ពីនេះ ពីនោះ
ព័ត៍មានសុខភាព
ជំងឺគ្រុនក្រហម៖ អាការៈដែលអ្នកគួរកត់ចំណាំចាប់ពីពេលនេះទៅ
× ជំងឺគ្រុនក្រហម ឬ Scarlet Fever គឺជាការបង្ករោគមួយប្រភេទដែលកើតឡើងលើអ្នកដែលមានជំងឺឈឺបំពង់ករបង្កឡើងដោយការបង្ករោគដោយពពួកបាក់តេរី Streptococcus។ ជំងឺនេះអាចសម្គាល់ដឹងតាមរយៈ ការឡើងជាកន្ទួលក្រហមៗស្រស់នៅលើរាងកាយ ដែលកើតឡើងជាមួយគ្នានឹងការក្តៅខ្លួនខ្លាំង និងឈឺបំពង់ករ។
ជំងឺគ្រុនក្រហមនេះច្រើនតែកើតឡើងលើកុមារអាយុចាប់ពី ៥ ទៅ១៥ឆ្នាំ។ វាក៏ត្រូវបានគេឃើញជាញឹកញាប់ និងបង្កជាជំងឺធ្ងន់ធ្ងរលើកុមារភាពដែរ ប៉ុន្តែសព្វថ្ងៃនេះបែរជាកម្រឃើញទៅវិញ។ ការព្យាបាលដោយថ្នាំផ្សះ គឺអាចបន្ថយភាពធ្ងន់ធ្ងររបស់ជំងឺនេះ ហើយក៏បង្ការកុំឲ្យមានបញ្ហាអ្វីផ្សេងច្រើនទៀតដែរ។ អ្នកស្រាវជ្រាវក៏មិនច្បាស់ថា ហេតុអ្វីបានជាជំងឺគ្រុនក្រហមមានការថយចុះ ខណៈពេលដែលជំងឺឈឺបំពង់ករបង្កឡើងដោយបាក់តេរីនៅតែកើតមានជាញឹកញាប់។
កន្ទួលក្រហមៗលើស្បែកច្រើនតែចាប់ផ្តើមកើតឡើងនៅលើទ្រូង និងពោះ និងរាលដាលពេញរាងកាយ។ ចំពោះស្បែកដែលផ្នត់ៗនៅជុំវិញឃ្លាគ កែងដៃ និងជង្គង់ក៏ងាយនឹងកើតជាកន្ទួលក្រហមខ្លាំងដែរ។ ជាធម្តមា កន្ទួលនេះកើតយូរបំផុតពី ២ ទៅ៧ថ្ងៃ។ ក្រោយពីវាស្រាកស្រាន្តហើយ ស្បែកដែលបាត់កន្ទួលនោះនឹងរបកចេញ ជាពិសេសចុងម្រាមដៃ និងម្រាមជើងតែម្តង។
រោគសញ្ញាផ្សេងៗទៀតរបស់ជំងឺគ្រុនក្រហមមានដូចជា៖
• ឡើងបន្ទាត់ក្រហមនៅជុំវិញឃ្លាគ កែងដៃ និងជង្គង់
• មុខទៅជាក្រហម
• សណ្តាតពណ៌ក្រហមដូចស្ត្របឺរី ឬអណ្តាតពណ៌ស ដោយមានចំណុចក្រហមៗ
• ឈឺបំពង់ករ ដោយមានចំណុចសៗ និងលឿងនៅបំពង់ករ
• ក្តៅខ្លួនចាប់ពី ៣៨.៣អង្សារឡើងទៅ
• ញ៉ាក់
• ឈឺក្បាល
• ហើមក្រពេញអាមីដាស
• ចង្អោ និងក្អួត
• ហើមក្រពេញនៅកញ្ចឹងក
• ស្បែកស្លេកៗនៅជុំវិញបបូរមាត់៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com