ជាតិ
នយោបាយជាតិ
បក្សអំណាចខ្មែរ គ្រោងធ្វើសមាជ ដើម្បីរៀបចំមេដឹកនាំឡើងវិញ ក្រោយលោក សួន សេរីរដ្ឋា ក្លាយជាអ្នកទោស លោក សួន សេរីរដ្ឋា អតីតប្រធានគណបក្សអំណាចខ្មែរ ស្ថិតក្នុងបរិវេនតុលាការរាជធានីភ្នំពេញ ពេលត្រូវបាននាំទៅកាត់ទោស កាលពីថ្ងៃទី២៤ ខែសីហា ឆ្នាំ២0១៧។
× ភ្នំពេញ៖ គណបក្សអំណាចខ្មែរ នឹងធ្វើសមាជវិសាមញ្ញក្នុងពេលឆាប់ៗនេះ ដើម្បីជ្រើសតាំងប្រធាននិងអនុប្រធាន រួមទាំងរចនាសម្ព័ន្ធផ្សេងទៀត។ ផែនការនៃការរៀបចំក្បាលម៉ាស៊ីនដឹកនាំនេះ គឺធ្វើឡើងបន្ទាប់ពីលោក សួន សេរីរដ្ឋា ដែលជាអតីតប្រធានគណបក្សអំណាចខ្មែរ បានជាប់ពន្ធនាគារ។
គណបក្សអំណាចខ្មែរ នឹងធ្វើសមាជវិសាមញ្ញ នៅថ្ងៃទី៧ ខែកញ្ញា ឆ្នាំ២0១៧ ដើម្បីរៀបចំក្បាលម៉ាស៊ីនដឹកនាំឡើងវិញ បន្ទាប់ពីលោក សួន សេរីរដ្ឋា អតីតប្រធានរបស់ខ្លួន ត្រូវបានតុលាការ កាន់ទោសឲ្យជាប់ពន្ធនាគាររយៈពេល៥ឆ្នាំ ពីបទ «ញុះញង់កងទ័ព»។ លោក សួង សោភ័ណ្ឌ ប្រធានស្តីទីគណបក្សអំណាចខ្មែរ បានប្រាប់សារព័ត៌មានថ្មីៗយ៉ាងដូច្នេះ។
លោក សួង សោភ័ណ្ឌ បន្ថែមថា ការជ្រើសតាំងប្រធាន និងអនុប្រធានគណបក្ស រួមទាំងការរៀបចំគណៈកម្មការនានា គឺជារបៀបវារៈសំខាន់ៗ ដែលនឹងត្រូវលើកទៅអនុម័តនៅក្នុងសមាជវិសាមញ្ញ នាពេលខាងមុខ។ លោក សួង សោភ័ណ្ឌ បញ្ជាក់ថា មានតែរូបលោកម្នាក់ ប៉ុណ្ណោះ ដែលនឹងឈរឈ្មោះជាបេក្ខជនប្រធានគណបក្សអំណាចខ្មែរ នៅក្នុងអង្គសមាជវិសាមញ្ញ។ ប៉ុន្តែ លោក នៅមិនទាន់ដឹងច្បាស់នោះទេ ចំពោះបេក្ខជនអនុប្រធាន។
បើតាម ប្រធានស្តីទីរូបនេះ សមាជវិសាមញ្ញ ក៏នឹងពិភាក្សានិងអនុម័តលើការផ្លាស់ប្តូរសញ្ញាសម្គាល់ (Logo) របស់គណបក្សអំណាចខ្មែរ ផងដែរ។ លោក លើកឡើងពីមូលហេតុថា សញ្ញាសម្គាល់របស់គណបក្សអំណាចខ្មែរ មើលទៅស្រដៀងនឹងសញ្ញាសម្គាល់របស់ក្រសួងសាធារណការនិងដឹកជញ្ជូន ដូច្នេះត្រូវតែផ្លាស់ប្តូរ ដើម្បីកុំឲ្យមានបញ្ហាផ្លូវច្បាប់។
លោក សួង សោភ័ណ្ឌ សង្កត់ធ្ងន់ថា ការដករូបរបស់លោក សួន សេរីរដ្ឋា ដែលមានឈ្មោះជាអ្នកទោស ចេញពីផ្ទាំងផ្សព្វផ្សាយរបស់គណបក្សអំណាចខ្មែរ នៅទូទាំងប្រទេស ក៏ជារបៀបវារៈដែលនឹងត្រូវលើកទៅអនុម័តក្នុងសមាជវិសាមញ្ញ ផងដែរ ដើម្បីឲ្យស្របតាមច្បាប់ស្តីគណបក្សនយោបាយ។ លោក បន្តថា គណបក្សអំណាចខ្មែរ បានត្រៀមថវិកា ១.៥ ម៉ឺនដុល្លារ សម្រាប់ចំណាយលើការផ្លាស់ប្តូរផ្ទាំងផ្សព្វផ្សាយថ្មី នៅទូទាំងប្រទេស។
(សួង សោភ័ណ្ឌ ប្រធានស្តីទីគណបក្សអំណាចខ្មែរ)
លោក សួង សោភ័ណ្ឌ ជឿជាក់ថា គណបក្សអំណាចខ្មែរ នឹងបន្តជីវិតនយោបាយទៅមុខជានិច្ច ហើយក៏នឹងចូលរួមប្រកួតប្រជែងការបោះឆ្នោតថ្នាក់ជាតិ ក្នុងឆ្នាំ២0១៨ ដែរ។ លោក បង្ហាញពីភាពជឿជាក់ យ៉ាងដូច្នេះ៖«យើងធ្វើនយោបាយ មិនមែនពឹងតែមនុស្សម្នាក់នោះទេ។ អត់ពីសួន សេរីរដ្ឋា មានសួង សោភ័ណ្ឌ ហើយបើអត់ពី សួង សោភ័ណ្ឌ នឹងមានអ្នកផ្សេងទៀត។ ក្រោយរៀបចំរចនាសម្ព័ន្ធឡើងវិញរួចហើយ យើងសង្ឃឹមថា គណបក្សអំណាចខ្មែរ នឹងរឹងមាំជាងមុន ហើយនឹងអាចឈរជើងនៅស្រុកខ្មែរតទៅទៀត»។
លោក សួន សេរីរដ្ឋា បានប្រកាសលាលែងតំណែងជាប្រធាននិងសមាជិកភាពពីគណបក្សអំណាចខ្មែរ ក្រោយត្រូវបានសមត្ថកិច្ច ចាប់ខ្លួន កាលពីថ្ងៃទី១៣ ខែសីហា ឆ្នាំ២0១៧។
ការចាប់ខ្លួន គឺដោយសារលោក បានបង្ហោះសារលើបណ្តាញសង្គមហ្វេសប៊ុក ដែលសមត្ថកិច្ចនិងតុលាការ ចាត់ទុកថា ជាការញុះញង់កងទ័ព។ កាលពីថ្ងៃទី១២ ខែសីហា ឆ្នាំ២០១៧ លោក សួន សេរីរដ្ឋា បានសរសេរយ៉ាងដូច្នេះថា៖« [….] ពេលសង្គ្រាមកើតឡើងជាមួយប្រទេសឡាវ លទ្ធផល មិនខុសពីសង្គ្រាម ដែលកើតឡើងជាមួយប្រទេសសៀមទេ គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា។ ហើយមេទ័ព នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីយ៉ាងគគ្រឹកគគ្រេង។ [ ….]»។
ការសរសេររបស់លោក សួន សេរីរដ្ឋា គឺស្ថិតក្នុងអំឡុង ដែលរដ្ឋាភិបាលកម្ពុជា កំពុងដោះស្រាយបញ្ហាព្រំដែនជាមួយប្រទេសឡាវ។ ពេលនោះ រដ្ឋាភិបាលកម្ពុជា ដែលដឹកនាំដោយសម្តេច ហ៊ុន សែន បានបញ្ជូនកងទ័ពនិងសព្វាវុធ ទៅកាន់តំបន់ក្បែរអូរអាឡៃ និងតំបន់អូរតាង៉ាវ ព្រំដែនខេត្តស្ទឹងត្រែង ដែលកងទ័ពឡាវ ចូលមកឈរជើង។ តែកងទ័ពឡាវ បានចាកចេញពីតំបន់នោះវិញ បន្ទាប់ពីការចរចារវាងសម្តេច ហ៊ុន សែន និងលោក ថោងលន់ ស៊ីសូលីត នាយករដ្ឋមន្ត្រីនៃប្រទេសឡាវ។
នៅថ្ងៃទី២៤ ខែសីហា ឆ្នាំ២0១៧ លោក សួន សេរីរដ្ឋា ត្រូវបានកាត់ទោសឲ្យជាប់ពន្ធនាគាររយៈពេល៥ឆ្នាំ ដោយរងបទចោទចំនួនបី គឺ«បទញុះញង់កុំឲ្យយោធិនស្ដាប់បង្គាប់ បទធ្វើឱ្យខូចទឹកចិត្តកងទ័ព និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍»៕
© រក្សាសិទ្ធិដោយ thmeythmey.com