កូនក្រពើត្រីចំនួន១០ក្បាល ដែលរងគ្រោះជិតផុតពូជ ត្រូវបានខាងអភិរក្សថែទាំ មុនប្រលែងទៅព្រៃធម្មជាតិវិញ

ជាតិ

កូនក្រពើត្រីចំនួន១០ក្បាល ដែលរងគ្រោះជិតផុតពូជ ត្រូវបានខាងអភិរក្សថែទាំ មុនប្រលែងទៅព្រៃធម្មជាតិវិញ

14, Sep 2017 , 9:39 pm

រូបភាព

ដោយ: ថ្មីៗ

ភ្នំពេញ៖ កូនក្រពើត្រី (ក្រពើព្រៃ) ចំនួន១០ក្បាល ដែលជាប្រភេទសត្វជិតផុតពូជបំផុតនៅលើពិភពលោក ត្រូវបានមន្ត្រីអភិរក្សសត្វព្រៃ យកចិត្តទុកដាក់ថែទាំសុខភាពរបស់វាឲ្យធំធាត់ មុននឹងព្រលែងឲ្យរស់នៅក្នុងព្រៃធម្មជាតិវិញ។

អ្នកថែទាំប្រចាំមជ្ឈមណ្ឌលអភិរក្សប្រភេទសត្វល្មូនខេត្តកោះកុង បានឲ្យដឹងថា សត្វក្រពើត្រីទាំង១០ក្បាលនេះ ត្រូវបានដាក់ចំណីឲ្យស៊ី ដូចជា កូនត្រី កូនកំពឹស និងកង្កែបតូចៗជាដើម។ ហើយនៅពេលក្រុមអភិរក្ស កំពុងតាមដានការលូតលាស់របស់ពួកវាផងដែរ។

កាលពីថ្ងៃទី២៨ មិថុនា អង្គការសមាគមអភិរក្សសត្វព្រៃនៅកម្ពុជា (WCS) អ្នកអភិរក្សរបស់រដ្ឋបាលជលផល និងប្រជាសហគមន៍ បានប្រទះឃើញពងក្រពើត្រីមួយសំបុក ដែលមានពងចំនួ១៩គ្រាប់ នៅតាមប្រព័ន្ធព្រែកស្រែអំពិល ខេត្តកោះកុង ។

ក្រពើត្រី ឬក្រពើព្រៃ ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទសត្វរងគ្រោះជិតផុតពូជបំផុត នៅលើសាកលលោក ខណៈចំនួនរបស់វានៅបន្តធ្លាក់ចុះគួរឲ្យកត់សម្គាល់។ ពួកវាមានរស់នៅ ក្នុងប្រទេសកម្ពុជា ឥណ្ឌូនេស៊ី ថៃ និងវៀតណាមតែប៉ុណ្ណោះ។ ចំនួនរបស់វានៅលើសាកលលោកមានប្រមាណ៤១០ក្បាល ក្នុងនោះសត្វក្រពើត្រីមានចន្លោះពី១០០ក្បាល ទៅ៣០០ក្បាល កំពុងរស់នៅក្នុងព្រៃធម្មជាតិនៃប្រទេសកម្ពុជា ដែលធ្វើឲ្យកម្ពុជាក្លាយជាប្រទេសដ៏សំខាន់បំផុត សម្រាប់ការអភិរក្សសត្វក្រពើត្រីនេះ កុំឲ្យបាត់បង់។ នេះបើតាមអង្គការសមាគមអភិរក្សសត្វព្រៃ (WCS)៕