សារព័ត៌មានរដ្ឋចិន៖ ចិនមិនលូកដៃទេ បើកូរ៉េខាងជើងវាយអាមេរិកមុន ហើយអាមេរិកសងសឹក

អន្តរជាតិ

សារព័ត៌មានរដ្ឋចិន៖ ចិនមិនលូកដៃទេ បើកូរ៉េខាងជើងវាយអាមេរិកមុន ហើយអាមេរិកសងសឹក

11, Aug 2017 , 10:39 pm

រូបភាព

ដោយ:

កាលពីថ្ងៃទី១១ខែសីហា សារព័ត៌មានរដ្ឋចិនបានសរសេរថា រដ្ឋាភិបាលចិននឹងរក្សាជំហរអព្យាក្រឹត បើកូរ៉េខាងជើងវាយប្រហារអាមេរិកមុន។ ប៉ុន្តែក្នុងករណីអាមេរិកវាយប្រហារមុនក្នុងបំណងផ្ដួលរលំរបបដឹកនាំកូរ៉េខាងជើងនោះ ច្បាស់ណាស់ថា ចិននឹងរារាំង។ នេះបញ្ជាក់យ៉ាងច្បាស់ពីជំហររបស់ចិនក្នុងការការពារផលប្រយោជន៍របស់ខ្លួន។

សារព័ត៌មានរដ្ឋចិន Global Times បានសរសេរក្នុងបទវិចារណកថារបស់ខ្លួនថា ក្នុងករណីអាមេរិក និងកូរ៉េខាងត្បូងនាំគ្នាផ្ដួលរលំរដ្ឋាភិបាល និងផ្លាស់ប្ដូររបបដឹកនាំកូរ៉េខាងជើងនោះ ចិននឹងរារាំងពួកគេ។ ប៉ុន្តែបើសិនជាកូរ៉េខាងជើងបាញ់មីស៊ីលចូលដីអាមេរិកនោះ ចិននឹងរក្សាជំហរអព្យាក្រឹត។

បទវិចារណកថានោះបានបញ្ជាក់ដូច្នេះ៖«ចិនត្រូវតែបញ្ជាក់មុនឲ្យបានច្បាស់ថា បើកូរ៉េខាងជើងបាញ់មីស៊ីលចូលដីអាមេរិកមុន ហើយអាមេរិកសងសឹកវិញនោះ ចិននឹងរក្សាជំហរអាព្យាក្រឹត ។ ផ្ទុយទៅវិញ បើអាមេរិកព្យាយាមផ្ដួលរលំរដ្ឋាភិបាល និងផ្លាស់ប្ដូររបបគ្រប់គ្រងរបស់កូរ៉េខាងជើង ចិននឹងរារាំងជាក់ជាមិនខាន»។

ប្រព័ន្ធផ្សព្វផ្សាយរដ្ឋចិនខាងលើបានបន្ថែមផងដែរថា ចិនចាំបាច់ត្រូវតែបញ្ជាក់យ៉ាងច្បាស់ពីគោលជំហរការពារផលប្រយោជន៍របស់ខ្លួនទៅកាន់គ្រប់ភាគីពាក់ព័ន្ធ។ ចិនប្រាកដណាស់ថា ខ្លួននឹងមិនបន្ធូរដៃឡើយក្នុងការតបត ប្រសិនជាភាគីណាមួយធ្វើឲ្យខូចខាតដល់ផលប្រយោជន៍របស់ខ្លួនក្នុងតំបន់នោះ។

កន្លងមក ចិនពិតជាមិនពេញចិត្តយ៉ាងខ្លាំងដែរចំពោះការសាកល្បងមីស៊ីលនិងអាវុធនុយក្លេអ៊ែរកូរ៉េខាងជើងម្ដងហើយម្ដងទៀត រួមទាំងអាកប្បកិរិយាអាមេរិក និងកូរ៉េខាងត្បូងដែលធ្វើឲ្យភាពតានតឹងនៅក្នុងតំបន់កាន់តែកើនឡើងខ្លាំង។ កន្លងមកចិនក៏ធ្លាប់បានអំពាវនាវដល់ភាគីទាំងអស់ឲ្យរក្សាភាពស្ងៀមស្ងាត់ និងអត់ធ្មត់ផងដែរដើម្បីបញ្ចៀសបញ្ហាប្រឈមឬវិបត្តិធ្ងន់ធ្ងរនោះ។

តាមពិតទៅ ចិនជាអ្នកដែលព្រួយបារម្ភខ្លាំងជាងគេចំពោះការផ្ទុះឡើងនៃសង្គ្រាមនៅឧបទ្វីបកូរ៉េ។ ចិនយល់ថា បើមានជម្លោះទ្រង់ទ្រាយធំនៅឧបទ្វីបកូរ៉េ ឬការផ្ទុះសង្គ្រាមកូរ៉េជាលើកទីពីរដូចកាលពីឆ្នាំ១៩៥០-១៩៥៣ អាចនឹងធ្វើឲ្យចិនពិបាកទប់ទល់បញ្ហាប្រឈមជាពិសេសលំហូរជនភៀសខ្លួនដែលឆ្លងដែនតាមព្រំដែនចិនភាគឦសាន។ មួយទៀតចិនខ្លាចមានការបង្រួបបង្រួមកូរ៉េទាំងពីរ និងមានការចងសម្ព័ន្ធភាពជាមួយអាមេរិកទៀតផង។

ម្យ៉ាងវិញទៀត ទីតាំងកូរ៉េខាងជើងអាចរារាំងការប្រឈមមុខរវាងចិននិងកងកម្លាំងអាមេរិកដែលមានមូលដ្ឋាននៅកូរ៉េខាងត្បូង ក៏ដូចជាសមុទ្រជប៉ុនទាំងមូលផងដែរ។

ដូច្នេះហើយ ទើបប្រព័ន្ធផ្សព្វផ្សាយចិនខាងលើរំលេចឲ្យឃើញពីជំហររឹងមាំមួយរបស់ចិនក្នុងការប្រឆាំងដាច់ខាតរាល់សកម្មភាពភាគីពាក់ព័ន្ធដែលចង់ផ្លាស់ប្ដូរស្ថានភាពបច្ចុប្បន្ននៅឧបទ្វីបកូរ៉េ។ នេះក៏ថា វាជាប់ពាក់ព័ន្ធនឹងផលប្រយោជន៍សម្បើមរបស់ចិន។ លើសពីនេះទៅទៀត អាមេរិក និងចិនក៏មិនគួរប្រជែងគ្នាគ្រប់គ្រងឧបទ្វីបកូរ៉េដែរ ព្រោះវាជាតំបន់ដែលមហាអំណាចទាំងពីរមានផលប្រយោជន៍យុទ្ធសាស្ដ្រដូចគ្នា៕