អន្តរជាតិ
ត្រាំ ព្រមានផ្តាច់ទំនាក់ទំនងពាណិជ្ជកម្មជាមួយរាល់ប្រទេសធ្វើជំនួញជាមួយកូរ៉េខាងជើង
× ក្រោយកូរ៉េខាងជើងបាញ់សាកល្បងអាវុធនុយក្លេអ៊ែរលើកទីប្រាំមួយ ប្រធានាធិបតីអាមេរិក បានប្រកាសថា អាមេរិកពិចារណាផ្តាច់ទំនាក់ទំនងពាណិជ្ជកម្មជាមួយរដ្ឋទាំងឡាយដែលធ្វើជំនួញជាមួយកូរ៉េខាងជើង។ វាជាវិធានការថ្មីដែលអាមេរិកចង់ប្រើដើម្បីដាក់សម្ពាធលើក្រុងព្យុងយ៉ាងព្រោះវានឹងផ្តាច់ចរន្តលុយគាំទ្ររបបដឹកនាំរដ្ឋឯកោនេះ។
ប្រធានាធិបតីអាមេរិកលោក ដូណាល់ ត្រាំ បានព្រមានបណ្តាប្រទេសដែលមានជំនួញជាមួយកូរ៉េខាងជើងឲ្យដកខ្លួនឲ្យឆ្ងាយឈប់រកស៊ីជាមួយប្រទេសនេះ បើមិនចង់ខាតបង់ប្រយោជន៍។ លោកបានសង្កត់ធ្ងន់ថា ការកាត់ផ្តាច់ទំនាក់ទំនងពាណិជ្ជកម្មទាំងស្រុងជាមួយប្រទេសហ៊ានរកស៊ីជាមួយកូរ៉េខាងជើងជាចំណាត់ការអាមេរិកកំពុងពិចារណា។
លោក ដូណាល់ ត្រាំ បានបញ្ជាក់ក្នុងគណនី Twitter ផ្លូវការរបស់ខ្លួនថា៖«បន្ថែមលើវិធានការផ្សេងទៀត អាមេរិកកំពុងពិចារណាឈប់ធ្វើពាណិជ្ជកម្មទាំងស្រុងជាមួយបណ្តារដ្ឋទាំងឡាយណាដែលមានជំនួញជាមួយកូរ៉េខាងជើង»។
ការកាត់ផ្តាច់ចំណងពាណិជ្ជកម្មជាមួយបណ្តារដ្ឋដែលមានជំនួញជាមួយកូរ៉េខាងជើងជាវិធានការមានប្រសិទ្ធភាពក្នុងការកាត់ផ្តាច់ចរន្តហិរញ្ញវត្ថុដែលកូរ៉េខាងជើងមាន។ ប៉ុន្តែគេមិនទាន់ដឹងច្បាស់ថា វិធានការនេះនឹងត្រូវអនុវត្តនៅពេលណាឡើយ ដ្បិតថា មន្ត្រីជាន់ខ្ពស់អាមេរិកធ្លាប់លើកឡើងពីបញ្ហានេះដែរកន្លងមក។
ដោយឡែករដ្ឋមន្ត្រីសេដ្ឋកិច្ចអាមេរិក Steven Mnuchin បានថ្លែងនៅថ្ងៃអាទិត្យសប្តាហ៍មុនថា ក្រសួងលោកកំពុងរៀបចំវិធានការដែលអាចដាក់ចេញដើម្បីកាត់ផ្តាច់ប្រភពចំណូលនិងចរន្តសេដ្ឋកិច្ចរបស់ក្រុងព្យុងយ៉ាងផង។
សារព័ត៌មាន Fox News បានស្រង់សម្តីលោកដូច្នេះថា៖« ខ្ញុំនឹងព្រាងកញ្ចប់ទណ្ឌកម្មថ្មី និងបញ្ជូនទៅកាន់ប្រធានាធិបតីឲ្យលោកពិចារណា ហើយអ្នកដែលចង់ធ្វើជំនួញជាមួយកូរ៉េខាងជើងនឹងត្រូវអស់ឱកាសធ្វើជំនួញនិងពាណិជ្ជកម្មជាមួយយើងដូចគ្នា»។
គេដឹងច្បាស់ថា អម្រែកទណ្ឌកម្មប្រឆាំងអ្នកធ្វើជំនួញជាមួយកូរ៉េខាងជើងដែលអាមេរិកត្រៀមដាក់ចេញនេះនឹងធ្លាក់ទៅលើក្រុងប៉េកាំងដែលជាខ្នងបង្អែកការទូត និងសេដ្ឋកិច្ចដ៏ចម្បងរបស់ក្រុងព្យុងយ៉ាង។
សូមបញ្ជាក់ថា ការពិចារណាដាក់ទណ្ឌកម្មដោយកាត់ផ្តាច់ចំណងពាណិជ្ជកម្មជាមួយរាល់ប្រទេសដែលធ្វើជំនួញជាមួយកូរ៉េខាងជើងនេះធ្វើឡើងក្រោយពេលដែលកូរ៉េខាងជើងបាញ់សាកល្បងអាវុធនុយក្លេអ៊ែរលើកទីប្រាំមួយ។អ្វីដែលសំខាន់ កូរ៉េខាងជើងក៏បានប្រកាសថាខ្លួនជោគជ័យក្នុងការបំពាក់ក្បាលគ្រាប់អ៊ីដ្រូសែនលើកាំជ្រួចបាលីស្ទីកឆ្លងទ្វីបថែមទៀតដែលជាក្តីបារម្ភធំបំផុតរបស់សហគមន៍អន្តរជាតិជាពិសេសអាមេរិកនិងសម្ព័ន្ធមិត្តជប៉ុន និងកូរ៉េខាងត្បូង៕
Tag:
ដូណាល់ ត្រាំ
អាមេរិក
កូរ៉េខាងជើង
Steven Mnuchin
© រក្សាសិទ្ធិដោយ thmeythmey.com