អន្តរជាតិ
អាមេរិកចង់ផ្ដាច់ដង្ហើមការទូតកូរ៉េខាងជើង ដោយស្នើព្យួរសមាជិកភាពនៅកិច្ចប្រជុំ ARF កិច្ចប្រជុំ ARF នៅឡាវ (រូបភាព Wikimedia Commons)
× អាមេរិកកំពុងស្វែងរកការចរចាជាមួយភាគីពាក់ព័ន្ធដើម្បីឈានដល់ការព្យួរសមាជិកភាពរបស់កូរ៉េខាងជើងក្នុងកិច្ចប្រជុំវេទិកាតំបន់អាស៊ាន (ARF) ដែលជាវេទិកាសន្តិសុខដ៏ធំមួយនៅក្នុងតំបន់។ មន្ត្រីអាមេរិក និងហ្វីលីពីន និយាយថា បំណងព្យួរសមាជិកភាពរបស់កូរ៉េខាងជើង គឺជាផ្នែកមួយនៃការប្រឹងប្រែងផ្ដាច់ដង្ហើមការទូតរបស់កូរ៉េខាងជើង និងដើម្បីបង្ខំឲ្យរដ្ឋឯកោមួយនេះបញ្ចប់កម្មវិធីនុយក្លេអ៊ែរ ក៏ដូចជាការសាងល្បងមីស៊ីលផង។
ឧបការីរទទួលបន្ទុកកិច្ចការអាស៊ីខាងកើត និងប៉ាស៊ីហ្វិក លោកស្រី Susan Thornton និយាយថា កូរ៉េខាងជើង មិនសក្តិសមនឹងបន្តជាសមាជិកវេទិកាតំបន់អាស៊ាន (ARF) ឡើយ ព្រោះកូរ៉េខាងជើងបានបំពានគោលការណ៍បង្ការជម្លោះរបស់វេទិកានេះ។ ចំណុចបំពាន គឺកូរ៉េខាងជើងបានសាកល្បងមីស៊ីល និងបន្តមហិច្ឆតាអភិវឌ្ឍនុយក្លេអ៊ែរ ដែលបង្ការគំរាមកំហែងដល់សន្តិសុខតំបន់ និងពិភលោកផង។
ថ្លែងប្រាប់អ្នកសារព័ត៌មានក្នុងរដ្ឋធានីវ៉ាស៊ីនតោននៅថ្ងៃទី២ ខែសីហា លោកស្រី Thornton បញ្ជាក់ថា អាមេរិកចង់បានការពិភាក្សាជុំវិញការព្យួរសមាជិកភាពប្រទេសមួយពីអង្គការដែលមានគោលការណ៍បង្ការជម្លោះ។ លោកស្រីបន្តថា អាមេរិកកំពុងពិភាក្សាជាមួយដៃគូដើម្បីមានចំណាត់ការបន្ថែមទៀតក្នុងការដាក់សម្ពាធលើរបបដឹកនាំក្រុងព្យុងយ៉ាង ក៏ដូចជាផ្ដាច់ផ្លូវការទូតដែលធ្វើឲ្យរដ្ឋមួយនេះកាន់តែឯកោឡើង។
មន្ត្រីហ្វីលីពីនបានប្រាប់ទីភ្នាក់ងារព័ត៌មាន AP ថា មន្ត្រីអាមេរិកបានជជែកជាមួយមន្ត្រីហ្វីលីពីនជុំវិញបញ្ហានេះ ប៉ុន្តែបានប្រាប់អាមេរិកវិញថា កូរ៉េខាងជើងគួរតែអនុញ្ញាតឲ្យបន្តនៅក្នុង ARF ទៀតដើម្បីបញ្ចុះបញ្ចូលឲ្យរដ្ឋកុម្មុយនីស្តមួយនេះបោះបង់កម្មវិធីនុយក្លេអ៊ែរ។ នៅមុននេះ មន្ត្រីការទូតជាន់ខ្ពស់កូរ៉េខាងជើង ទើបបញ្ចប់ទស្សនកិច្ចនៅក្រុងម៉ានីល ដែលគេជឿថា មានគោលដៅចង់ឲ្យហ្វីលីពីនដែលជាប្រធានអាស៊ាន បិទសំណុំរឿងនុយក្លេអ៊ែររបស់ខ្លួន។
កិច្ចប្រជុំវេទិកាអាស៊ាន ដែលមានសមាជិក២៧ប្រទេស នឹងរៀបចំក្នុងរដ្ឋធានីម៉ានីលនៅសប្ដាហ៍ក្រោយ។ រដ្ឋមន្ត្រីការបរទេសអាមេរិក រិច ធីល័រសិន និងរដ្ឋមន្ត្រីការបរទេសកូរ៉េខាងជើង រី យ៉ុងហូ ក៏មានវត្តមានក្នុងកិច្ចប្រជុំនេះដែរ ប៉ុន្តែនឹងមិនមានជំនួបទ្វេភាគីឡើយ។ គេរំពឹងថា ក្នុងកិច្ចប្រជុំលើក អាមេរិក កូរ៉េខាងត្បូង ជប៉ុន និងអូស្ត្រាលីជាដើម ប្រាកដជាជំរុញឲ្យសមាជិកផ្សេងទៀត ថ្កោលទោសទង្វើរបស់កូរ៉េខាងជើងមិនខាន។
យ៉ាងណាក្ដី បំណងព្យួរសមាជិកភាពរបស់កូរ៉េខាងជើងក្នុងកិច្ចប្រជុំ ARF មិនមែនជារឿងងាយស្រួលឡើយ។ ដូចកិច្ចប្រជុំអាស៊ានដែរ ARF សម្រេចចិត្តលើបញ្ហាដោយពឹងផ្អែកលើគោលការណ៍ឯកច្ឆន្ទ។ ពោលគឺមានន័យថា បើសមាជិកណាមួយប្រឆាំង ការសម្រេចចិត្តរបស់ ARF មិនអាចលេចជារូបរាងបានឡើយ។ ក្នុងចំណោមសមាជិក ARF ទាំងអស់ គេឃើញមានប្រទេសច្រើនដែលរក្សាទំនាក់ទំនងជិតស្និទ្ធជាមួយកូរ៉េខាងជើង ដែលនេះនឹងបង្កការលំបាកខ្លាំងដល់ការប្រឹងប្រែងរបស់អាមេរិក៕
Tag:
អាមេរិក
កូរ៉េខាងជើង
អាស៊ាន
ARF
© រក្សាសិទ្ធិដោយ thmeythmey.com