អ្នកវិភាគ៖ កម្ពុជាកុំទាន់អាលឈ្លោះជាមួយមហាអំណាច បើមិនទាន់ពឹងខ្លួនឯងបាន

ជាតិ

អ្នកវិភាគ៖ កម្ពុជាកុំទាន់អាលឈ្លោះជាមួយមហាអំណាច បើមិនទាន់ពឹងខ្លួនឯងបាន

14, Sep 2017 , 10:19 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ អ្នកវិភាគថា កម្ពុជាកុំទាន់អាលឈ្លោះជាមួយមហាអំណាច បើមិនទាន់ពឹងខ្លួនឯងបាន ។ ផ្ទុយពីទស្សនៈនេះ រដ្ឋាភិបាលថា កម្ពុជា មិនពឹងផ្អែកទាំងស្រុងលើអាមេរិកនោះទេ។ ការលើកឡើងបែបនេះស្របពេលដែលរដ្ឋាភិបាលកម្ពុជា និងអាមេរិក កំពុងប៉ះសម្ដីគ្នាយ៉ាងខ្លាំងគួរឲ្យកត់សម្គាល់ ជុំវិញបញ្ហាចាប់ខ្លួនឯកឧត្តម កឹម សុខា ប្រធានគណបក្សសង្គ្រោះជាតិ។

សម្ដីការទូតធ្ងន់ៗរវាងកម្ពុជា និងអាមេរិក បានផ្ទុះឡើងជាបន្តបន្ទាប់ក្នុងរយៈពេលចុងក្រោយនេះ ។ ការខ្វែងគំនិតគ្នានេះ បានកើតឡើងក្រោយពីរដ្ឋាភិបាលកម្ពុជា ចោទអាមេរិកនៅពីក្រោយខ្នងឯកឧត្តម កឹម សុខា ប្រធានគណបក្សសង្គ្រោះជាតិ ដែលរដ្ឋាភិបាល ហៅថា អំពើក្បតជាតិ ក្នុងគោលបំណងចង់ផ្ដួលរំលំ និងបង្កអសន្តិសុខក្នុងប្រទេស។ ការចោទប្រកាន់នេះ បានធ្វើឲ្យអាមេរិក មិនសប្បាយចិត្តឡើយ។ អាមេរិកចាត់ទុកការចោទរបស់រដ្ឋាភិបាលកម្ពុជា មកលើខ្លួនថា គ្មានភស្តុតាងច្បាស់លាស់ ។

តាមរយៈឯកអគ្គរដ្ឋទូតអាមេរិកប្រចាំកម្ពុជា លោក William Heidt ក៏បានព្រលយភាសាការទូតថា សម្ដីរដ្ឋាភិបាលកម្ពុជា ប្រឆាំងអាមេរិក បានធ្វើឲ្យភ្ញៀវទេសចរ និងអ្នកវិនិយោគអាមេរិក និងលោកខាងលិច លែងមានអារម្មណ៍កក់ក្តៅនៅក្នុងប្រទេសកម្ពុជា។ ត្រង់ចំណុចនេះ អ្នកវិភាគ យល់ថា អាមេរិកកំពុងរំឮកឲ្យរដ្ឋាភិបាល ពិចារណាលើព្រឹត្តិការណ៍នយោបាយនៅកម្ពុជាឡើងវិញ។ សម្រាប់លោក ឯម សុវណ្ណារ៉ា ភាសាការទូតអាមេរិកនេះ ទំនងជាចង់ដាក់លើសម្ពាធរដ្ឋាភិបាលកម្ពុជាផងដែរ។ បើតាមអ្នកវិភាគរូបនេះ ប្រសិនជារដ្ឋាភិបាល នៅតែប្រកាន់ជំហប្រឆាំងនឹងការអំពាវនាវណាមួយរបស់អាមេរិក ក៏ដូចជាសហគមន៍អន្តរជាតិនោះ កម្ពុជាអាចប្រឈមមុខ នឹងការបាត់ទីផ្សារសេដ្ឋកិច្ច។

លោក ឯម សុវណ្ណារ៉ា បានអត្ថាធិប្បាយយ៉ាងដូច្នេះថា៖«អាមេរិក សហគមន៍អឺរ៉ុប និងបណ្ដាប្រទេសលោកខាងលិចហ្នឹង គេមិនទាន់ចាត់វិធានការភ្លាមៗទេ ព្រោះគេទុកពេលឲ្យកម្ពុជាអនុវត្ត និងគិតពិចារណាតាមការអំពាវនាវ និងការទាមទាររបស់ពួកគេសិន។ ប៉ុន្តែបើកម្ពុជានៅតែមិនព្រមទទួលយកការទាមទាររបស់ពួកគេ នោះគេនឹងមានវិធានការជាដំណាក់កាល និងជាជំហានបឋមដូចជាផ្ដាច់ជំនួយ និងបិទទីផ្សារជាដើម…។ ហើយបើគេធ្វើតែបែបនេះ យើងគឺប្រឈមមុខបាត់បង់ចំណូលពីទីផ្សារអឺរ៉ុប និងអាមេរិក ប្រមាណជា៧០០០លានដុល្លារក្នុងមួយឆ្នាំ»។

លោក មាស នី ក៏យល់ឃើញរបស់លោក ឯម សុវណ្ណារ៉ា ដែរ។ សម្រាប់លោក មាស នី កម្ពុជានៅមានកិច្ចការជាច្រើន ដែលត្រូវការជំនួយពីអាមេរិក និងសហគមអឺរ៉ុប ដូច្នេះបើកម្ពុជាមិនទាន់អាចជួយខ្លួនឯងបានទេ កុំទាល់អាលឈ្លោះជាមួយប្រទេសមហាអំណាច។ «ខ្ញុំគិតថា រឿងចោទប្រកាន់ និងការបកស្រាយការពារខ្លួន ភ្ជាប់ជាមួយស្ថានការណ៍នយោបាយ គឺគ្រាន់តែជាការខ្វែងគំនិតគ្នា ប៉ុន្តែបើវាឈានទៅដល់ការឈ្លោះគ្នា ដាក់សម្ពាធ និងទណ្ឌកម្មសេដ្ឋកិច្ចនោះ វាគ្មានអ្វីចំណេញដល់កម្ពុជាទេ…។ ដូច្នេះជាយោបល់ខ្ញុំ យើងកុំទាន់អាលឈ្លោះជាមួយមហាអំណាច បើយើងមិនទាន់ពឹងខ្លួនឯងបាន ហើយយើងនៅត្រូវការគេឲ្យជួយផងដែរនោះ»។ នេះជាការលើកឡើងរបស់លោក មាស នី អ្នកវិភាគនយោបាយ។

អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បាននិយាយថា ការចោទប្រកាន់អាមេរិកនៅពីក្រោយឯកឧត្តម កឹម សុខា នោះក៏ព្រោះតែរដ្ឋាភិបាលកម្ពុជា មានភស្តុតាងច្បាស់លាស់តាមរយៈពាក្យសម្តីរបស់ប្រធានគណបក្សសង្គ្រោះជាតិ នៅក្នុងវិដេអូឃ្លីប កាលពីឆ្នាំ២០១៣នោះ។ លោក ផៃ ស៊ីផាន បានបន្ថែមថា កម្ពុជាមានអធិបតេយ្យភាព និងឯករាជ្យពេញលេញ ដោយមិនអាចឲ្យប្រទេសណាលូកដៃចូលកិច្ចការផ្ទៃក្នុងបានឡើយ។ ប៉ុន្តែរាល់ពាក្យសម្តីដែលរដ្ឋាភិបាល និងអាមេរិក បកស្រាយរៀងៗខ្លួននេះ ត្រូវបានលោក ផៃ ស៊ីផាន ចាត់ទុកថា វាគ្រាន់តែជាការខ្វែងគំនិតគ្នាប៉ុណ្ណោះ ដោយមិនមែនជាការឈ្លោះប្រកែកគ្នានោះទេ។

ឆ្លើយតបនឹងការលើកឡើងរបស់អ្នកវិភាគ ពីបញ្ហាបិទសេដ្ឋកិច្ចកម្ពុជាវិញ លោក ផៃ ស៊ីផាន ក៏មើលមិនឃើញពីចំណុចណាមួយ ដែលធ្វើឲ្យកម្ពុជាទទួលរងនូវទណ្ឌកម្មផ្នែកសេដ្ឋកិច្ចពីអាមេរិកនោះដែរ។ អ្នកនាំពាក្យរូបនេះ បានអត្ថាធិប្បាយដូច្នេះថា៖«ជានីតិវិធីអន្តរជាតិ អាមេរិកមិនអាចមកបិទសេដ្ឋកិច្ចកម្ពុជាភ្លាមៗទេ ព្រោះមុនបិទក៏យើងទាំងពីរត្រូវការដោះស្រាយបញ្ហាតាមរយៈវប្បធម៌ជជែកគ្នា មិនឈ្លោះគ្នាជាមុនគ្នាសិន ខណៈប្រទេសយើងទាំងពីរមានកិច្ចការងារសហប្រតិបត្តិការជាមួយគ្នាច្រើន ក្នុងកិច្ចការប្រឆាំងការជួញដូរមនុស្ស និងអាវុធនុយក្លេអ៊ែរជាដើម…។ លោក បន្ថែមថា៖«ប៉ុន្តែយ៉ាងណាខ្ញុំបញ្ជាក់ថា កម្ពុជាក៏មិនពឹងផ្អែកសេដ្ឋកិច្ចលើអាមេរិកតែមួយនោះទេ ព្រោះសេដ្ឋកិច្ចកម្ពុជាមានគ្រប់ប្រទេសក្នុងពិភពលោក។ ជាពិសេសយើងមានផលិផលក្នុងស្រុក៧ភាគរយ ការប្រមូលពន្ធកើនឡើងរាប់ពាន់លានដុល្លារក្នុងមួយឆ្នាំ ហើយយើងអាចរស់ខ្លួនបាន ដោយមិនព្រួយបារម្ភដូចជំនាន់មុនទេ…។

ក្រៅពីបកស្រាយរឿងសេដ្ឋកិច្ចរវាងកម្ពុជា និងអាមេរិក លោក ផៃ ស៊ីផាន ក៏បន្តពន្យល់ពីនីតិវិធីនៃការដាក់ទណ្ឌកម្មសេដ្ឋកិច្ចរបស់ក្រុមប្រឹក្សាសន្តិសុខអង្គការសហប្រជាជាតិយ៉ាងដូច្នេះថា៖«បញ្ហាទណ្ឌកម្មសេដ្ឋកិច្ចពីក្រុមប្រឹក្សាសន្តិសុខអង្គការសហប្រជាជាតិ ក៏មិនអាចមានជាដាច់ខាតមកលើកម្ពុជា ព្រោះកម្ពុជាមិនបានធ្វើអ្វីប៉ះពាល់ដល់សន្តិសុខពិភពលោក និងមិនប៉ះពាល់ដល់ផលប្រយោជន៍អ្នកណាដែរ។ ហើយបើក្រុមប្រឹក្សាសន្តិសុខអង្គការសហប្រជាជាតិ ចង់ដាក់ទណ្ឌកម្មនោះ លុះត្រាមានការបោះឆ្នោតសម្រេចពីប្រទេសធំចំនួន៥ គឺអាមេរិក អង់គ្លេស បារាំង រុស្ស៊ី និងចិន ប៉ុន្តែបើក្នុងចំណោមប្រទេសទាំង៥នេះ មានប្រទេសមួយមិនយល់ព្រមបោះឆ្នោតនោះ(សិទ្ធិ Veto) ក៏មិនអាចមានទណ្ឌកម្មសេដ្ឋកិច្ចលើកម្ពុជាដែរ»។

កម្ពុជាបង្ហាញជំហកាន់តែល្អូកល្អឹនជាមួយចិន ស្របពេលកំពុងប៉ះសម្ដីធ្ងន់ជាមួយអាមេរិក

ខណៈអាមេរិក បានឆ្លើយតបសម្តីការទូតធ្ងន់ៗមកកម្ពុជានោះ រដ្ឋាភិបាល ក៏បានបង្ហាញជំហកាន់តែល្អូកល្អឹនជាមួយចិន តាមរយៈភាសាការទូត ដែលប្រទេសទាំងពីរ បានចាត់ទុកគ្នាជាបងប្អូន។ កម្ពុជា ចាត់ទុកមិត្តចិនជាខ្នងបង្អែករឹងមាំរបស់ខ្លួន ហើយមិត្តចិនធានាជួយកម្ពុជាគ្រប់ពេលវេលាដែលត្រូវការ។ ភាពផ្អែមល្អែមនៃនយោបាយការទូតរវាងចិននិងកម្ពុជានេះ មានទាំងចំណុចល្អ និងចំណុចអាក្រក់។ ចំណុចល្អនោះ ត្រូវបានលោក ឯម សុវណ្ណារ៉ា អ្នកវិភាគនយោបាយ មើលឃើញថា ជំហកម្ពុជាងាកទៅកាន់ចិននេះ វាជាសម្មិទ្ធផលល្អក្នុងនយោបាយការបរទេស ដែលអាចជួយឲ្យកម្ពុជាមានសន្តិភាព និងស្ថិរភាពក្នុងតំបន់រឹងមាំ ខណៈដែលកម្ពុជាស្ថិតនៅចន្លោះប្រទេសធំៗ ដូចជាវៀតណាម និងថៃ។

ប៉ុន្តែបើនិយាយពីចំណុចអាក្រក់វិញ លោក ឯម សុណ្ណារ៉ា មើលឃើញថា បើកម្ពុជាងាកទៅក្រសោបយកចិននោះ វានឹងឲ្យកម្ពុជា ដើរជាន់ដានប្រវត្តិសាស្ត្រ កាលពីអំឡុងទស្សវត្ស ១៩៦០ និង១៩៧០។«កម្ពុជាមិនគួរក្ដោបចិន ហើយជំទាស់ជាមួយអាមេរិក និងសហគមន៍អន្តរជាតិទេ ព្រោះវាអាចនាំឲ្យកម្ពុជាធ្លាក់ទៅកាន់ប្រវត្តិសាស្ត្រចាស់ក្នុងឆ្នាំ១៩៧០ ដែលកម្ពុជាពេលនោះខាតប្រយោជន៍ច្រើន នៅពេលដែលបោះបង់អាមេរិក ហើយងាកទៅរកចិន និងរុស្ស៊ី។ ហើយកម្ពុជាត្រូវដឹងថា មានតែអាមេរិក និងសហគមន៍អន្តរជាតិទេ ដែលបានជួយឲ្យពិភពលោកស្គាល់កម្ពុជា ស្មើមុខស្មើភាពក្នុងឆាកអន្តរជាតិ និងលើវិស័យការទូតកន្លងមក ដោយមិនមែនជាចិន ឫប្រទេសណាឡើយ»។ នេះជាការលើកឡើងរបស់លោក ឯម សុវណ្ណារ៉ា។

ជាមួយគ្នានេះលោក មាស នី បាននិយាយថា កម្ពុជាគប្បីប្រកាន់ជំហនយោបាយការបរទេសអព្យាក្រិត ទើបកម្ពុជាអាចទទួលបានផលប្រយោជន៍ ពីប្រទេសមហាអំណាច ក្នុងការអភិវឌ្ឍប្រទេស សម្រាប់ការប្រកួតប្រជែងជាមួយប្រទេសជិតខាងក្នុងតំបន់។ អ្នកវិភាគរូបនេះ បានបញ្ជាក់ថា៖«កម្ពុជាគួរតែប្រកាន់យកនយោបាយអព្យាក្រិត្យឲ្យស្របតាមរដ្ឋធម្មនុញ្ញកម្ពុជា។ បើយើងមើលទៅប្រទេសវៀតណាមវិញ គេក្តោបយកអាមេរិកផង និងយកចិនផង ទោះជាឈ្លោះគ្នាជាមួយចិនក៏ដោយ ថៃក៏ធ្វើដូចគ្នា ព្រោះដោយសារតែពួកគេចង់រក្សាលំនឹងសេដ្ឋកិច្ច និងការអភិវឌ្ឍសង្គម។ ប៉ុន្តែបើយើងងាកទៅមើលទស្សវត្ស១៩៦០ កាលនោះព្រះបរមរតនកោដ្ឋធ្លាប់បានដេញទូតអាមេរិកចេញពីកម្ពុជា ពេលមន្ត្រីអាមេរិកចេញអស់ កម្ពុជាស្ទើតែរកលុយបើកឲ្យមន្ត្រីរាជការមិនបានផង។ ហើយសម្ដេចតា កាលនោះងាកទៅពឹងចិន ប៉ុន្តែបរាជ័យអភិវឌ្ឍប្រទេសស្ទើរតែងើបវិញមិនរួច។ ដូច្នេះបើយើងនៅតែធ្វើដូច្នេះ សេដ្ឋកិច្ចយើងមិនរីកចម្រើនដូចប្រទេសជិតខាងឡើយ»។

តែយ៉ាងណាអ្នកនាំពាក្យគណៈរដ្ឋមន្ត្រី លោក ផៃ ស៊ីផាន បាននិយាយការពាររដ្ឋាភិបាលថា កម្ពុជាកំពុងអនុវត្តគោលនយោបាយអភិវឌ្ឍប្រទេសត្រឹមត្រូវ ដោយមិនឲ្យធ្លាក់ចូលក្នុងគោលនយោបាយមនោគមនវិទ្យារបស់ប្រទេសណាមួយឡើយ។«រដ្ឋាភិបាលអនុវត្តនយោបាយមិនចំណុះក្នុងប្រទេសណាមួយឡើយ។ ហើយកម្ពុជាក៏មិនធ្លាក់ចូលមនោគមន៍វិទ្យាសង្គ្រាមត្រជាក់ ដូចក្នុងឆាំ្ន១៩៦០ ដល់១៩៧០ ដូចមុនទេ។ ប៉ុន្តែកម្ពុជាពេលនេះប្រើគោលនយោបាយអភិវឌ្ឍន៍ប្រទេសដោយយកចិនធ្វើជាលំនឹងសេដ្ឋកិច្ច ដើម្បីប្រកួតប្រជែងជាមួយប្រទេសជាតិខាង»។ នេះជាការឆ្លើយតបរបស់លោក ផៃ ស៊ីផាន៕