អន្តរជាតិ
តាលីបង់កាត់ក្បាលនារីម្នាក់ពីបទទៅផ្សារតែម្នាក់ឯងដោយគ្មានស្វាមី
× នៅភាគខាងជើងនៃប្រទេសអាហ្វហ្គានីស្ថាន ដែលជាតំបន់គ្រប់គ្រងដោយពួកតាលីបង់ ស្ត្រីម្នាក់ ត្រូវកងប្រដាប់អាវុធចាប់កាត់ក្បាល បន្ទាប់ពីនាងបានដើរចូលផ្សារមួយ ដោយគ្មានវត្តមានស្វាមីនៅជាមួយ។
លោក Zabiullah Amani អ្នកនាំពាក្យខេត្ត Sar-e-Pul ភាគខាងជើងនៃប្រទេសអាហ្វហ្គានីស្ថាន ដែលកំពុងគ្រប់គ្រងដោយពួកតាលីបង់ បានអះអាងប្រាប់សារព័ត៌មានប៉ាគីស្ថាន The National ថា ស្ត្រីវ័យ៣០ឆ្នាំម្នាក់ ត្រូវទាហានតាលីបង់ កាត់ក្បាល ព្រោះគាត់បានទៅផ្សារតែម្នាក់ឯង ដោយគ្មានវត្តមានស្វាមីទៅតាម។
លោក Amani បានបញ្ជាក់ថា ស្វាមីរបស់ស្ត្រីរូបនោះ ស្ថិតនៅក្នុងប្រទេសអ៊ីរ៉ង់។ ស្ត្រីរូបនោះ បានភ្លេចខ្លួនដោយមិនបានគិតឃើញពីវិន័យដ៏តឹងរឹងរបស់ក្រុមតាលីបង់ ដែលហាមឃាត់ស្ត្រីក្នុងការដើរទីសាធារណៈ ជាពិសេសនៅតាមទីផ្សារតែម្នាក់ឯង។
ស្ត្រីដែលស្ថិតនៅក្រោមការគ្រប់គ្រងរបស់ពួកតាលីបង់ មិនមានសិទ្ធិធ្វើការ ឬទទួលបាននូវការអប់រំពិសេសណាមួយឡើយ។ ការដើរចេញក្រៅរបស់ស្ត្រីទាំងនោះ ត្រូវតែមានវត្តមានស្វាមី និងត្រូវបិទមុខជាប់ជានិច្ច ព្រោះនេះជាជំនឿ។
ករណីដ៏សាហាវនេះ មិនមែនជារឿងថ្មីនោះឡើយសម្រាប់សង្គមដែលគ្រប់គ្រងដោយពួកតាលីបង់។ កន្លងមក ស្ត្រីអាហ្វហ្គានីស្ថាន៥នាក់ ក៏ត្រូវបានសម្លាប់ផងដែរ បន្ទាប់ពីពួកគេបានទទួលអ្នកទេសចរនៅអាកាសយានដ្ឋានមួយ។ ក្រុមប្រដាប់អាវុធ បានចាប់ស្ត្រីទាំងនោះ ខណៈដែលពួកគេស្ថិតក្នុងដំណើរទៅបំពេញការងារនៅតំបន់កាន់ដាហារ ភាគខាងត្បូងនៃប្រទេស៕
Tag:
តាលីបង់
អាហ្វហ្គានីស្ថាន
© រក្សាសិទ្ធិដោយ thmeythmey.com