ជាតិ
អន្តរជាតិ
តុលាការ ចោទប្រកាន់លោក ញឹក ប៊ុនឆៃ ចំនួន២ករណី ពាក់ព័ន្ធបទល្មើសគ្រឿងញៀន
×
ភ្នំពេញ៖ អយ្យការអមសាលាដំបូងរាជធានីភ្នំពេញ បានសម្រេចចោទប្រកាន់លោក ញឹក ប៊ុនឆៃ ប្រធានគណបក្សខ្មែររួបរួមជាតិ ចំនួនពីរករណី ពាក់ព័ន្ធសំណុំរឿងបទល្មើសគ្រឿងញៀន កាលពី១០ឆ្នាំមុន។
សេចក្តីថ្លែងការណ៍របស់សាលាដំបូងរាជធានីភ្នំពេញ បានឲ្យដឹងថា តុលាការបានចោទលោក ញឹក ប៊ុនឆៃ ពីបទ សមគំនិតក្នុងបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន។ សំណុំនេះត្រូវបានបញ្ជូនទៅចៅក្រមស៊ើបសួរ ដើម្បីចាត់វិធានការបន្តស្របតាមច្បាប់ និងនីតិវិធីជាធរមាន។
ការចោទប្រកាន់របស់តុលាការនេះ ធ្វើឡើងក្រោយពីមានលិខិតកាលពីថ្ងៃទី ២៤ កក្កដា ឆ្នាំ២០១៧ របស់ទណ្ឌិតឈ្មោះ ជា ជុង ដែលបានបរិហារៀបរាប់ឈ្មោះមេក្លោងផលិតគ្រឿងញៀនជាជនជាតិចិនមួយចំនួន ដែលក្នុងនោះមានចំណុចពាក់ព័ន្ធនឹងលោក ញឹក ប៊ុនឆៃ នៅក្នុងសំណុំរឿងដ៏ធំមួយ កាលពីឆ្នាំ២០០៧។ នេះបើតាមរយៈលិខិតរបស់ទណ្ឌិត ជា ជុង ដែលបានស្នើសុំឲ្យអគ្គនាយកដ្ឋានពន្ធនាគារ អយ្យការអមសាលាដំបូងរាជធានីភ្នំពេញ ជួយរកយុត្តិធម៌ និងបរិហារឡើងវិញអំពីសំណុំរឿងគ្រឿងញៀន ។
«ផ្នែកលើការបរិហាររបស់ទណ្ឌិតឈ្មោះ ជា ជុង ឯកសារនិងភស្តុតាងនៅក្នុងសំណុំរឿង បន្ទាប់ពីបានការស្រាវជ្រាវករណីនេះ អយ្យការអមសាលាដំបូងរាជធានីភ្នំពេញ បានរកឃើញតម្រុយបទល្មើសលើឈ្មោះ ញឹក ប៊ុនឆៃ ពាក់ព័ន្ធនឹងសំណុំរឿងគ្រឿងញៀនដូចបានរៀបរាប់ខាងលើ»។ នេះបើតាមអយ្យការអមសាលាដំបូងរាជធានីភ្នំពេញ ដែលបានបញ្ជាក់ថា ទណ្ឌិត ជា ជុង ជាអតីតទីប្រឹក្សាផ្ទាល់របស់លោក ញឹក ប៊ុនឆៃ ចាប់តាំងពីឆ្នាំ២០០៤ ដល់ឆ្នាំ២០០៧ ។
គួរបញ្ជាក់ថា កាលពីថ្ងៃទី០១ ខែមេសា ឆ្នាំ២០០៧ សមត្ថកិច្ចបានឆែកឆេរទីតាំងចិញ្ចឹមគោមួយកន្លែង ស្ថិតនៅក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បានរកឃើញនូវឧបករណ៍ផលិតគ្រឿងញៀន និងសារធាតុផលិតគ្រឿងញៀន ហើយសមត្ថកិច្ច បានឃាត់ខ្លួនជនជាតិខ្មែរ ចិន និងថៃផងដែរ។ ក្រោយមកតុលាការបានសម្រេចផ្តន្ទាទោសទណ្ឌិត ជា ជុង , ជិន ធានវិន ,ឆាយ ខាំងស៊ី ,ឆះ ណាក់ស៊ី ,ស៊ីវ ទី , វ៉ាន់ យ៉ាន់ និង គួង ដាក់ពន្ធនាគារក្នុងម្នាក់ៗកំណត់ទោសពី២៥ឆ្នាំ ដល់មួយជីវិត ពីបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន តាមមាត្រា២.២ថ្មី និងមាត្រា ៣៨.១ថ្មី នៃច្បាប់ស្តីពីវិសោធនកម្ម ច្បាប់ស្តីពីការត្រួតពិនិត្យគ្រឿងញៀន។
ប៉ុន្តែនាពេលបច្ចុប្បន្ននេះមានតែ ទណ្ឌិត ជា ជុង,ឆាយ ខាំងស៊ី ,ឆះ ណាក់ស៊ី និង វ៉ាន់ យ៉ាន់ កំពុងអនុវត្តទោសនៅពន្ធនាគារ ។ ចំណែកជនល្មើសឈ្មោះ គួង និងជនជាតិចិនផ្សេងទៀត ដែលបានគេចខ្លួននោះ សមត្ថកិច្ចកំពុងតាមចាប់ខ្លួនមកផ្តន្ទាទោសតាមច្បាប់។ នេះបើតាមសេចក្តីថ្លែងការណ៍របស់តុលាការ៕
Tag:
ញឹក ប៊ុនឆៃ
គ្រឿងញៀន
© រក្សាសិទ្ធិដោយ thmeythmey.com