កំហុសមិនគួរកើតទាំង៤ របស់ម្ចាស់ផ្ទះម៉ាឡេស៊ី ក្នុងព្រឹត្តិការណ៍ស៊ីហ្គេម

កីឡាអន្តរជាតិ

អន្តរជាតិ

កំហុសមិនគួរកើតទាំង៤ របស់ម្ចាស់ផ្ទះម៉ាឡេស៊ី ក្នុងព្រឹត្តិការណ៍ស៊ីហ្គេម

31, Aug 2017 , 9:15 am

រូបភាព

ដោយ: ទេព ពិទូរ្យ

កីឡាស៊ីហ្គេមលើកទី២៩ដែលម៉ាឡេស៊ីធ្វើជាម្ចាស់ផ្ទះបានបញ្ចប់ការប្រកួតគ្រប់ប្រភេទកីឡារួចរាល់អស់ហើយ ក្នុងនោះម្ចាស់ទទួលបានមេដាយមាសច្រើនជាងគេរហូតដល់ ១៤៥ តាមពីក្រោយដោយថៃ ៧២ និងវៀតណាម ៥៩។ ប៉ុន្តែមានហេតុការណ៍មួយអាក្រក់ដែលម្ចាស់ផ្ទះបានប្រព្រឹត្តិឲ្យមានកំហុស ក្នុងអំឡុងការប្រកួតកីឡានេះ។

កំហុសទាំង៤ ដែលកើតឡើងមិនគួរឲ្យជឿនោះរួមមានដូចខាងក្រោម៖

១. បញ្ហាដាក់ទង់ជាតិឥណ្ឌូណេស៊ីបញ្ច្រាស
អ្នករៀបចំការប្រកួតកីឡារបស់ម៉ាឡេស៊ីបានបោះពុម្ពសៀវភៅកីឡាប្រចាំព្រឹត្តិការណ៍នេះដោយដាក់ទង់ជាតិប្រទេសជិតខាងឥណ្ឌូណេស៊ីបញ្ច្រាសពីក្រោមទៅលើ ពីលើទៅក្រោម។ កំហុសមួយនេះបានជំរុញឲ្យអ្នករៀបចំ និងក្រសួងការបរទេសម៉ាឡេស៊ីសុំទោសភាគីខាងឥណ្ឌូណេស៊ីផងដែរ។

២. កំហុសលើការដាក់ឈ្មោះប្រទេសច្រឡំជាមួយនឹងទង់ជាតិពេលបង្ហាញតារាងមេដាយ
ទូរទស្សន៍ជាតិរបស់ម៉ាឡេស៊ី RTM បានដាក់ឈ្មោះប្រទេសខុសនឹងទង់ជាតិរហូតដល់ ៨ប្រទេសក្នុងចំណោម ១១ប្រទេស ដែលបង្ហាញពីចំនួនមេដាយបណ្តោះអាសន្នក្នុងអំឡុងការផ្សាយព័ត៌មានកាលពីថ្ងៃព្រហស្បតិ៍ និងសុក្រអាទិត្យមុន។

៣. កំហុសលើអត្តពលិករបស់ម៉ាឡេស៊ីដែលពុលអាហារ
ការពុលអាហារបានក្លាយជាព័ត៌មានអាក្រក់បំផុតដែលគណៈកម្មាធិការរៀបចំការប្រកួតម៉ាឡេស៊ី (Masoc) បានជួបប្រទះក្នុងព្រឹត្តិការណ៍កីឡាអាស៊ាននេះ។ ក្នុងនោះមានអត្តពលិក ១៦ នាក់បានជួបនឹងបញ្ហាក្រពះធ្ងន់ធ្ងរដែលធ្វើឲ្យកីឡាករពីររូបរបស់ម៉ាឡេស៊ីត្រូវចូលមន្ទីរពេទ្យ និងម្នាក់ទៀតត្រូវបោះបង់ការប្រកួត។ ករណនេះត្រូវបានគេផ្តោតសំខាន់ទៅលើអាហារដែលអត្តពលិកបានបរិភោគនៅពេលស្នាក់នៅសណ្ឋាគារ Renaissance Kuala Lumpur ក្នុងទីក្រុងកូឡាឡាំពូ។

៤. កំហុសរបស់អ្នកគាំទ្របាល់ទាត់ម៉ាឡេស៊ីដែលស្រែកថា «ឆ្កែសិង្ហបុរី»
ក្រុមអ្នកគាំទ្រក្រុមបាល់ទាត់ម៉ាឡេស៊ីបានបញ្ចេញកំហឹងដោយស្រែកថា «ឆ្កែសិង្ហបុរី» "Singapore dogs" ក្នុងអំឡុងពេលប្រកួតបាល់ទាត់រវាងម៉ាឡេស៊ីជាមួយសិង្ហបុរី។
ការស្រែករបស់អ្នកគាំទ្ររបស់ម៉ាឡេស៊ីនេះ ត្រូវបានគណៈកម្មាធិការរៀបចំព្រឹត្តិការណ៍កីឡាប្រចាំតំបន់អាស៊ាន (Sea Games) លើកទី ២៩ ហៅទង្វើនេះថាជាអំពើខុសឆ្គងដ៏ធ្ងន់ធ្ងរ និងជាការសោកស្តាយយ៉ាងខ្លាំងដែលវាផ្ទុយនឹងស្មារតីនៃកីឡា។

លើសពីកំហុសទាំង៤ខាងលើរបស់ម៉ាឡេស៊ីនេះ ក៏មានការរិះគន់ពីសំណាក់ឥណ្ឌូណេស៊ី និងថៃផងដែរ។ ក្នុងនោះឥណ្ឌូណេស៊ីបានចោទម៉ាឡេស៊ីថាបានបន្លំមេដាយពីការប្រកួតកីឡាលើវិញ្ញាសាសម្តែងក្បាច់គុណ (pencak silat) គូបុរស ដោយលើកឡើងថាពួកគេទទួលពិន្ទុដោយមិនមានភាពយុត្តិធម៍ ហើយថៃក៏រិះគន់ដែរថាម្ចាស់ផ្ទះដាក់តែវិញ្ញាសាដែលខ្លួនមានប្រៀប ហើយដកវិញ្ញាសាដែលខ្លួនមិនសូវជំនាញ៕