អន្តរជាតិ
ត្រាំ ចុះហត្ថលេខាដាក់ទណ្ឌកម្មលើរុស្ស៊ីទាំងមិនសប្បាយចិត្ត ប្រធានាធិបតី ដូណាល់ ត្រាំ ពេលជួបជាមួយប្រធានាធិបតី វ្ល៉ាឌីមៀ ពូទីន នៅអាល្លឺម៉ង់ (រូបភាព Xinhua)
× ទីបំផុត ទណ្ឌកម្មលើរុស្ស៊ីនៅតែចេញជារូបរាងទាល់តែបាន។ ប្រធានាធិបតីអាមេរិក ដូណាល់ ត្រាំ ដែលគ្មានជម្រើសអ្វីផ្សេង បានចុះហត្ថលេខាលើកញ្ចប់ទណ្ឌកម្មដែលអនុម័តដោយសភាទាំងពីរ ទាំងមិនសប្បាយចិត្ត ព្រោះវាប៉ះពាល់ដល់ការប្រឹងប្រែងរបស់លោកក្នុងការពង្រឹងទំនាក់ទំនងឡើងវិញជាមួយរុស្ស៊ី។ ឯរុស្ស៊ីវិញចាត់ទុកទណ្ឌកម្មថ្មីនេះថាបានបំផ្លាញទំនាក់ទំនងទ្វេភាគី និងឈានដល់ការបង្កសង្គ្រាមពាណិជ្ជកម្មទៀតផង។
ប្រធានាធិបតី ដូណាល់ ត្រាំ បានចុះហត្ថលេខាលើសេចក្ដីព្រាងកញ្ចប់ទណ្ឌកម្មថ្មីលើរុស្ស៊ី អ៊ីរ៉ង់ និងកូរ៉េខាងជើងឲ្យក្លាយជាច្បាប់ហើយនៅថ្ងៃទី២ ខែសីហា ក្នុងពិធីមួយដ៏ស្ងប់ស្ងាត់សោះកក្រោះនៅក្នុងសេតវិមាន។ លោក ត្រាំ មិនពេញចិត្តទាល់តែសោះនឹងទណ្ឌកម្មថ្មីនេះ និងរិះគន់ថាបានប៉ះពាល់នយោបាយការបរទេសរបស់លោកទៀតផង។ ប៉ុន្តែលោកក៏មិនអាចប្រឆាំងការសម្រេចរបស់សភាបានដែរ ដ្បិតសេចក្ដីព្រាងទណ្ឌកម្មនេះត្រូវបានអនុម័តដោយសំឡេងលើសលប់ឯណោះ។
ក្នុងសារផ្ញើទៅកាន់សភាទាំងពីរ លោក ត្រាំ និយាយថា បើទោះជាលោកចង់បានទណ្ឌកម្មធ្ងន់ៗលើរុស្ស៊ី ក៏ដូចជាអ៊ីរ៉ង់ និងកូរ៉េខាងជើងក្ដី ច្បាប់ដែលលោកទើបហត្ថលេខានេះពិតជាមានចន្លោះប្រហោងច្រើនណាស់។ មិនតែប៉ុណ្ណោះ លោក ត្រាំ ក៏បានហៅសេចក្ដីព្រាងច្បាប់របស់សភាទាំងពីរ ជាការជ្រៀតជ្រែកកិច្ចការស្ថាប័ននីតិប្រតិបត្តិក្នុងការអនុវត្តនយោបាយការបរទេស បំពានអំណាចប្រធានាធិបតី និងផ្ទុយពីរដ្ឋធម្មនុញ្ញទៀតផង។
បើតាមច្បាប់ថ្មីដែលលោក ត្រាំ ចុះហត្ថលេខា ទណ្ឌកម្មណាមួយមិនអាចត្រូវបានព្យួរ ឬលើកលែងឡើយ បើគ្មានការសម្រេចចិត្តរបស់សភាជាមុនសិន។ នេះមានន័យថា នៅពេលខាងមុខ បើប្រធានាធិបតី ត្រាំ ចង់បញ្ចប់ទណ្ឌកម្មលើរុស្ស៊ី ឬប្រទេសផ្សេង ត្រូវតែមានការឯកភាពពីសភាសិន មិនមែនចេញសេចក្ដីសម្រេចតែម្នាក់ឯងឡើយ។ ត្រង់ចំណុចនេះហើយដែលលោក ត្រាំ មិនពេញចិត្ត ប៉ុន្តែលោកត្រូវតែបង្ខំចិត្តធ្វើតាមសភាដដែល។
នៅរុស្ស៊ីឯណោះវិញ នាយករដ្ឋមន្ត្រី ឌីមីទ្រី ម៉េដវ៉េដេវ បានបង្ហោះវែងអន្លាយក្នុងន័យរិះគន់ច្បាប់ថ្មីនេះ។ លោក ម៉េដវ៉េដេវ ចាត់ទុកទណ្ឌកម្មថ្មី គឺជាប្រកាសសង្គ្រាមសេដ្ឋកិច្ចប្រឆាំងរុស្ស៊ី ហើយលោកថា បើគ្មានបដិហារ្យកើតឡើងទេ ទណ្ឌកម្មនឹងនៅតែស្ថិតនៅរាប់ទសវត្សរ៍ទៅមុខទៀត។ បើតាមសារព័ត៌មាន RT នាយករដ្ឋមន្ត្រីរុស្ស៊ីក៏បានរិះគន់សេតវិមានដែលមិនអាចជម្នះសម្ពាធក្នុងស្រុកបាន និងមានចំណុចខ្សោយដែលអាចឲ្យសភាប្រើប្រាស់ដើម្បីវាយប្រហារលើរុស្ស៊ី។
ជាមួយគ្នានោះ លោក ម៉េដវ៉េដេវ ក៏ទស្សទាយដែរថា លោក ត្រាំ ទំនងជាអង្គុយកៅអីប្រធានាធិបតីមិនបានយូរឡើយ។ លោកបញ្ជាក់ថា រដ្ឋបាលលោក ត្រាំ បានប្រគល់អំណាចនីតិប្រតិបត្តិឲ្យសភា ដែលនាំឲ្យតុល្យភាពអំណាចក្នុងនយោបាយអាមេរិកប្រែប្រួល ហើយវានឹងនាំដល់ការទម្លាក់លោក ត្រាំ មិនខាន។ បើតាមលោក ម៉េដវ៉េដេវ អ្នកនយោបាយមានអំណាចអាមេរិក មិនចូលចិត្តលោក ត្រាំ ទេ ហើយពួកគេបណ្ដេញលោក ត្រាំ ចេញពីតំណែងមិនខាន៕
Tag:
អាមេរិក
ដូណាល់ ត្រាំ
រុស្ស៊ី
© រក្សាសិទ្ធិដោយ thmeythmey.com