ជាតិ
ACU បានចុះ MOU ជាមួយក្រុមហ៊ុនឯកជនអន្តរជាតិ៤ ដើម្បីប្រឆាំងអំពើពុករលួយ
×
អង្គភាពប្រឆាំងអំពើពុករលួយ និងក្រុមហ៊ុនឯកជនអន្តរជាតិ៤បានចុះកិច្ចហត្ថលេខាលើអនុស្សណៈនៃការយោគយល់គ្នា(MOU)ស្ដីពី កិច្ចសហប្រតិបត្តិការប្រឆាំងអំពើពុករលួយ កាលពីថ្ងៃទី០៤ សីហា នៅអង្គភាពប្រឆាំងអំពើពុករលួយ (ACU)។
ការចុះ MOU នេះជំរុញឲ្យក្រុមហ៊ុនអន្តរជាតិទាំង៤ បានកំណត់ចំនុចសំខាន់៣គឺ៖ ក្រុមហ៊ុនត្រូវប្ដេជ្ញាធ្វើជាស្ថាប័នស្អាតស្អំ កសាងនូវវប្បធម៌តម្លាភាព គោរពច្បាប់កម្ពុជា ,ក្រុមហ៊ុនត្រូវបដិសេធរាល់អំពើពុករលួយ ហើយអប់រំបុគ្គលិកមិនឲ្យមានការសូកប៉ាន់ នៅពេលទំនាក់ទំនងជាមួយនឹងមន្ត្រីរាជការ ផ្គត់ផ្គង់ អតិថិជន អង្គភាព ឬបុគ្គលដទៃ និងចាត់វិធានការប្រុងប្រយ័ត្នជាមុន ជាពិសេសការផ្ដលព័ត៌មានដល់ACU អំពីបញ្ហាប្រឈមនានា ដែលក្រុមហ៊ុនជួបប្រទះ ។
ក្រុមហ៊ុនអន្តរជាតិទាំង៤ ដែលបានចុះMOU នេះរួមមាន ក្រុមហ៊ុន មីលវីក(ខេមបូឌា) ម៉ាយក្រូ BIMA ក្រុមហ៊ុន មីដូរី ថេកផាក(ខេមបូឌា)ខបភើរេសិន ក្រុមហ៊ុន រ៉ុកកូ ហ្វីនិក និងក្រុមហ៊ុន អូកាតា(ខេមបូឌា)ភ្នំពេញ។
អនុប្រធានអង្គភាពប្រឆាំងអំពើពុករលួយ លោក ឃាង សេង បានលើកឡើងថា ការចុះ MOUនេះ នឹងជួយឲ្យក្រុមហ៊ុនក្នុងស្រុក និងអន្តរជាតិ អាចធ្វើការប្រកបរបរដោយភាពស្អាតស្អំ និងមានការទទួលខុសត្រូវខ្ពស់ចំពោះមុខច្បាប់។ លោក ឃាង សេង បានបន្តទៀតថា នៅពេលអនាគត ACU និងក្រុមហ៊ុនក្នុងស្រុកនិងអន្តរជាតិ អាចនឹងបង្កើតក្លិប MOU ដែលជាកម្លាំងចលករក្នុងការប្រឆាំងអំពើពុករលួយនៅកម្ពុជា ឲ្យកាន់តែមានសន្ទុះខ្លាំង។
លោក បន្ថែមដូច្នេះថា ៖«ការចូលរួមប្រឆាំងអំពើពុករលួយកំពុងចាប់ផ្ដើមចេញពីបុគ្គលម្នាក់ៗទៅ ជាពិសេសគឺវិស័យឯកជន។ ការចុះ MOU បង្ហាញពីសារសំខាន់កិច្ចសហប្រតិបត្តិការរវាងវិស័យសាធារណៈ និងវិស័យឯកជន ចាំបាច់ត្រូវតែធ្វើជាមួយគ្នា ក្នុងនោះរដ្ឋជាអ្នកដាក់ចេញគោលនយោបាយ និងកម្មវិធីប្រឆាំងអំពើពុករលួយ ហើយវិស័យឯកជនចាំបាច់ត្រូវកសាងប្ដេជ្ញាចិត្ត មានឆន្ទៈក្នុងការអនុវត្តប្រកបដោយការទទួលខុសត្រូវមុខសង្គម ព្រមទាំងការគោរពច្បាប់ជាធរមាន»។
ចាប់តាំងពីឆ្នាំ២០១៤មក ក្រុមហ៊ុនអន្តរជាតិ សភាពាណិជ្ជកម្ម សមាគម និងគ្រឹះស្ថានសារណៈចំនួន៨២ហើយ ដែលបានចុះអនុស្សរណៈជាមួយអង្គភាពប្រឆាំងអំពើពុករលួយ ៕
Tag:
ACU
MOU
ក្រុមហ៊ុនឯកជនអន្តរជាតិ
© រក្សាសិទ្ធិដោយ thmeythmey.com