អត្តពលិកជម្រើសជាតិកីឡាវាយសីកម្ពុជាចំនួន៦រូបនឹងចេញទៅហ្វឹកហាត់ពង្រឹងសមត្ថភាពនៅប្រទេសម៉ាឡេស៊ីរយៈពេល២សប្តាហ៍ ដើម្បីត្រៀមប្រជែងដណ្តើមមេដាយពីព្រឹត្តិការណ៍កីឡាស៊ីហ្គេមនៅប្រទេសម៉ាឡេស៊ីក្នុងខែសីហា នេះ។ អគ្គលេខាធិការសហព័ន្ធកីឡាវាយសីកម្ពុជាបានចាត់ទុកថា ការចេញទៅហ្វឹកហាត់នៅប្រទេសម៉ាឡេស៊ី វាមិនមានផលប៉ះពាល់ដល់ការស្វែងរកមេដាយរបស់កម្ពុជានោះទេ។ តែវាជាឱកាសល្អសម្រាប់អត្តពលិកកម្ពុជាទៅវិញទេ ដែលបានហ្វឹកហាត់ជាមួយប្រទេសសក្តានុពលផ្នែកកីឡាវាយសី។ លោករំពឹងថា តាមរយៈការហ្វឹកហាត់នេះ កម្ពុជានឹងទទួលបានលទ្ធផលល្អពីការចូលរួមលើកនេះ។
កីឡាករ ទេព ច័ន្ទម៉ារ៉ា, ចេង ភារុំ, យ៉ាន កុសល, ឡេង សុភត្រា, ទាវ យ៉ុងវណ្ណៈ និងកីឡាការិនី កែវ ពេជ្រឆរ៉ាវី នឹងចេញទៅហ្វឹកហាត់ពង្រឹងសមត្ថភាពនៅប្រទេសម៉ាឡេស៊ីដែលជាប្រទេសសក្តានុពលផ្នែកកីឡាវាយសី រយៈពេល២សប្តាហ៍ចាប់ពីថ្ងៃទី៧ ដល់ថ្ងៃទី២០ ខែសីហា។ ការហ្វឹកហាត់នេះ គឺដើម្បីត្រៀមប្រជែងដណ្តើមមេដាយពីព្រឹត្តិការណ៍កីឡាស៊ីហ្គេមដែលម៉ាឡេស៊ីធ្វើជាម្ចាស់ផ្ទះចាប់ពីថ្ងៃទី១៩ ដល់ថ្ងៃទី៣១ ខែសីហា នៅទីក្រុងកូឡាឡាំពួរប្រទេសម៉ាឡេស៊ី។
អគ្គលេខាធិការសហព័ន្ធកីឡាវាយសីកម្ពុជា លោក ស្តើង ជា រំពឹងថា តាមរយៈការហ្វឹកហាត់ជាមួយក្រុមកីឡាករជម្រើសជាតិរបស់ម៉ាឡេស៊ីដែលមានសក្តានុពលក្នុងតំបន់អាស៊ានផ្នែកកីឡាវាយនេះ អត្តពលិកកម្ពុជា នឹងទទួលបានបទពិសោធន៍ថ្មីៗ ដើម្បីអភិវឌ្ឍន៍សមត្ថភាពរបស់គេឲ្យកាន់តែមានការរីកចម្រើនថែមទៀត។ លើសពីនេះ លោក សង្ឃឹមថា ការចូលរួមស៊ីហ្គេមនៅម៉ាឡេស៊ីលើកនេះ កម្ពុជានឹងទទួលបានលទ្ធផលល្អជាងការចូលរួមស៊ីហ្គេមនៅសិង្ហបុរីឆ្នាំ២០១៥។
លោកបានបន្តថា ការហ្វឹកហាត់នៅប្រទេសម៉ាឡេស៊ី២សប្តាហ៍នេះ កម្ពុជាត្រូវបង់ប្រាក់ចំនួន៣ពាន់ដុល្លារឲ្យភាគីម៉ាឡេស៊ី ដើម្បីចំណាយថ្លៃម្ហូបអាហារ និងការស្នាក់នៅថែមទៀតផង។ លោកបានអះអាងថា ការហ្វឹកហាត់នៅម៉ាឡេស៊ីដែលជាម្ចាស់ផ្ទះនៃការប្រកួត មិនត្រឹមតែមិនមានផលប៉ះពាល់ តែវាជាឱកាសល្អសម្រាប់កម្ពុជាថែមទៀតផង។
លោក ស្តើង ជា បានបញ្ជាក់ថា៖«ការទទួលបានឱកាសទៅហ្វឹកហាត់នៅម៉ាឡេស៊ីវាជាឱកាសល្អសម្រាប់កម្ពុជាយើងទៅវិញទេ ព្រោះគេមានគ្រូបង្វឹកខ្លាំង និងការហ្វឹកហាត់ខ្លាំងជាងយើង។ នេះជាលើកទី១ហើយដែលមានសំណាងទៅហ្វឹកហាត់ជាប្រទេសដែលមានសក្តានុពលផ្នែកកីឡាវាយសីមួយនេះ។ ទោះបីយើងមិនហ្វឹកហាត់នៅម៉ាឡេស៊ី ក៏យើងអាចជួបប្រទេសនេះដែរ ដូច្នេះសម្រាប់លើកនេះបើយើងជួបម៉ាឡេស៊ីវាជារឿងធម្មតានោះទេ»។
បើយោងតាមលោក ស្តើង ជា អត្តពលិកវាយសីកម្ពុជាទាំង៦រូបនិងគ្រូបង្វឹក២រូប នឹងចាក់ចេញពីកម្ពុជាទៅកាន់ប្រទេសម៉ាឡេស៊ីនៅថ្ងៃទី៤ ខែសីហា ខាងមុខនេះ។ មុនដល់ពេលហ្វឹកហាត់រយៈពេល២ថ្ងៃ ពោលគឺនៅថ្ងៃទី៥ និងទី៦ អត្តពលិកកម្ពុជាទាំង៦រូបនេះនឹងចូលរួមការប្រកួតពានរង្វាន់ក្រៅផ្លូវមួយនៅប្រទេសម៉ាឡេស៊ីថែមទៀតផង។
គួរបញ្ជាក់ថា សម្រាប់ការប្រកួតកីឡាស៊ីហ្គេមនៅប្រទេសសិង្ហបុរីឆ្នាំ២០១៥ កម្ពុជាមិនទទួលបានចំណាត់ថ្នាក់នោះឡើយ ប៉ុន្តែកីឡាករ ទេព ច័ន្ទម៉ារ៉ា បានឡើងដល់វគ្គជម្រុះជុំចុងក្រោយលើវិញ្ញាសា១នាក់ទល់១នាក់ ក្រោយយកឈ្នះមីយ៉ាន់ម៉ា Oo Chan Win ២-០ និងចាញ់ម្ចាស់ផ្ទះសិង្ហបុរី Loh Kean Yew ២-០។ ចំណែកកីឡាករ ទាវ យ៉ុងវណ្ណៈ ចាប់ដៃជាមួយកីឡាករ ងួន កាណូរ៉ា ឈានដល់វគ្គជម្រុះចុងក្រោយដូចគ្នាក្រោយឈកឈ្នះឡាវ ២-០ មីយ៉ាន់ម៉ា ២-០ និងចាញ់ហ្វីលីពីន ២-០៕