ជាតិ
ព័ត៍មានសុខភាព
ក្រសួងសុខាភិបាល៖មនុស្ស៤៧ស្លាប់ដោយពុលអាហារ និងស្រា ចាប់ពីឆ្នាំ២០១៥មក
× មនុស្សចំនួន៤៧នាក់បានស្លាប់ ដោយសារការពុលអាហារ និងពុលស្រា ក្នុងចំណោមមនុស្ស ចំនួន៣,៨២៤នាក់ដែលមានអាការពុល ចាប់ពីឆ្នាំ២០១៥ មកដល់ឆ្នាំ២០១៧នេះ។ ចំណីអាហារដែលពុល មានដូចជានំបញ្ចុក ចំណីអាហារចម្រុះ ត្រីកំពត ដំឡូងឈើ និងស្រាដែលលាយសារជាតិមេតាណុល។
ចាប់ពីឆ្នាំ២០១៥ ដល់ឆ្នាំ២០១៧នេះ មានមនុស្សពុលអាហារ និងពុលស្រា សរុបចំនួន៣,៨២៤នាក់ ក្នុងនោះមានអ្នកស្លាប់ចំនួន ៤៧នាក់។ នេះបើយោងតាមរបាយការណ៍របស់ក្រសួងសុខាភិបាលកម្ពុជា ដែលផ្សព្វផ្សាយនៅក្នុងសិក្ខាសាលាផ្សព្វផ្សាយពីវិធានការបង្ការការពុលចំណីអាហារ និងពុលស្រា នៅថ្ងៃទី១២ ខែកញ្ញា។ តាមរបាយការណ៍ដដែល ចំណីអាហារដែលពុល មានដូចជានំបញ្ចុក ចំណីអាហារចម្រុះ ត្រីកំពត ដំឡូងឈើ និងស្រាដែលលាយសារជាតិមេតាណុល។
លោក លី សុវណ្ណ ប្រធាននាយកដ្ឋានប្រយុទ្ធជំងឺឆ្លង និងជាអ្នកនាំពាក្យក្រសួងសុខាភិបាល បានថ្លែងប្រាប់អ្នកកាសែតនៅក្នុងសិក្ខាសាលាផ្សព្វផ្សាយពីវិធានការបង្ការការពុលចំណីអាហារ និងពុលស្រា នៅថ្ងៃទី១២ ខែកញ្ញាថាមូលហេតុនៃការពុលចំណីអាហារ បណ្តាលមកពីការបរិភោគអាហារដែលមិនស្អាត ឬគ្មានអនាម័យ ឬទឹកកខ្វក់ ដែលមានបាក់តេរី វីរុស ផ្សិត ឬប៉ារ៉ាស៊ីត។ អាហារមិនស្អាត ឬគ្មានអនាម័យទាំងនោះ មាននៅក្នុងអាហារផ្អាប់ ឬអាហាស្រស់ ដូចជាភ្លាបន្លែ ញ៉ាំផ្លែឈើដោយមិនបានលាងជាដើម។ ក៏មានការពុលអាហារដែលបណ្តាលមកពីការបរិភោគអាហារមានសារជាតិគីមី ដូចជាអាហារដែលមានជាប់សំណល់ថ្នាំសម្លាប់សត្វល្អិត ឬសំណល់ថ្នាំព្យាបាលសត្វ សារធាតុបន្ថែមនៅក្នុងអាហារ ជាតិពុលកើតឡើងដោយធម្មជាតិ ឬក៏ការចម្លងឧស្សាហកម្មជាដើម។
ចំណែកឯមូលហេតុនៃការពុលស្រា ត្រូវបានលោក លី សុវណ្ណ បញ្ជាក់ថា បង្កឡើងដោយសារជាតិមេតាណុល ដែលមាននៅក្នុងស្រាលើសពីកម្រិតធម្មតា(០.១៥%) ដោយសារតែការផលិត ឬបិតស្រានៅតាមមូលដ្ឋាន មិនត្រឹមតាមបច្ចេកទេស។
អ្នកនាំពាក្យក្រសួងសុខាភិបាល ក៏បានប្រាប់ឲ្យប្រជាពលរដ្ឋប្រុងប្រយ័ត្ន ចំពោះការរៀបចំចង្ហាន់យកទៅវត្តនៅរដូវដាក់បិណ្ឌ និងថ្ងៃភ្ជុំបិណ្ឌនេះផងដែរ។ ចង្ហាន់ត្រូវធ្វើប្រកបដោយអនាម័យ និងគុណភាព។ ពេលដែលចំអិនរួច ត្រូវទុកដាក់ឲ្យបានត្រឹមត្រូវ៕
Tag:
សុខភាព
ពុលអាហារ
ស្រា
លី សុវណ្ណ
© រក្សាសិទ្ធិដោយ thmeythmey.com