អន្តរជាតិ
រដ្ឋមន្ត្រីការបរទេស ធីល័រសិន ថា អាមេរិកមិនយកកូរ៉េខាងជើងធ្វើសត្រូវទេ រដ្ឋមន្រ្តីការបរទេសអាមេរិក រិច ធីល័រសិន ក្នុងសន្និសីទកាសែតថ្ងៃទី១ ខែសីហា (រូបភាពពី Flickr ក្រសួងការបរទេសអាមេរិក)
× រដ្ឋមន្ត្រីការបរទេសអាមេរិក លោក រិច ធីល័រសិន (Rex Tillerson) បានប្រកាសថា អាមេរិកមិនបានព្យាយាមទម្លាក់របបដឹកនាំរបស់លោក គីម ជុងអ៊ុន ឡើយ ហើយក៏មិនចង់ធ្វើសង្គ្រាមជាមួយកូរ៉េខាងជើងដែរ។ ប៉ុន្តែលោក ធីល័រសិន បញ្ជាក់ដែរថា ក្រុងវ៉ាស៊ីនតោននៅតែប្រកាន់ជំហរចង់ឲ្យក្រុងព្យុងយ៉ាងបញ្ឈប់មហិច្ឆតានុយក្លេអ៊ែររបស់ខ្លួន ហើយវ៉ាស៊ីនតោនសុខចិត្តចរចា បើព្យុងយ៉ាងពិតជាបោះបង់នុយក្លេអ៊ែរចោលមែន។
យើងមិនចង់ផ្លាស់ប្ដូររបបដឹកនាំឡើយ! យើងមិនចង់ផ្ដួលរំលំរបបដឹកនាំឡើយ! យើងមិនចង់បង្រួបបង្រួមកូរ៉េដោយបង្ខំឡើយ! នេះគឺជាបញ្ជាក់ច្បាស់ៗរបស់រដ្ឋមន្ត្រីការបរទេសអាមេរិក រិច ធីល័រសិន ជុំវិញបញ្ហាកូរ៉េខាងជើង ដែលក្បាលរឹងមិនស្ដាប់នរណា និងតែងបាញ់សាកល្បងមីស៊ីលផ្គើនគេឯងរហូតមក។ លោក ធីល័រសិន និយាយបែបនេះ បន្ទាប់កូរ៉េខាងជើងអះអាងថាខ្លួនពិតជាមានសមត្ថភាពបាញ់មីស៊ីលទៅដល់គ្រប់ផ្នែកទាំងអស់របស់អាមេរិក។
ក្នុងសន្និសីទសារព័ត៌មាននៅថ្ងៃទី១ ខែសីហា ប្រមុខការទូតអាមេរិករូបនេះនិយាយទៀតថា អាមេរិកក៏មិនបានរកលេសដើម្បីបញ្ជូនទ័ពទៅកាន់ខ្សែស្របទី៣៨ ដើម្បីធ្វើសង្គ្រាមជាមួយកូរ៉េខាងជើងដែរ ហើយអាមេរិកក៏បានប្រាប់កូរ៉េខាងជើងជារឿយៗដែរទាក់ទងបញ្ហានេះ។ លោក ធីល័រសិន អះអាងថា អាមេរិកមិនយកកូរ៉េខាងជើងជាសត្រូវទេ ហើយក៏មិនបានគំរាមកូរ៉េខាងជើងដែរ ប៉ុន្តែកូរ៉េខាងជើងទៅវិញទេ ដែលបង្កការគំរាមកំហែងឲ្យអាមេរិកនោះ។
អាមេរិកមិនយកកូរ៉េខាងជើងជាសត្រូវមែន តែលោក ធីល័រសិន បញ្ជាក់ថា អាមេរិកក៏មិនអាចនៅស្ងៀម ហើយមិនតបតសកម្មភាពរបស់កូរ៉េខាងជើងដែរ។ យ៉ាងណាក្ដី អាមេរិកនៅតែប្រកាន់ជំហរចរចា បើរបបដឹកនាំកូរ៉េខាងជើងយល់ព្រមបញ្ឈប់កម្មវិធីនុយក្លេអ៊ែរនោះ។ រដ្ឋមន្ត្រីការបរទេសអាមេរិក ដែលកាន់តំណែងបាន៦ខែរូបនេះ ជឿថាកូរ៉េខាងជើងនឹងយល់នៅពេលណាមួយ ហើយងាកមកដើរលើផ្លូវត្រូវវិញ ដើម្បីរក្សាសន្តិភាព និងការរីកចម្រើនផ្នែកសេដ្ឋកិច្ចជាដើម។
ទាក់ទងបញ្ហាកូរ៉េខាងជើងនេះដែរ លោក ធីល័រសិន ហាក់ប្រកាន់ជំហរខុសពីប្រធានាធិបតី ដូណាល់ ត្រាំ និងប្រេសិតអាមេរិកនៅ UN លោកស្រី Nikki Haley ជុំវិញតួនាទីរបស់ចិនក្នុងការលុបបំបាត់នុយក្លេអ៊ែរនេះ។ លោក ត្រាំ តែងបន្ទោសចិនដែលមិនព្រមធ្វើអ្វីលើកូរ៉េខាងជើង ប៉ុន្តែលោក ធីល័រសិន យល់ថា ចិនមិនមែនអ្នកត្រូវទទួលការស្ដីបន្ទោសឡើយ តែកូរ៉េខាងជើងឯណោះទើបសក្តិសមជាង ព្រោះអ្វីៗចាប់ផ្ដើមពីមហិច្ឆតាអភិវឌ្ឍអាវុធប្រល័យលោករបស់មេដឹកនាំកូរ៉េខាងជើងតែម្ដង។
បើតាមការលើកឡើងរបស់លោក ធីល័រសិន កូរ៉េខាងជើងមិនចាំបាច់ប្រឹងប្រែងប្រមូលធនធានទាំងអស់ដែលខ្លួនដើម្បីផលិតនុយក្លេអ៊ែរ ឬមីស៊ីលរំលងទ្វីបទុកការពារខ្លួនពីការវាយប្រហាររបស់អាមេរិកឡើយ ព្រោះអាមេរិកនឹងមិនធ្វើសង្គ្រាមទេ។ យ៉ាងណាមិញ កូរ៉េខាងជើងតែងអះអាងថានុយក្លេអ៊ែររបស់ខ្លួន គឺប្រើប្រាស់ដើម្បីទប់ទល់នយោបាយវាតទីបង្ករឿងរបស់អាមេរិក ហើយខ្លួនក៏មិនទុកចិត្តអាមេរិកដែរ៕
Tag:
អាមេរិក
កូរ៉េខាងជើង
រិច ធីល័រសិន
© រក្សាសិទ្ធិដោយ thmeythmey.com