អន្តរជាតិ
ឧត្តមសេនីយ៍ប្រាយុទ្ធ៖ មិនថា «អ្នកមានឬអ្នកក្រ» បើបានប្រព្រឹត្តបទល្មើស ត្រូវតែទទួលទោស
× ប្រមុខរបបសឹកថៃ ប្រាយុទ្ធ ចន្ទ អូចា បានអះអាងថា រដ្ឋាភិបាលរបស់លោក តែងតែយកចិត្តទុកដាក់លើការការពារសិទ្ធិមនុស្ស និងយុត្តិធម៌សង្គម ។ លោកឧត្តមសេនីយ៍ បានផ្ញើសារសាមញ្ញមួយទៅកាន់ពលរដ្ឋខ្លួន ថា មិនថាអ្នកមានឋានៈអ្វីក៏ដោយ បើអ្នកប្រព្រឹត្តបទល្មើស គឺត្រូវតែមានទោសហើយ ។
លោកនាយករដ្ឋមន្ត្រីថៃ ប្រាយុទ្ធ ចន្ទ អូចា នៅថ្ងៃទី១១ កញ្ញា បានចូលរួមថ្លែងសុន្ទរកថានៅក្នុងព្រឹត្តិការណ៍សិទ្ធិមនុស្សថៃ ដែលរៀបចំឡើងដោយក្រសួងយុត្តិធម៌ថៃ ។ នេះបើយោងតាមការចុះផ្សាយរបស់សារព័ត៌មានថៃ The Nation ។
នៅក្នុងព្រឹត្តិការណ៍នេះ លោកប្រាយុទ្ធ បាននិយាយថា រដ្ឋាភិបាលរបស់លោក តែងតែផ្តល់តម្លៃខ្ពស់លើវិស័យសិទ្ធិមនុស្ស និងតែងតែណែនាំឲ្យមន្ត្រីជំនាញក្រោមឱវាទរបស់ខ្លួនបើកការស៊ើបអង្កេតយ៉ាងហ្មត់ចត់លើពាក្យបណ្តឹង និងបញ្ហាបទល្មើសនានា។
ប្រមុខរបបសឹករូបនេះ ក៏បានស្នើប្រជាជនទូទៅឲ្យស្វែងយល់អំពីច្បាប់ និងអនុភាពច្បាប់ ។ លោកសង្កត់ធ្ងន់ថា៖« មិនមែនឲ្យតែអ្នកក្រប្រព្រឹត្តបទល្មើស ហើយពួកគេ ត្រូវជាប់ពន្ធនាគារ ខណៈពេលដែលអ្នកមានប្រព្រឹត្តបទល្មើស មិនជាប់ទោសនោះទេ។ ការពិតនោះគឺ ពួកក្រុមអ្នកមាន តែងតែគេចខ្លួនពីការទទួលខុសត្រូវ ដូច្នេះទើប បានជាយើងមិនដែលឃើញក្រុមអ្នកមានទាំងនោះ ចូលពន្ធនាគារ។...»
ប្រមុខរបបសឹក បានពន្យល់បន្ថែមទៀតថា ច្បាប់ មិនមែនបង្កើតដើម្បីធ្វើបាបជនណាមួយឡើយ ក៏ប៉ុន្តែប្រសិនបើ ជនណាមួយ ប្រព្រឹត្តខុស ជននោះ ត្រូវទទួលខុសត្រូវតាមច្បាប់។
បើទោះបីលោកនាយករដ្ឋមន្ត្រីរដ្ឋប្រហាររូបនេះ មិនបានបញ្ជាក់ឈ្មោះបុគ្គលណាមួយពាក់ព័ន្ធនឹងវិស័យសិទ្ធិមនុស្សក៏ដោយ សុន្ទរកថារបស់លោក ត្រូវបានមើលជាសារមួយប្រយោលទៅកាន់អតីតនាយករដ្ឋមន្ត្រីថៃ យីងឡាក់ ស៊ីនណាវ៉ាត់ត្រា ដែលកំពុងតែរត់គេចពីការចោទប្រកាន់របស់តុលាការ ។
លោកស្រី យីងឡាក់ បានអវត្តមាននៅក្នុងសវនាការសំណុំរឿងគោលនយោបាយស្រូវអង្ករថៃនៅចុងខែសីហាកន្លងទៅ ។ តាមរយៈបណ្តឹងនៅក្នុងសំណុំរឿងនេះ លោកស្រី យីងឡាក់ ដែលកំពុងតែគេចខ្លួនទៅរស់នៅក្រៅប្រទេសនោះ ត្រូវប្រឈមទាំងទោសពន្ធនាគារ និងសំណងរដ្ឋប្បវេណីរាប់លានដុល្លារ បើតុលាការថៃ សម្រេចចោទប្រកាន់ថា លោកស្រី បានប្រព្រឹត្តបទល្មើសមែននោះ៕
© រក្សាសិទ្ធិដោយ thmeythmey.com