អន្តរជាតិ
រដ្ឋបាលត្រាំ ស្នើឲ្យរដ្ឋអាមេរិកខាងត្បូងដាក់គំនាបកូរ៉េខាងជើងដោយផ្តាច់ទំនាក់ទំនងទ្វេភាគី
× អនុប្រធានាធិបតីអាមេរិកលោក Mike Pence បានអំពានាវឲ្យបណ្តាប្រទេសអាមេរិកខាងត្បូងដកខ្លួនឲ្យឆ្ងាយឈប់ទាក់ទងជាមួយកូរ៉េខាងជើងទាំងផ្នែកការទូតក្តី និងសេដ្ឋកិច្ចពាណិជ្ជកម្មក្តី។ អាមេរិកខាងត្បូងមានទំនាក់សេដ្ឋកិច្ចនិងពាណិជ្ជកម្មជិតស្និទ្ធជាមួយកូរ៉េខាងជើង ហើយប្រទេសដែលមានទំហំពាណិជ្ជកម្មជាមួយកូរ៉េខាងជើងធំជាងគេមានប៉េរូ, ស៊ីលី និងម៉ិកស៊ិក។ ការស្នើសុំរបស់អនុប្រធានាធិបតីអាមេរិកធ្វើឡើង ក្រោយពេលកូរ៉េខាងជើងនិងអាមេរិកប្រឈមមុខដាក់គ្នាដោយសង្គ្រាមពាក្យសម្តី និងមានការគំរាមធ្វើសង្គ្រាមទៅវិញទៅមកទៀត។
សប្តាហ៍នេះកូរ៉េខាងជើងសម្រេចមិនបាញ់មីស៊ីលទៅកាន់តំបន់ក្បែរកោះហ្គាម ដូចខ្លួនព្រមាននោះឡើយ។ គ្រប់គ្នាសាទរ ពេលឃើញរបបដឹកនាំក្រុងព្យុងយ៉ាងសម្រេចបែបនេះ ព្រោះវាអាចបញ្ចៀសអស្ថិរភាព និងជម្លោះប្រដាប់អាវុធរវាងអាមេរិក និងកូរ៉េខាងជើងបាន។ ប្រធានាធិបតីដូណាល់ ត្រាំ មិនបានបង្អែរបង្អង់យូរឡើយ ដោយលោកចេញមុខកោតសរសើរថា មេដឹកនាំកូរ៉េខាងជើងលោក គីម ជុងអ៊ុន ឆ្លាតនិងសម្រេចចិត្តបានត្រឹមត្រូវនិងសមហេតុផលផងដែរ។
យ៉ាងណាមិញ អាមេរិកមិនបានបញ្ឈប់ការស្វះស្វែងជំរុញឲ្យមានការដាក់សម្ពាធក្រុងព្យុងយ៉ាងឡើងជាពិសេសអនុវត្តទណ្ឌកម្មក្រុមប្រឹក្សាសន្តិសុខអង្គការសហប្រជាជាតិឲ្យបានពេញលេញនិងមានប្រសិទ្ធភាពជាដើម។ សប្តាហ៍នេះ គេឃើញមហាយក្សចិនដែលជាខ្នងបង្អែកកូរ៉េខាងជើងដ៏ធំតែមួយគត់នោះបានសម្រេចអនុវត្តដំណោះស្រាយក្រុមប្រឹក្សាសន្តិសុខដោយផ្អាកនាំចូលរ៉ែដែក, ដែកនិងអាហារសមុទ្រពីកូរ៉េខាងជើងថែមទៀត។ វាជាសញ្ញាមួយបង្ហាញឲ្យឃើញថា កូរ៉េខាងជើងកាន់តែឯកោ ហើយប្រទេសនេះកាន់តែរងគ្រោះដោយសារបាត់បង់ប្រភពចំណូលជាដង្ហើមសម្រាប់របបដឹកនាំក្រុងព្យុងយ៉ាងទៀតផង។
អាមេរិកអំពាវនាវឲ្យអាមេរិកខាងត្បូងឈប់រាប់អានកូរ៉េខាងជើង
ស្របពេលដែលបញ្ហាកូរ៉េខាងជើងនៅតែក្តៅ សហរដ្ឋអាមេរិកបន្តជំរុញឲ្យប្រទេសជាមិត្តនៅទូទាំងពិភពលោក ជាពិសេសនៅអាមេរិកខាងត្បូងឈប់រាប់រក និងរកស៊ីជាមួយកូរ៉េខាងជើងទៀត។ សប្តាហ៍នេះដែរ អនុប្រធានាធិបតីអាមេរិក លោក Mike Pence បានចាប់ផ្តើមដំណើរទស្សនកិច្ចរបស់លោកនៅអាមេរិកឡាទីនដើម្បីបញ្ចុះបញ្ចូលឲ្យបណ្តាប្រទេសទាំងនេះចូលរួមដាក់សម្ពាធវេណេស៊ុយឡា និងផ្តាច់ទំនាក់ទំនងជាមួយកូរ៉េខាងជើងថែមទៀត។
ថ្ងៃពុធទី ១៦ ខែសីហា លោក បានអញ្ជើញទៅដល់ប្រទេសស៊ីលី ហើយលោកបានជួបពិភាក្សាជាមួយលោកស្រីប្រធានាធិបតីស៊ីលី Michelle Bachelet ផងដែរ។យោងតាមទីភ្នាក់ងារព័ត៌មាន AFP ឈរទន្ទឹមជាមួយប្រធានាធិបតីស៊ីលីក្នុងសន្និសីទសារព័ត៌មានរួមគ្នា លោក Mike Pence បាននិយាយដូច្នេះ៖ «យើងសូមអំពាវនាវយ៉ាងទទូចឲ្យប្រទេសស៊ីលី ប្រេស៊ីល ប៉េរូ និងម៉ិកស៊ិកផងឲ្យនាំគ្នាផ្តាច់ទំនាក់ទំនងពាណិជ្ជកម្ម និងការទូតជាមួយកូរ៉េខាងជើង »។
លោកបន្តថា អាមេរិកស្វាគមន៍ការសម្រេចកំណត់ស្រានាំចេញទៅកាន់កូរ៉េខាងជើងជាទំនិញពិសេសស្ថិតក្រោមទណ្ឌកម្មអាមេរិក ហើយវាអាចទប់ស្កាត់កូរ៉េខាងជើងមិនឲ្យទទួលបានទំនិញទាំងនេះបាន និងប្តូរជាលុយដើម្បីគាំទ្ររបបដឹកនាំបច្ចុប្បន្នឡើយ។
ក្រោយលោក Mike Pence ថ្លែងបែបនេះ រដ្ឋមន្ត្រីការបរទេស Heraldo Munoz តបវិញថា ស៊ីលីគោរពការស្នើសុំរបស់អាមេរិកប៉ុន្តែស៊ីលីនឹងបន្តទំនាក់ទំនងដែលខ្លួនមានជាមួយកូរ៉េខាងជើងព្រោះវាជាទំនាក់ទំនងកម្រិតឆ្ងាយប៉ុណ្ណោះ។ ហើយស៊ីលីក៏បានអនុវត្តទណ្ឌកម្មអង្គការសហប្រជាជាតិយ៉ាងខ្ជាប់ខ្ជួនទៅហើយដែរ។
របាយការណ៍ស្ថាប័នអាមេរិកដែលទទួលបន្ទុក ឆ្នាំ ២០១៥ របស់អាមេរិកបានបង្ហាញថា កូរ៉េខាងជើងបាននាំចូលស្រាដែលមានតម្លៃ ៦៥០០០ ដុល្លារអាមេរិក ខណៈដែល ប៉េរូនាំចេញរ៉ែទង់ដែងមានទំហំ ២២លានដុល្លារទៅកាន់កូរ៉េខាងជើង ហើយម៉ិកស៊ិកនាំចេញប្រេងដែលទំហំ ៤៥ លានដុល្លារ ទៅកាន់កូរ៉េខាងជើងដូចគ្នា។
យ៉ាងណាក៏ដោយចុះ ប្រធានាធិបតី Bachelet បានអំពាវនាវទៅកាន់ភាគីពាក់ព័ន្ធជាពិសេសអាមេរិកនិងកូរ៉េខាងជើងផងនោះឲ្យបន្តការសន្ទនាគ្នាដោយប្រើប្រាស់មធ្យោបាយការទូត។ លោកស្រីក៏រំពឹងថា ប្រទេសផ្សេងទៀតដូចជារុស្ស៊ី ចិន កូរ៉េខាងត្បូងចូលរួមទាំងអស់គ្នាដើម្បីធានាថា ឧបទ្វីបកូរ៉េគ្មានអាវុធនុយក្លេអ៊ែរ៕
Tag:
Mike Pence
កូរ៉េខាងជើង
អាមេរិកខាងត្បូង
© រក្សាសិទ្ធិដោយ thmeythmey.com