អន្តរជាតិ
អាមេរិកអាចបើកប្រតិបត្តិការអាកាសដើម្បីជួយហ្វីលីពីនកម្ទេចក្រុមភេរវករនៅម៉ារ៉ាវី
× ប្រមុខកងទ័ពហ្វីលីពីន ឧត្តមសេនីយ៍ អេឌូអាដូ អាញ៉ូ (Eduardo Año) បានទទួលស្គាល់ថា កងទ័ពអាមេរិកអាចបើកយុទ្ធនាការវាយប្រហារដែនអាកាសលើក្រុមឧទ្ទាម Maute ដែលកំពុងគ្រប់គ្រងផ្នែកជាច្រើននៃទីក្រុងម៉ារ៉ាវី ភាគខាងត្បូងហ្វីលីពីន។ ប៉ុន្តែលោកឧត្តសេនីយ៍ អាញ៉ូ អះអាងថា នេះគ្រាន់តែជាផែនការដែលស្ថិតក្នុងដំណាក់ពិចារណាប៉ុណ្ណោះ ព្រោះត្រូវឆ្លងកាត់ដំណាក់ច្រើន រាប់ទាំងការបង្កើតកិច្ចព្រមព្រៀងមួយរួមគ្នា មុននឹងឈានដល់អន្តរាគមន៍ដោយផ្ទាល់។
យុទន្ធនាការរបោសសម្អាតក្រុមឧទ្ទាម Maute ពីទីក្រុងម៉ារ៉ាវី នៅតែបន្តដដែល។ កងទ័ពហ្វីលីពីន ដែលទទួលជំនួយពីអាមេរិក ចិន អូស្ត្រាលី សិង្ហបុរី បានព្យាយាមវាយបណ្ដេញក្រុមសកម្មជនដែលមានទំនាក់ទំនងជិតស្និទ្ធជាមួយក្រុមជ្រុលនិយមរដ្ឋឥស្លាម ប៉ុន្តែនៅតែមិនអាចទទួលជោគជ័យបាននៅឡើយ។ នៅថ្ងៃទី៧ ខែសីហា សារព័ត៌មានអាមេរិក NBC បានផ្សាយថាអាមេរិកកំពុងពិចារណាវាយប្រហារដែនអាកាសនៅម៉ារ៉ាវី ដើម្បីឆាប់បញ្ចប់ជម្លោះរ៉ាំរ៉ៃនេះ។
នៅថ្ងៃទី៨ ខែសីហា នាយសេនាធិការកងទ័ពហ្វីលីពីន ឧត្តមសេនីយ៍ អេឌូអាដូ អាញ៉ូ ក៏បានចេញមកអះអាងថាពិតជាមានផែនការបែបនេះមែន តែស្ថិតមិនទាន់មានការសម្រេចចិត្តយ៉ាងណាឡើយ។ បើតាមសារព័ត៌មាន The Manila Bulletin ហ្វីលីពីនមិនទាន់ទទួលបានការជូនដំណឹងផ្លូវការ ឬក៏សំណើសុំពង្រាយយុទ្ធោបករណ៍សម្រាប់ប្រតិបត្តិការដែនអាកាសពីសំណាក់អាមេរិកនៅឡើយទេមកទល់ពេលនេះ។
ប្រមុខកងទ័ពហ្វីលីពីនរូបនេះនិយាយថា ជំនួយបច្ចេកទេស និងការបណ្ដុះបណ្ដាលដែលអាមេរិកផ្ដល់ឲ្យហ្វីលីពីន ធ្វើឡើងក្រោមក្របខណ្ឌនៃសន្ធិសញ្ញាដែលមានស្រាប់។ ប៉ុន្តែទាក់ទងអន្តរាគមន៍យោធាផ្ទាល់វិញ អាចធ្វើឡើងតែក្នុងករណីហ្វីលីពីនត្រូវបានឈ្លានពានដោយប្រទេសផ្សេងប៉ុណ្ណោះ។ លោក អាញ៉ូ បានអរគុណមន្ទីរបញ្ចកោណដែលចង់ជួយហ្វីលីពីនក្នុងការប្រយុទ្ធប្រឆាំងក្រុមភេរកម្មនៅភាគខាងត្បូងហ្វីលីពីន ប៉ុន្តែបំណងនេះត្រូវឆ្លងកាត់ដំណាក់ច្រើនមុនក្លាយជាសកម្មភាពពិប្រាកដ។
បើតាមផែនការរបស់មន្ទីរបញ្ចកោណ ឧបករណ៍សង្គ្រាមរបស់កងទ័ពអាមេរិកនឹងចូលរួមដោយផ្ទាល់ក្នុងការវាយបណ្ដេញក្រុមជ្រុលនិយម ជាពិសេសយន្តហោះអត់មានអ្នកបើកបរ (UCAVS) តែម្ដង។ វាក៏នឹងជួយបង្កើនកម្លាំងកងទ័ពហ្វីលីពីនដែលសំរុកប្រយុទ្ធតទល់ក្រុមសកម្មជនភេរវករផងដែរ ហើយអ្វីកាន់តែច្បាស់លាស់ គឺវាក៏ក្លាយជាអន្តរាគមន៍ដោយផ្ទាល់ពីសំណាក់អាមេរិកមកកាន់សង្គ្រាមដែលសម្លាប់មនុស្សជាង៥០០នាក់ និងបង្ខំឲ្យប្រជាជនរាប់ម៉ឺននាក់ត្រូវភៀសខ្លួន។
សូមបញ្ជាក់ថា កងទ័ពហ្វីលីពីនបានតស៊ូដណ្ដើមទីក្រុងម៉ារ៉ាវីពីដៃក្រុមឧទ្ទាម Maute បន្ទាប់ពីត្រូវបានក្រុមនេះត្រួតត្រាតាំងពីខែឧសភាមកម្ល៉េះ។ ចំណែកឯទាហាអាមេរិកដែលមាននាទីជាទីប្រឹក្សាអមកងទ័ពហ្វីលីពីនក្នុងការប្រឆាំងភេរវកម្មនិយមតាំងពីឆ្នាំ២០០១ មក ក៏បានជួយកងទ័ពរដ្ឋាភិបាលលោក រ៉ូឌ្រីហ្គោ ឌូទើតេ ក្នុងយុទ្ធនាការរំដោះម៉ារ៉ាវីដែរ៕
Tag:
អាមេរិក
ហ្វីលីពីន
Marawi
© រក្សាសិទ្ធិដោយ thmeythmey.com