អន្តរជាតិ
រដ្ឋមន្ត្រីការពារជាតិអាមេរិក៖ កូរ៉េខាងជើងនឹងចាញ់សង្គ្រាមដែលខ្លួនឯងបង្កើត
× បន្ទាប់ពីប្រធានាធិបតី ដូណាល់ ត្រាំ គំរាមកម្ទេចកូរ៉េខាងជើងរូច រដ្ឋមន្ត្រីការពារជាតិអាមេរិក ជេមស៍ ម៉ាធីស (James Mattis) បានចេញមកព្រមានកូរ៉េខាងជើងដូចគ្នា។ លោក ម៉ាធីស ប្រាប់កូរ៉េខាងជើងកុំធ្វើសកម្មភាពដែលនាំមហន្តរាយដល់ខ្លួនឯង ព្រោះកូរ៉េខាងជើងនឹងចាញ់សង្គ្រាមដែលខ្លួនឯងជាអ្នកនាំអាទិ៍មិនខាន។ លោក ម៉ាធីស បានអួតពីឥទ្ធិពលកម្លាំងយោធាអាមេរិក និងសម្ព័ន្ធមិត្តដែលខ្លាំងលើសគេលើលោក។
សង្គ្រាមពាក្យសម្ដីរវាងអាមេរិក និងកូរ៉េខាងជើង បានឈានដល់ដំណាក់កាលមួយទៀត បន្ទាប់ពីកូរ៉េខាងជើងគំរាមវាយប្រហារតំបន់ជុំវិញកោះហ្គាមរបស់អាមេរិក។ យ៉ាងណាមិញ រដ្ឋមន្ត្រីការពារជាតិអាមេរិក ជេមស៍ ម៉ាធីស នៅថ្ងៃទី៩ ខែសីហា បានប្រាប់ឲ្យកូរ៉េខាងបញ្ឈប់ទង្វើដែលបំផ្លាញរបបដឹកនាំនិងប្រជាជនរបស់ខ្លួន ហើយត្រូវឈប់បន្តកម្មវិធីនុយក្លេអ៊ែរ ក៏ដូចជាត្រូវផ្អាកការបាញ់មីស៊ីលរំលងទ្វីបទៀត។
ក្នុងសេចក្ដីថ្លែងការណ៍ចេញផ្សាយតាមមន្ទីរបញ្ចកោណ លោក ម៉ាធីស បញ្ជាក់ថា ក្រសួងការបរទេសអាមេរិកកំពុងព្យាយាមដោះស្រាយបញ្ហាតាមផ្លូវការទូត ប៉ុន្តែកូរ៉េខាងជើងត្រូវចាំថា កងទ័ពសម្ព័ន្ធមិត្តមានសមត្ថភាពលើសគេទាំងការការពារខ្លួន និងការវាយបកវិញ។ ប្រមុខការទូតអាមេរិករូបនេះក៏រំឭកកូរ៉េខាងជើងថា សមត្ថភាពរបស់កូរ៉េខាងជើងមិនអាចប្រៀបផ្ទឹមសមត្ថភាពអាមេរិក និងសម្ព័ន្ធមិត្តបានឡើយ ហើយកូរ៉េខាងជើងនឹងចាញ់សង្គ្រាមិនខាន។
ការគំរាមរបស់លោក ម៉ាធីស ក៏ស្រដៀងគ្នានឹងសម្ដីព្រមានរបស់ប្រធានាធិបតី ដូណាល់ ត្រាំ ដែរ។ លោក ត្រាំ បានលើកឡើងថា កូរ៉េខាងជើងនឹងត្រូវវាយប្រហារដោយកំហឹងដ៏ពុះកញ្ជ្រោល បើនៅតែគំរាមវាយប្រហារអាមេរិកទៀត។ ក្នុងសេចក្ដីថ្លែងការណ៍ដដែល លោក ម៉ាធីស ក៏បានរំឭកពីបញ្ជាទីមួយរបស់លោក ត្រាំ គឺការត្រៀមខ្លួនឲ្យស្រេចបាច់នូវប្រព័ន្ធការពារមីស៊ីលបាលីស្ទិក និងអាវុធនុយក្លេអ៊ែរ។
នៅថ្ងៃទី៩ ខែសីហា លោក ត្រាំ ក៏បានបង្ហោះសារមួយតាមបណ្ដាញសង្គម Twitter របស់លោក ដែលបញ្ជាក់ពីការត្រៀមខ្លួនរបស់អាមេរិកក្នុងសង្គ្រាមជាមួយកូរ៉េខាងជើង។ លោកសរសេរថា៖ «បញ្ជាទីមួយរបស់ខ្ញុំក្នុងនាមជាប្រធានាធិបតី គឺការធ្វើទំនើបកម្មនុយក្លេអ៊ែរ ហើយឥឡូវនេះនុយក្លេអ៊ែររបស់យើងគឺខ្លាំងជាងមុន។ យើងសង្ឃឹមថាវានឹងមិនត្រូវប្រើប្រាស់ឡើយ តែយើងនឹងនៅតែជាមហាអំណាចដដែល»។
សម្ដីព្រមានរបស់លោក ត្រាំ មិនបានធ្វើឲ្យកូរ៉េខាងជើងរាថយឡើយ។ កូរ៉េខាងជើងបានគំរាមវាយប្រហារតំបន់ជុំវិញកោះហ្គាម ដែលស្ថិតក្នុងមហាសមុទ្រប៉ាស៊ីហ្វិក។ នៅថ្ងៃទី១០ ខែសីហា កូរ៉េខាងជើងបានបញ្ចេញផែនការវាយប្រហារកោះហ្គាមដោយប្រើប្រាស់មីស៊ីល Hwasong-12 ចំនួន៤គ្រាប់។ ផែនការនេះនឹងបញ្ចប់ពាក់កណ្ដាលខែសីហា ហើយមីស៊ីលនេះនឹងត្រូវហោះរំលងជប៉ុន មុននឹងធ្លាក់ចូលសមុទ្រក្បែរកោះហ្គាមប្រហែល៣០គីឡូម៉ែត្រ៕
Tag:
អាមេរិក
កូរ៉េខាងជើង
James Mattis
© រក្សាសិទ្ធិដោយ thmeythmey.com