សហភាពអឺរ៉ុបរំពឹងថា មេបក្សប្រឆាំងនឹងត្រូវដោះលែង

ជាតិ

សហភាពអឺរ៉ុបរំពឹងថា មេបក្សប្រឆាំងនឹងត្រូវដោះលែង

04, Sep 2017 , 9:39 pm

រូបភាព

ដោយ: ថ្មីៗ

ភ្នំពេញ៖ ប្រតិភូសហភាពអឺរ៉ុបប្រចាំកម្ពុជា បានចេញសេចក្តីថ្លែងការណ៍មួយ ជុំវិញការចាប់ខ្លួន ឯកឧត្តម កឹម សុខា ប្រធានគណបក្សសង្គ្រោះជាតិ។ សហភាពអឺរ៉ុប បានអះអាងក្នុងសេចក្តីថ្លែងការណ៍របស់ខ្លួនថា ការចាប់ខ្លួនឯកឧត្តម កឹម សុខា ទាំងមានអភ័យឯកសិទ្ធិសភាបែបនេះ គឺបង្ហាញឲ្យឃើញថា ស្ថានភាពនយោបាយនៅកម្ពុជា រឹតតែមានគ្រោះថ្នាក់ជាមុន។

ដោយសំអាងលើអភ័យឯកសិទ្ធិសភា ឯកឧត្តម កឹម សុខា គួរតែត្រូវបានដោះលែង ឲ្យមានសេរីភាពឡើងវិញ។ នេះជាការរំពឹងរបស់សហភាពអឺរ៉ុប ក្នុងសេចក្តីថ្លែងការណ៍ស្តីពីការវិវត្តន៍ទាក់ទងនឹងការរឹតត្បិតលំហនយោបាយនៅកម្ពុជា។

តាមរយៈអ្នកនាំពាក្យរបស់ខ្លួន សហភាពអឺរ៉ុបបានសរសេរថា៖ «ដោយសំអាងលើអភ័យឯកសិទ្ធិសភា យើងរំពឹងថា អាជ្ញាធរនឹងដោះលែងឯកឧត្តម កឹម សុខា ជាបន្ទាន់»។

ក្រៅពីសហភាពអឺរ៉ុប ស្ថានទូតសហរដ្ឋអាមេរិកប្រចាំកម្ពុជា ក៏បានចេញសេចក្តីថ្លែងការណ៍ដែរ ចំពោះការចាប់ខ្លួនឯកឧត្តម កឹម សុខា។ តាមរយៈសេចក្តីថ្លែងការណ៍ ស្ថានទូតសហរដ្ឋអាមេរិក បានសម្តែងការព្រួយបារម្ភចំពោះស្ថានការណ៍នយោបាយនៅកម្ពុជា បន្ទាប់ពីឯកឧត្តម កឹម សុខា ត្រូវបានចាប់ខ្លួន។

ទោះបីជាយ៉ាងណាក៏ដោយ រដ្ឋាភិបាលកម្ពុជាបានលើកឡើងថា ឯកឧត្តម កឹម សុខា ស្ថិតក្នុងការសង្ស័យថា ឃុបឃិតជាមួយបរទេស ដែលអាចធ្វើឲ្យប៉ះពាល់ដល់ប្រទេសជាតិ។ រដ្ឋាភិបាល បានចាត់ទុក អំពើបែបនេះ ថាជាអំពើក្បត់ជាតិ។ ជាមួយគ្នានេះ សម្តេច ហ៊ុន សែន ក្នុងនាមជាប្រមុខរដ្ឋាភិបាល បានស្នើដល់បណ្តាប្រទេសនិងសហគមន៍អន្តរជាតិនានា កុំឲ្យលូកដៃចូលផ្ទៃក្នុងកម្ពុជា ខណៈតុលាការ កំពុងចាត់ការលើឯកឧត្តម កឹម សុខា៕