ត្រាំ អរគុណ ពូទីន ដែលបណ្តេញមន្ត្រីទូតអាមេរិក ព្រោះអាចបន្ថយការចំណាយបានច្រើន

អន្តរជាតិ

ត្រាំ អរគុណ ពូទីន ដែលបណ្តេញមន្ត្រីទូតអាមេរិក ព្រោះអាចបន្ថយការចំណាយបានច្រើន

11, Aug 2017 , 8:39 pm

រូបភាព

ដោយ: សៅ ផលនិស្ស័យ (Sao Phal Niseiy)

សប្តាហ៍នេះ ប្រធានាធិបតីអាមេរិកលោក ដូណាល់ ត្រាំ ចេញមុខអរគុណប្រធានាធិបតីរុស្ស៊ីលោក វ៉ាឌីមៀ ពូទីន ដែលបណ្តេញមន្ត្រីទូតខ្លួនរាប់សិបនាក់ចេញពីរុស្ស៊ីកន្លងមក។ លោក ត្រាំ បានបកស្រាយថា លោកសប្បាយចិត្តព្រោះការបន្ថយចំនួនមន្ត្រីទូតនេះជួយឲ្យរដ្ឋបាលលោក កាត់បន្ថយការចំណាយរបស់រដ្ឋបានច្រើន។

ក្រោយស្ងៀមស្ងាត់អស់ពេលប្រហែលពីសប្តាហ៍ប្រធានាធិបតីអាមេរិកលោក ដូណាល់ ត្រាំ បានចេញមុខថ្លែងអំណរគុណសមភាគីរុស្ស៊ីលោក វ្ល៉ាឌីមៀ ពូទីន ដែលបានរួមចំណែកជួយសន្សំសំចៃរដ្ឋបាលអាមេរិកដោយបណ្តេញមន្ត្រីទូតខ្លួនប្រហែល ៧៥៥នាក់។

យោងតាមទីភា្នក់ងារព័ត៌មាន Reuters លោក ដូណាល់ ត្រាំ បានថ្លែងដូច្នេះ៖« ខ្ញុំពិតជាអរគុណដែលលោក ពូទីន ដែលឲ្យមានការកាត់បន្ថយចំនួនមនុស្សយ៉ាងច្រើនព្រោះឥឡូវនេះយើងមានកញ្ចប់ប្រាក់បៀវត្សរ៍តិចតួចជាងមុន»។

លោក ត្រាំ បន្តថា៖« វាគ្មានហេតុផលណាដែលត្រូវបញ្ជូនមន្ត្រីទូតអាមេរិកដែលត្រូវរុស្ស៊ីស្នើឲ្យចាកចេញនោះ ទៅវិញឡើយ ហើយយើងនឹងសន្សំលុយបានយ៉ាងច្រើនសន្ធឹកសន្ធាប់»។

យ៉ាងណាក៏ដោយចុះ ជំហររបស់លោក ដូណាល់ ត្រាំ ផ្ទុយទាំងស្រុងពីជំហររបស់ក្រសួងការបរទេសអាមេរិកផ្ទាល់។ កន្លងមកមន្ត្រីក្រសួងការបរទេសអាមេរិកបង្ហាញការសោកស្តាយ និងខឹងសម្បារខ្លាំងចំព៉សកម្មភាពក្រុងម៉ូស្គូថែមទៀត។

ដោយឡែក គេសង្កេតឃើញថា ប្រតិកម្មមានលក្ខណៈទន់ភ្លន់ចំពោះរុស្ស៊ី របស់លោក ដូណាល់ ត្រាំ ខុសប្លែកទាំងស្រុងពីប្រតិកម្មរបស់ប្រធានាធិបតីអាមេរិកមុនៗ។ ប៉ុន្តែគេមិនដឹងច្បាស់ថា លោកនិយាយបែបកំប្លែងលេងសើចឬក៏យ៉ាងណាឡើយ។

សាស្ត្រាចារ្យសាកលវិទ្យាល័យហាវឺដ Nicholas Burns បានចោទជាសំណួរពាក់ព័ន្ធសម្តីរបស់ប្រធានាធិបតី។ លោកបានថ្លែងដូច្នេះថា៖« ប្រសិនលោក ត្រាំ និយាយលេង លោកគួរតែដឹងឲ្យបានច្បាស់ជាងនេះ។ ប្រសិនវាមិនមែនសម្តីលេងសើចទេ វាជារឿងដែលយើងមិនដែលធ្លាប់ឃើញសោះក្នុងប្រវត្តិសាស្ត្រ។ មិនដែលមានប្រធានាធិបតីអាមេរិកណានិយាយការពារសកម្មភាពបណ្តេញមន្ត្រីទូតរបស់យើងបែបនេះឡើយ»៕