកចោទថាបានពាក់ព័ន្ធការបោះឆ្នោតអាមេរិកដែរ។

យ៉ាងណាក្ដី ម្ដងជាពីរដង រុស្ស៊ីបានបដិសេធយ៉ាងដាច់អហង្ការថាខ្លួនមិនមានពាក់ព័ន្ធការបោះឆ្នោតរបស់អាមេរិកឡើយ។ ប្រធានាធិបតី វ្ល៉ាឌីមៀ ពូទីន ដែលទាត់ចោលការចោទប្រកាន់តាំងពីដើមមក បានរិះគន់សមាជិកសភាអាមេរិកថាបញ្ចេញអាកប្បកិរិយាព្រហើន និងប្រកាសសងសឹកអាមេរិកវិញ បើទណ្ឌកម្មថ្មីត្រូវបានចុះហត្ថលេខាឲ្យក្លាយជាច្បាប់មែន។ លោក ពូទីន ក៏ធ្លាប់និយាយថា ទណ្ឌកម្មអាមេរិកមិនអាចសម្លាប់រុស្ស៊ីបានទេ។

យោងតាមសារព័ត៌មាន The Guardian លោក ពូទីន បាននិយាយក្នុងសន្និសីទកាសែតជាមួយសមភាគីហ្វាំងឡង់នៅថ្ងៃទី២៧ ខែកក្កដា ថា រុស្ស៊ីបានបង្ហាញជំហរអត់ធ្មត់ជាយូរមកហើយ តែដល់ពេលខ្លះរុស្ស៊ីត្រូវតែឆ្លើយតបវិញមិនខាន។ លោកបន្តថា វាជារឿងមិនអាចទៅរួចដែលរុស្ស៊ីត្រូវស៊ូទ្រាំដោយមិនតបតអ្វីសោះទៅនឹងសកម្មភាពព្រហើន ហើយទណកម្មថ្មីនេះពិតជារឿងដែលរុស្ស៊ីមិនអាចទទួលយកបានមែន។

២. អឺរ៉ុប៖ ដល់ពេលប៉ះប្រយោជន៍ខ្លួនឯង ទើបយល់

តាំងពីដើមមកនោះ អឺរ៉ុបបានដើរលើផ្លូវជាមួយអាមេរិកក្នុងការដាក់ទណ្ឌកម្មលើរុស្ស៊ីលើសំណុំរឿងអ៊ុយក្រែន ហើយតែងស្នើឲ្យមានការដាក់ទណ្ឌកម្មខ្លាំងៗទៀតផង។ ប៉ុន្តែលើកនេះ អឺរ៉ុបបានចេញមុខប្រឆាំងទណ្ឌកម្មថ្មីលើរុស្ស៊ី ព្រោះវាប៉ះពាល់ដល់ផលប្រយោជន៍អឺរ៉ុបដែរ។ ទណ្ឌកម្មថ្មី ដែលផ្ដោតលើសកម្មភាពជ្រៀតជ្រែករបស់រុស្ស៊ីក្នុងកិច្ចការបោះឆ្នោតអាមេរិក បានប៉ះលើក្រុមហ៊ុនអឺរ៉ុបដែលរកស៊ីវិស័យថាមពលជាមួយរុស្ស៊ី។

សហភាពអឺរ៉ុប បារាំង អាល្លឺម៉ង់ និងចុងក្រោយអូទ្រីស បានបញ្ចេញប្រតិកម្មមិនធ្លាប់មានប្រឆាំងទណ្ឌកម្មថ្មី ដែលកំពុងស្ថិតក្នុងដៃលោក ត្រាំ ។ អឺរ៉ុបបានចោទអាមេរិកថាគិតតែប្រយោជន៍ខ្លួន តែមិនគិតផលប៉ះពាល់កើតមានលើអឺរ៉ុបឡើយ។ អធិការបតីអូទ្រីស Christian Kern បានសរសេរលើ Facebook របស់លោកថា ទណ្ឌកម្មថ្មីរបស់់អាមេរិក ជារឿងមិនអាចទទួលយកបានទាល់តែសោះ ព្រោះអាមេរិកយករឿងនយោបាយខ្លួនឯងមកឡូកឡំបញ្ហាសេដ្ឋកិច្ចរបស់អឺរ៉ុប។

រដ្ឋសមាជិកអឺរ៉ុប ខឹងច្រឡោតនឹងទណ្ឌកម្មរបស់អាមេរិកដែលជាសម្ព័ន្ធមិត្តរបស់ខ្លួន ព្រោះទណ្ឌកម្មថ្មីនឹងបង្អាក់ការកសាងបណ្ដាញផ្គត់ផ្គង់ឧស្ម័ន Nord Stream 2 ដែលបង្ហូរឧស្ម័នពីរុស្ស៊ីទៅកាន់រដ្ឋអឺរ៉ុប។ ក្រុមហ៊ុនថាមពលរុស្ស៊ី Gazprom និងក្រុមហ៊ុនរបស់រដ្ឋអឺរ៉ុបមួយចំនួនសហការគ្នាលើគម្រោងដ៏ធំមួយនេះ ហើយក្រុមហ៊ុនទាំងនេះនឹងត្រូវស្ថិតក្រោមទណ្ឌកម្មរបស់អាមេរិក ព្រោះហ៊ានរកស៊ីជាមួយជាមួយរុស្ស៊ី។

៣. ត្រាំ ស្ថិតលើផ្លូវបំបែក

កញ្ចប់ទណ្ឌកម្មថ្មីនេះ អាចជាចេញជាច្បាប់ដើម្បីអនុវត្តឬអត់ គឺអាស្រ័យលើការសម្រេចចិត្តរបស់លោក ត្រាំ ហើយពេលនេះ។ វាជារឿងដ៏លំបាកក្នុងការសម្រេចចិត្តរបស់លោក ត្រាំ ខណៈដែលលោកកំពុងចង់ស្ដារទំនាក់ទំនងជាមួយរុស្ស៊ីផងនោះ។ ប៉ុន្តែលោកក៏មិនអាចបោះបង់គំនិតរបស់សមាជិកសភា ដើម្បីតែទំនាក់ទំនងជាមួយរុស្ស៊ីបានដែរ ខណៈសំណុំរឿងរុស្ស៊ីលូកលាន់កិច្ចការបោះឆ្នោតឆ្នាំ២០១៦ មិនទាន់ចប់នៅឡើយ។

តាមពិតទៅ លោក ត្រាំ មានសិទ្ធិមិនចុះហត្ថលេខាលើទណ្ឌកម្មនេះបាន តែលោកនឹងត្រូវប្រឈមមុខជាមួយសមាជិកសភាទាំងពីររបស់អាមេរិក។ យោងតាមលទ្ធផលបោះឆ្នោតនៅសភាទាំងពីរ សូម្បីតែសមាជិកសភាបក្សសាធារណរដ្ឋរបស់លោក ក៏គាំទ្រទណ្ឌកម្មលើរុស្ស៊ីដែរ ដែលបញ្ហាធ្វើឲ្យលោក ត្រាំ ពិបាកសម្រេចចិត្តមែនទែន។ ទណ្ឌកម្មថ្មីនេះ ក៏ជាច្បាប់សំខាន់មួយរបស់សភាអាមេរិកក្រោមអាណត្តិរបស់លោក ត្រាំ ដែរ។

បើតាមទីភ្នាក់ងារព័ត៌មាន Reuters មន្ត្រីសេតវិមាននិយាយហើយថាទណ្ឌកម្មថ្មីនេះ នឹងត្រូវពិនិត្យសិន មុននឹងលោក ត្រាំ សម្រេចចិត្តតាមក្រោយ។ លោក ត្រាំ មានពេល១០ថ្ងៃ ដោយមិនគិតថ្ងៃអាទិត្យដើម្បីពិចារណាថា ត្រូវចុះហត្ថលេខា ឬក៏វ៉េតូ។ បើលោក ត្រាំ វ៉េតូ នោះទណ្ឌកម្មថ្មីក៏អាចក្លាយជាច្បាប់ផ្លូវការដែរ នៅពេលសភាទាំងពីរបោះឆ្នោតដោយសំឡេងពីរភាគបីរៀងៗខ្លួន។ ប៉ុន្តែលោក ត្រាំ នៅតែអាចដាក់ទណ្ឌកម្មលើរុស្ស៊ីបានដដែល តាមរយៈការចេញបញ្ជាប្រតិបត្តិ៕