កីឡាជាតិ
ជាតិ
វឌ្ឍនាកា និង សុខផេង ថា ក្រុមអ្នកគាំទ្រជាចំណែកដែលធ្វើឲ្យការប្រកួតដំណើរការទៅរលូន
× ខ្សែប្រយុទ្ធ ចាន់ វឌ្ឍនាកា និង កែវ សុខផេង ស្នើឲ្យអ្នកគាំទ្រត្រូវរក្សារបៀបរៀបរយ និងសណ្តាប់ធ្នាប់ឲ្យបានល្អក្នុងអំឡុងពេលមកទស្សនាការប្រកួតរវាងក្រុមជម្រើសជាតិកម្ពុជាជាមួយក្រុមវៀតណាមក្នុងវគ្គជម្រុះប្រចាំពូល C នៃពានរង្វាន់ AFC Asian Cup UAE 2019 នាវេលាម៉ោង៦:៣០នាទីល្ងាចថ្ងៃទី៥ ខែកញ្ញា នេះនៅពហុកីឡដ្ឋានជាតិ។ ទន្ទឹមនឹងនេះ កីឡាករទាំងពីរក៏បានស្នើឲ្យអ្នកគាំទ្រជៀសវាងប្រព្រឹត្តអំពើមិនគប្បីដែលនាំឲ្យប៉ះពាល់ដល់កិត្តិយសបាល់ទាត់កម្ពុជាថែមទៀតផង។
«ខ្ញុំសង្កេតឃើញអ្នកគាំទ្រនៅតែមានចំនួនច្រើនកុះករ ក៏ប៉ុន្តែនៅតែមានការប៉ះទង្គិចគ្នាតិចតួច។ អាស្រ័យហេតុនេះ ខ្ញុំសុំស្នើដល់ពួកគាត់មកគាំទ្របាល់ទាត់កម្ពុជាទាំងអស់គ្នា ហើយកុំឲ្យមានការប៉ះទង្គិចដូចលើកមុនៗ ព្រោះវាអាចធ្វើឲ្យប៉ះពាល់ដល់កិត្តិយសប្រទេសជាតិ និងជះឥទ្ធិពលអាក្រក់ដល់បាល់ទាត់កម្ពុជា»។ នេះជាការស្នើសុំចិត្តអ្នកគាំទ្ររបស់កីឡាករ ចាន់ វឌ្ឍនាកា ដែលតែងតែបង្កភាពអនាធិបតេយ្យក្នុងអំឡុងពេលមកគាំទ្រការប្រកួតបាល់ទាត់លក្ខណអន្តរជាតិ។
មិនខុសគ្នាពី វឌ្ឍនាកា នោះទេកីឡាករ កែវ សុខផេង ក៏ស្នើឲ្យអ្នកគាំទ្រដែលតែងតែបង្កការប៉ះទង្គិច ពេលមកគាំទ្រការប្រកួតនៅល្ងាចនេះត្រូវធ្វើខ្លួនឲ្យសមជាអ្នកគាំទ្របាល់ទាំងអស់គ្នា។ «ខ្ញុំសំណូមពរដល់អ្នកគាំទ្រជួយលើកទឹកចិត្ត និងគាំទ្រកីឡាបាល់ទាត់កម្ពុជាឲ្យបានច្រើនកុះករទាំងអស់គ្នា។ ជាពិសេសនៅថ្ងៃនេះ ខ្ញុំសុំស្នើដល់អ្នកគាំទ្រត្រូវរក្សាសណ្តាប់ឲ្យបានល្អ និងធ្វើខ្លួនជាអ្នកគាំទ្រឲ្យពិតប្រាកដ កុំឈ្លោះប្រកែកគ្នា ពោលគឺត្រូវខ្លួនឲ្យស័ក្តិសមជាម្ចាស់ផ្ទះ»។
ក្រុមជម្រើសជាតិកម្ពុជាត្រូវជួបប្រកួតជាមួយក្រុមវៀតណាមនាវេលាម៉ោង៦:៣០នាទីល្ងាចថ្ងៃទី៥ ខែកញ្ញា នេះនៅពហុកីឡដ្ឋានជាតិនាប្រកួតវគ្គជម្រុះជុំចុងក្រោយប្រចាំពូល C នៃព្រឹត្តិការណ៍ AFC Asian Cup UAE 2019។ បើតាមប្រវតិ្តនៃការជួបគ្នាកន្លងមក កម្ពុជាមិនដែលស្គាល់ជ័យជម្នះនោះឡើយ។ តើនៅល្ងាចនេះលោក Leonardo Vitorino អាចកែប្រែប្រវត្តិសាស្ត្រដ៏អាក្រក់នេះបានឬយ៉ាងណា?
Tag:
បាល់ទាត់
កែវ សុខផេង
ចាន់ វឌ្ឍនាកា
AFC Asian Cup
© រក្សាសិទ្ធិដោយ thmeythmey.com