ជាតិ
សេដ្ឋកិច្ច
ក្រុមហ៊ុន KrisEnergy មានពេល២ខែទៀតដើម្បីសម្រេចចិត្តវិនិយោគបូមប្រេងក្នុងប្លុកAជាផ្លូវការ
× ភ្នំពេញ៖ រដ្ឋាភិបាល និងក្រុមហ៊ុន KrisEnergy ពីប្រទេសសិង្ហបុរី នៅថ្ងៃទី២៣ខែសីហានេះ បានឈានដល់កិច្ចព្រមព្រៀងអភិវឌ្ឍន៍អណ្ដូងប្រេងកាតនៅក្នុងប្លុក A ដែលនឹងបើកផ្លូវដល់ការបូមយកដំណក់ប្រេងលើកដំបូងក្នុងសម័យចុងក្រោយនេះរបស់កម្ពុជា។
តាមរយៈកិច្ចព្រមព្រមនេះ ក្រុមហ៊ុននេះមានរយៈពេល ៦០ថ្ងៃ ដើម្បីធ្វើការសម្រេចចិត្តវិនិយោគចុងក្រោយ។ បានសេចក្ដីថា ក្រុមហ៊ុនមិនទាន់សម្រេចចិត្តវិនិយោគជាផ្លូវការនោះទេ។ លោក ជៀប សួរ អគ្គនាយកនៃអគ្គនាយកដ្ឋានប្រេងនៃក្រសួងរ៉ែ និងថាមពល បញ្ជាក់យ៉ាងដូច្នេះថា៖«ក្រុមហ៊ុនត្រូវប្រជុំផ្ទៃក្នុងដើម្បីសម្រេចចិត្ត ដែលជាលំនាំទូទៅនៃការវិនិយោគធំៗតែងតែធ្វើ។ បើគាត់អត់សម្រេចចិត្តទេ មានន័យថា គាត់បោះបង់ចោលការវិនិយោគនេះ»។
ទាក់ទងការសម្រេចចិត្តវិនិយោគចុងក្រោយ លោក Kelvin Tang នាយកប្រតិបត្តិក្រុមហ៊ុន KrisEnergy ឲ្យដឹងថា ក្រុមហ៊ុននឹងអាចវិនិយោគបូមប្រេងក្នុងស្ថានភាពតម្លៃប្រេងបច្ចុប្បន្ន។ លោកបញ្ជាក់ដូចនេះថា៖«យើងសម្រេចចិត្តដោយឈរលើតម្លៃប្រេងនៅពេលបច្ចុប្បន្ន ដូចនេះយើងនឹងអាចដំណើរការបាន ហើយសេដ្ឋកិច្ចសម្រាប់គម្រោងនេះនៅតែលូតលាស់លឿនក្នុងស្ថានភាពតម្លៃប្រេងទាបពេលសព្វថ្ងៃនេះ»។
ក្រុមហ៊ុននេះមិនទាន់បង្ហើបពីទុនដែលខ្លួនគ្រោងវិនិយោគសម្រាប់គម្រោងនេះនៅឡើយទេ ដោយរង់ចាំការសម្រេចចិត្តចុងក្រោយ និងការដាក់ដេញថ្លៃផ្គត់ផ្គង់សម្ភារកសាងហេដ្ឋារចនាសម្ព័ន្ធបូមប្រេង។
កិច្ចព្រមព្រៀងប្រេងកាតប្លុកAរបស់កម្ពុជា ត្រូវបានបង្កើតតាំងពីឆ្នាំ២០០២ ដោយក្រុមហ៊ុន Chevron ហើយរហូតដល់ឆ្នាំ ២០១៦ ក្រុមហ៊ុន KrisEnergy បានទិញភាគហ៊ុនទាំងអស់របស់ Chevron លើគម្រោងរុករកប្រេងក្នុងប្លុកនេះ។ មកទល់ពេលនេះ ក្រុមហ៊ុន KrisEnergy មានភាគហ៊ុន ៩៥ ភាគរយ និងរដ្ឋាភិបាលកម្ពុជាមានហ៊ុន ៥ភាគរយសម្រាប់គម្រោងនេះ។
ទម្រាំមានកិច្ចព្រមព្រៀងអភិវឌ្ឍន៍អណ្ដូងប្រេងកាតនៅថ្ងៃនេះ ភាគីរដ្ឋាភិបាល និងក្រុមហ៊ុនបានអូសបន្លាយពេលជាច្រើនឆ្នាំ។ លោក អូន ព័ន្ធមុនីរត្ន ថ្លែងថា ការអូសបន្លាយពេលនេះ គឺដោយសារភាពមិនអំណោយផលនៃសេដ្ឋកិច្ចសកលពិសេសអស្ថិរភាពតម្លៃប្រេង និងមូលហេតុផ្សេងទៀត។
កិច្ចព្រមព្រៀងថ្ងៃនេះត្រូវបានចុះហត្ថលេខាដោយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងតំណាងក្រុមហ៊ុន KrisEnergy group លោក Kelvin Tang ។
បើមានការសម្រេចចិត្តផ្លូវការលើការវិនិយោគនេះ ក្រុមហ៊ុននឹងរកបានដំណក់ប្រេងដំបូងនៅចុងឆ្នាំ២០១៩ ។ កិច្ចព្រមព្រៀងថ្ងៃនេះបើកផ្លូវដល់ការផលិតប្រេងក្នុងដំណាក់កាលទី១ ដែលតាមការប៉ាន់ស្មានមានរយៈពេលផលិតកម្ម៩ឆ្នាំ ហើយអាចផលិតបានច្រើនជាង ៣០លានបារ៉ែល។ ដំណាក់កាលទី១នេះគ្របដណ្ដប់លើ ១៩៨ គីឡូម៉ែត្រក្រឡា ក្នុងទំហំសរុប ៣០៨៣ គីឡូម៉ែត្រក្រឡារបស់ប្លុកA ។
ក្រុមហ៊ុន KrisEnergy ធ្វើប្រតិបត្តិការខួងយកប្រេងប៉ុណ្ណោះ ខណៈកម្ពុជាកំពុងកសាងរោងចក្រចម្រាញ់ប្រេងមួយរបស់ក្រុមហ៊ុន CPC ដែលជាការចាប់ដៃគ្នារវាងវិនិយោគិនចិន និងខ្មែរ។ លោក Kelvin Tang បញ្ជាក់ថា ក្រុមហ៊ុនលោកនឹងលក់ប្រេងឲ្យទៅក្រុមហ៊ុនចម្រាញ់ប្រេង មិនថាក្នុងស្រុក ឬក្រៅប្រទេស ឲ្យតែមានហេដ្ឋារចនាសម្ព័ន្ធរោងចក្រច្បាស់លាស់ និងហ៊ានប្រកួតប្រជែងនៅពេលដេញថ្លៃ៕
© រក្សាសិទ្ធិដោយ thmeythmey.com