រដ្ឋាភិបាល ស្នើឲ្យរក្សាភាពស្ងៀមស្ងាត់ ក្រោយសមត្ថកិច្ចចាប់ឯកឧត្តម កឹម សុខា

ជាតិ

នយោបាយជាតិ

រដ្ឋាភិបាល ស្នើឲ្យរក្សាភាពស្ងៀមស្ងាត់ ក្រោយសមត្ថកិច្ចចាប់ឯកឧត្តម កឹម សុខា

03, Sep 2017 , 2:03 am

រូបភាព

ដោយ: សារព័ត៌មានថ្មីៗ

ភ្នំពេញ៖ រដ្ឋាភិបាលកម្ពុជា បានចេញសេចក្តីថ្លែងការណ៍ភ្លាមៗ ដោយស្នើឲ្យរក្សាភាពស្ងៀមស្ងាត់ បន្ទាប់ពីសមត្ថកិច្ច បានចាប់ខ្លួនឯកឧត្តម កឹម សុខា ប្រធានគណបក្សសង្គ្រោះជាតិ នៅពាក់កណ្តាលអធ្រាត្រថ្ងៃទី២ ចូលថ្ងៃទី៣ ខែកញ្ញា ឆ្នាំ២0១៧នេះ។ តាមរយៈសេចក្តីថ្លែងការណ៍ រដ្ឋាភិបាល បានអះអាងថា ការចាប់ខ្លួនឯកឧត្តម កឹម សុខា គឺស្ថិតក្នុងបទល្មើសជាក់ស្តែង។

បើតាមសេចក្តីថ្លែងការណ៍របស់រដ្ឋាភិបាល ឯកឧត្តម កឹម សុខា បានឃុបឃិតជាមួយបរទេស ក្នុងការរៀចំផែនការសម្ងាត់ ដែលធ្វើឲ្យប៉ះពាល់ដល់ប្រទេសជាតិ។ រដ្ឋាភិបាល អះអាងដូច្នេះ ដោយសំអាងលើសារនយោបាយរបស់ឯកឧត្តម កឹម សុខា នៅក្នុងវីដេអូឃ្លីប ដែលត្រូវបានផ្សាយដោយបណ្តាញមួយ ឈ្មោះ CBN (Cambodian Broadcasting Network)។

នៅក្នុងសេចក្តីថ្លែងការណ៍ រដ្ឋាភិបាល បញ្ជាក់បែបនេះថា៖«អំពើនៃការឃុបឃិតគ្នាជាសម្ងាត់ខាងលើនេះ គឺជាអំពើក្បត់ជាតិ។ […..] រដ្ឋាភិបាល សូមអំពាវនាវឲ្យរក្សាភាពស្ងៀមស្ងាត់ និងទុកករណីនេះ ជូនតុលាការ ដើម្បីចាត់ការបន្ត ជាសមត្ថកិច្ចស្របតាមច្បាប់ និងនីតិវិធីជាធរមាន»។

សារព័ត៌មានថ្មីៗមិនអាចទាក់ទងអ្នកនាំពាក្យនិងមន្ត្រីផ្សេងទៀត នៃគណបក្សសង្គ្រោះជាតិបានទេ ដោយសារតែពួកគាត់ ពុំបានលើកទូរសព្ទ។