របាយការណ៍៖ អាមេរិកខ្ជះខ្ជាយលុយរាប់រយលានដុល្លារនៅអាហ្វហ្គានីស្ថាន

អន្តរជាតិ

របាយការណ៍៖ អាមេរិកខ្ជះខ្ជាយលុយរាប់រយលានដុល្លារនៅអាហ្វហ្គានីស្ថាន

01, Aug 2017 , 5:21 pm

រូបភាព

ដោយ: តន ចាន់រិទ្ធារ៉ា

របាយការណ៍ប្រចាំត្រីមាសដែលចេញផ្សាយដោយអធិការកិច្ចពិសេសសម្រាប់ការកសាងអាហ្វហ្គានីស្ថានឡើងវិញ (SIGAR) បង្ហាញថា រដ្ឋាភិបាលបាលអាមេរិកបានចំណាយលុយរាប់រយលានដុល្លារលើការស្ថាបនាអាហ្វហ្គានីស្ថានឡើងវិញ ប៉ុន្តែលទ្ធផលតបស្នងមិនបានដូចចិត្តឡើយ។ បន្ថែមពីការខ្ជះខ្ជាយលុយរាប់រយលានដុល្លារនេះ គេបែរជាឃើញការកើនឡើងសកម្មភាពក្រុមតាលីបង់ និងផលិតកម្មអាភៀនទៅវិញ។

រយៈពេល១៥ឆ្នាំនៃការគាំទ្ររដ្ឋាភិបាលអាហ្វហ្គានីស្ថាន អាមេរិកបានចំណាយលុយច្រើនជាង៧១៤ពាន់លានដុល្លារដើម្បីកសាងប្រទេសដែលខ្ទេចខ្ទាំដោយសារសង្គ្រាម។ ទឹកប្រាក់សន្ធឹកសន្ធាប់នេះ ត្រូវបានចំណាយលើការទ្រទ្រង់រចនាសម្ព័ន្ធរដ្ឋាភិបាល ពង្រឹងសមត្ថភាពកងទ័ពអាហ្វហ្គានីស្ថាន និងកសាងហេដ្ឋារចនាសម្ព័ន្ធឡើងវិញ។ ប៉ុន្តែវប្បធម៌ពុករលួយ និងការខ្វះការត្រួតពិនិត្យរបស់អាមេរិក ធ្វើឲ្យការប្រឹងប្រែងរបស់អាមេរិកមិនបានលទ្ធផលដូចការរំពឹងទុកទេ។

យោងតាមរបាយការណ៍របស់អធិការកិច្ចពិសេសសម្រាប់ការកសាងអាហ្វហ្គានីស្ថាន (SIGAR) ចេញផ្សាយនៅថ្ងៃទី៣០ ខែកក្កដា ក្រុមឧទ្ទាមតាលីបង់នៅមានសមត្ថភាពវាយប្រហារលើកងកម្លាំងរដ្ឋាភិបាល និងសម្ព័ន្ធមិត្តចម្រុះ។ ៤០ភាគរយនៃទឹកដីអាហ្វហ្គានីស្ថាននៅតែស្ថិតក្រោមការគ្រប់គ្រងរបស់ក្រុមឧទ្ទាមតាលីបង់ ឬក្រុមសកម្មប្រយុទ្ធផ្សេងដដែល ខណៈដែលការវាយប្រយុទ្ធរវាងកម្លាំងរដ្ឋាភិបាល និងក្រុមឧទ្ទាមក៏កើនឡើងខ្លាំងដែរ។

ក្នុងរបាយការណ៍របស់ខ្លួន SIGAR ក៏បានណែនាំឲ្យមន្ត្រីអាមេរិកបង្កើនការប្រឹងប្រែងបន្ថែមទៀត និងត្រូវហ៊ានប្រឈមមុខគ្រោះថ្នាក់ ជាជាងធ្វើការតែក្នុងការិយាល័យដែលមានការការពារខ្វាត់ខ្វែង ហើយវាយតម្លៃការចំណាយរបស់រដ្ឋាភិបាលទាំងមិនបានចុះពិនិត្យជាក់ស្ដែង។ លោក John Sopko ប្រធាន SIGAR និយាយថា ការអង្គុយធ្វើការតែក្នុងការិយាល័យមិនបានជួយអ្វីឡើយ តែក៏ប៉ះពាល់ដល់បេសកកម្មយោធាទៅទៀត ព្រោះទឹកប្រាក់រាប់រយលានត្រូវចំណាយដោយគ្មានការពិនិត្យឡើយ។

តាមពិតទៅ រដ្ឋបាលប្រធានាធិបតី ដូណាល់ ត្រាំ មិនសូវពេញចិត្តបេសកកម្មនៅអាហ្វហ្គានីស្ថានប៉ុន្មានឡើយ ព្រោះត្រូវចំណាយប្រាក់រាប់រយលានដុល្លារក្នុងមួយឆ្នាំៗ។ រដ្ឋមន្ត្រីការពារជាតិអាមេរិក ជេមស៍ ម៉ាធីស ធ្លាប់បង្ហាញការមិនពេញចិត្តម្ដងហើយទាក់ទងការចំនាយរាប់លានដុល្លារលើការផ្គត់ផ្គត់ខោអាវទាហានអាហ្វហ្គានីស្ថាន។ លោក ម៉ាធីស ក៏ប្រកាសថា តាមស្ថានភាពបច្ចុប្បន្នអាមេរិកមិនអាចឈ្នះសង្គ្រាមអាហ្វហ្គានីស្ថានបានឡើយ ដូច្នេះត្រូវតែប្ដូរវិធីសាស្ត្រថ្មី។

រដ្ឋបាលលោក ត្រាំ ក៏កំពុងពិចារណាផ្លាស់ប្ដូរយុទ្ធសាស្ត្រថ្មីដើម្បីបង្កើនប្រសិទ្ធភាពនៃការចំណាយ ក៏ដូចជាឆាប់បញ្ចប់បញ្ហារ៉ាំរៃមួយនេះ។ ក្រុងវ៉ាស៊ីនតោនទំនងជាបញ្ជូនទ័ពបន្ថែមទៀតទៅកាន់អាហ្វហ្គានីស្ថាន ប៉ុន្តែអាចទាហានផ្ដល់ប្រឹក្សា ឬក៏ផ្ដល់ការបណ្ដុះបណ្ដាលប៉ុណ្ណោះ។ អាមេរិកក៏ទំនងជាដាក់សម្ពាធបន្ថែមទៅលើប៉ាគីស្ថានដើម្បីឲ្យប្រទេសនេះបញ្ឈប់ការផ្ដល់ជម្រកឲ្យក្រុមជ្រុលនិយមលាក់ខ្លួន ហើយមានសមត្ថភាពវាយប្រហារនៅលើទឹកដីអាហ្វហ្គានីស្ថាន៕