លោក ម៉ម សូណង់ដូ៖ វិទ្យុសំបុកឃ្មុំឈប់ផ្សាយបន្តរបស់វិទ្យុអាស៊ីសេរី និងវីអូអេ ពីថ្ងៃនេះទៅ

ជាតិ

នយោបាយជាតិ

លោក ម៉ម សូណង់ដូ៖ វិទ្យុសំបុកឃ្មុំឈប់ផ្សាយបន្តរបស់វិទ្យុអាស៊ីសេរី និងវីអូអេ ពីថ្ងៃនេះទៅ

03, Sep 2017 , 1:18 pm

រូបភាព

ដោយ: ថ្មីៗ

ស្ថាបនិកវិទ្យុសំបុកឃ្មុំ ១០៥ លោក ម៉ម សូណង់ដូ បានប្រកាសថា វិទ្យុរបស់លោកនឹងឈប់ផ្សាយបន្តពីវិទ្យុអាស៊ីសេរី និងវិទ្យុសំបុកឃ្មុំចាប់ពីថ្ងៃនេះទៅ តាមការបញ្ជារបស់ក្រសួងព័ត៌មាន។

តាមរយៈសារព័ត៌មានថ្មីៗ លោក ម៉ម សូណង់ដូ បានផ្ញើសារទៅកាន់អ្នកចូលចិត្តតាមដានវិទ្យុអាស៊ីសេរី និងវីអូអេ តាមវិទ្យុរបស់លោកថា នឹងមិនមានការផ្សាយវិទ្យុអាស៊ីសេរី និងវិទ្យុសំឡេងសហរដ្ឋអាមេរិកវីអូអេ នៅលើស្ថានីយវិទ្យុ ១០៥ របស់លោកទៀតទេ។ លោកថា បើលោកនៅតែផ្សាយវិទ្យុទាំងពីរនេះ ក្រសួងព័ត៌មាននឹងដកអាជ្ញាប័ណ្ណវិទ្យុរបស់លោកទាំងស្រុង។

លោក ម៉ម សូណង់ដូ បានត្រឹមតែសម្តែងការសោកស្តាយចំពោះចំណាត់ការរបស់ក្រសួងព័ត៌មាន។ « ខ្ញុំបានត្រឹមតែសោកស្តាយ ហើយមិនដឹងធ្វើយ៉ាងម៉េចទេ មានតែធ្វើតាមគេទេ គឺឈប់ផ្សាយពីថ្ងៃនេះទៅ។ យើងដឹងហើយ បើយើងនៅតែផ្សាយគេដកអាជ្ញាប័ណ្ណយើង។ យើងមិនអាចយកក្បាលទៅជល់នឹងភ្នំបានទេ។ ខ្ញុំអស់អីនិយាយហើយ»។ នេះជាការថ្លែងរបស់លោក ម៉ម សំណង់ដូ ប្រាប់ដល់សារព័តមានថ្មីៗ។

បើតាមសេចក្តីជូនដំណឹងរបស់ក្រសួងព័ត៌មាននៅថ្ងៃទី ៣ ខែកញ្ញា នេះ ហេតុផលដែលក្រសួងហាម មិនឲ្យវិទ្យសំបុកឃ្មុំ ១០៥ ផ្សាយវិទ្យុបរទេសទាំងពីរនេះ ដោយសារក្រសួងទើបរកឃើញថា វិទ្យុអាស៊ីសេរី និងវិទ្យុវីអូអេ ពុំទាន់បានចុះបញ្ជីការិយាល័យតំណាងស្របច្បាប់នៅក្រសួងព័ត៌មាន៕