អន្តរជាតិ
ទូតចិនប្រចាំ UN ៖ ចិនជួយយ៉ាងម៉េចក៏អត់ប្រយោជន៍ បើអាមេរិកនិងកូរ៉េខាងជើងមិននិយាយគ្នា អគ្គរដ្ឋទូតចិនប្រចាំអង្គការសហប្រជាជាតិ Liu Jieyi ក្នុងសន្និសីទសារព័ត៌មាននៅទីស្នាក់ការ UN (រូបភាព Xinhua)
× អគ្គរដ្ឋទូតចិនប្រចាំអង្គការសហប្រជាជាតិ Liu Jieyi បាននិយាយនៅថ្ងៃទី៣១ ខែកក្កដា ថា អាមេរិកនិងកូរ៉េខាងជើង គឺភាគីចម្បងក្នុងការបញ្ចប់ភាពតានតឹងនៅឧបទ្វីបកូរ៉េ មិនមែនចិនឡើយ។ អគ្គរដ្ឋទូតរូបនេះបញ្ជាក់ថា ការប្រឹងប្រែងរបស់ចិនមិនបានផលអ្វីទេ បើអាមេរិក និងកូរ៉េខាងជើងមិនព្រមនិយាយរកគ្នាផងនោះ។ លោក Liu Jieyi និយាយបែបនេះ បន្ទាប់ពីប្រធានាធិបតី ដូណាល់ ត្រាំ ចោទចិនថាមិនបានជួយអ្វីសោះ។
បន្ទាប់ពីប្រធានាធិបតី ដូណាល់ ត្រាំ បង្ហាញការមិនសប្បាយចិត្តដាក់ចិនដែលមិនព្រមធ្វើអ្វីសោះលើកូរ៉េខាងជើង ចិនបានឆ្លើយទៅវិញថា ខ្លួនមិនមែនជាតួឯកក្នុងការដោះស្រាយវិបត្តិនុយក្លេអ៊ែរនៅឧបទ្វីបកូរ៉េឡើយ។ ចិន ដែលចាត់ទុកខ្លួនឯងមិនមែនជាតួអង្គសំខាន់ បានប្រាប់ឲ្យអាមេរិក និងកូរ៉េខាងជើងជួបគ្នាដោះស្រាយបញ្ហាដើម្បីឈានទៅដល់ការបញ្ចប់ការសាកល្បងនុយក្លេអ៊ែរ និងការបាញ់មីស៊ីលបាលីស្ទិក។
ក្នុងសន្និសីទសារព័ត៌មានជុំវិញការបញ្ចប់អាណត្តិជាប្រធានប្ដូរវេនក្រុមប្រឹក្សាសន្តិសុខ លោក Liu Jieyi អគ្គរដ្ឋទូតចិនប្រចាំអង្គការសហប្រជាជាតិ បានទម្លាក់ការទទួលខុសឲ្យអាមេរិក និងកូរ៉េខាងជើងក្នុងការបញ្ចប់បញ្ហានុយក្លេអ៊ែរនេះ។ លោក Liu និយាយថា អាមេរិក និងកូរ៉េខាងជើង មានទំនួលខុសត្រូវខ្លាំងជាងគេក្នុងការចាប់ផ្ដើមការចរចាឡើងវិញ ក៏ដូចជាការបន្ធូរបន្ថយស្ថានការណ៍តានតឹងនៅឧបទ្វីបកូរ៉េផងដែរ។ នេះបើតាមសារព័ត៌មាន Al Jazeera ។
ទំនងជាការឆ្លើយទៅនឹងការលើកឡើងរបស់លោក ត្រាំ មន្ត្រីការទូតចិនរូបនេះបញ្ជាក់ថា បើទោះជាចិនប្រឹងជួយយ៉ាងណាក្ដី ការព្យាយាមរបស់ចិននឹងមិនទទួលបានផលជាដុំកំភួនឡើយ ព្រោះលទ្ធផលយ៉ាងណាអាស្រ័យលើភាគីសំខាន់ទាំងពីរ គឺអាមេរិក និងកូរ៉េខាងជើងផ្ទាល់។ អគ្គរដ្ឋទូតរូបនេះក៏ឆ្លៀតរិះគន់ប្រទេសខ្លះ ដែលបំពានសេចក្ដីសម្រេចរបស់ក្រុមប្រឹក្សាសន្តិសុខតាមរយៈការបង្កើនភាពតានតឹង និងមិនព្រមចរចាបញ្ចប់បញ្ហាទៅទៀត។
យ៉ាងណាមិញ មុននេះ សមភាគីរបស់លោក Liu Jieyi គឺលោកស្រី Nikki Haley អគ្គរដ្ឋទូតអាមេរិកប្រចាំ UN បានអះអាងថាហើយថា ពេលវេលាសម្រាប់ការចរចានៅ UN ស្ដីពីវិបត្តិនុយក្លេអ៊ែរកូរ៉េខាងជើងបានអស់ទៅហើយ។ លោកស្រី Haley បានស្នើឲ្យចិនបង្ហាញឆន្ទៈក្នុងការគាំទ្រដាក់ទណ្ឌកម្មកាន់តែខ្លាំងលើកូរ៉េខាងជើងដែលលើកឡើងដោយអាមេរិក ជាជាងការនិយាយស្ដីដែលមិនជួយដោះស្រាយបញ្ហាអ្វីបាននោះ។
ទោះជាយ៉ាងណា ប្រេសិតរបស់ចិន Liu Jieyi បានលើកឡើងថា ចិនបន្តទាក់ទងជាមួយសមាជិក ក្រុមប្រឹក្សាទាក់ទងបញ្ហាកូរ៉េខាងជើងនេះ។ លោក Liu ក៏បានបង្ហើបដែរថា ក្រុមប្រឹក្សាសន្តិសុខកំពុងពិភាក្សាសេចក្ដីសម្រេចថ្មីមួយទៀតលើប្រធានបទនុយក្លេអ៊ែរកូរ៉េខាងជើង។ សេចក្ដីសម្រេចនេះ ត្រូវបានស្នើដោយអាមេរិក បន្ទាប់ពីកូរ៉េខាងបាញ់មីស៊ីលបាលីស្ទិកនៅថ្ងៃទី៤ ខែកក្កដា ហើយផ្ដោតសំខាន់លើវិធានការរារាំងការសាកល្បងលើកក្រោយទៀត៕
Tag:
UN
ចិន
អាមេរិក
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com