នាយ យ៉ាន ធ្វើរថយន្តHUMMER ពីក្រដាសកាតុង ដើម្បីផលិតវីដេអូចម្រៀង និងទុកឲ្យក្មេងកំព្រាលេង

ជាតិ

នាយ យ៉ាន ធ្វើរថយន្តHUMMER ពីក្រដាសកាតុង ដើម្បីផលិតវីដេអូចម្រៀង និងទុកឲ្យក្មេងកំព្រាលេង

18, Sep 2017 , 8:19 pm

រូបភាព

ដោយ: នាយយ៉ាន

នាយ យ៉ាន កាលពីពេលកន្លងទៅ បានធ្វើរថយន្តHUMMER ពីក្រដាសកាតុង ដែលមានទំហំតូចជាងរថយន្តពិត ២ដងកន្លះ ដើម្បីប្រើក្នុងវីដេអូចម្រៀងរបស់ខ្លួនដែលមានចំណងជើងថា«ចម្រៀង «ជិះ HUMMER លេងនឹងបង » ។ បទនេះ ច្រៀងដោយយុវជន រ័ត្ន តុលា និពន្ធទំនុកច្រៀងដោយនាយ យ៉ាន ជាមួយបទភ្លេងដើមបទ «ជិះទូកលេងនឹងបង» របស់លោក ម៉ិញ សុធីវណ្ណ។ បន្ទាប់ពីថតបទចម្រៀងចប់ នាយ យ៉ាន បានយករថយន្ត HUMMER ពីក្រដាសកាតុងនោះទៅឲ្យក្មេងៗដែលរស់នៅក្នុងមណ្ឌលកុមារកំព្រាលេងកម្សាន្ត។

រៀងរាល់ថ្ងៃនាយ យ៉ាន ចេះតែជិះទោចក្រយាន។ ដោយនាយគ្មានថវិកាគ្រប់គ្រាន់ដើម្បីទិញឡាន (thmeythmey ប្រាក់ខែតិចពេក) គាត់មានគំនិតធ្វើខ្លួនឯងតែម្ដង។ ប្រភេទរថយន្ដដែលនាយ យ៉ាន ពេញចិត្តគឺ HUMMER ពីព្រោះវាធំល្មម ដើម្បីជិះជាន់គេ ហើយវាប្រើប្រេងឥន្ទៈច្រើន គឺ២២លីត្រ ក្នុង១០០គីឡូម៉ែត្រ ដើម្បីបំពុលបរិយាកាសយ៉ាងខ្លាំង។ អតីតម៉ាក HUMMER របស់ក្រុមហ៊ុនអាមេរិកាំង General Motors បានមានជីវិតតែមួយរយៈប៉ុណ្ណោះ ពីឆ្នាំ១៩៩២ ដល់ឆ្នាំ២០១០។ វាប្លែកត្រង់ថា រថយន្ដដើម ដែលមានឈ្មោះថា Humvee មិនមែនជាឡានសម្រាប់សាធារណជនទេ គឺសម្រាប់យោធា។

នាយ យ៉ានចាប់ផ្ដើមគូរប្លង់ H1 ដែលជារថយន្ដ HUMMER សេរីដំបូងគេបង្អស់។ រួចរាល់នាយទិញសម្ភារដូចជា កាតុង ថ្នាំលាប កាំបិត បន្ទាត់ និងកាវជាដើម។ ពេលនោះគាត់ចាប់ផ្ដើមការងារ គូរលើក្រដាសកាតុង កាត់កាតុងតាមខ្សែ លាបថ្នាំយ៉ាងត្រឹមត្រូវ បិទឲ្យជាប់។ បន្ទាប់ពីបានធ្វើការអស់រយៈពេល បួនថ្ងៃពេញ ច្បាស់ហើយគឺពិបាកជិះណាស់ ពីព្រោះឡាននោះគ្មានម៉ាស៊ីនទេ។ ម្យ៉ាងទៀតវាតូចជាង HUMMER ពិត ២,៥ដង (échelle 1/2,5)។ ការពិត នាយ យ៉ានធ្វើរថយន្ដកាតុងនេះ សម្រាប់ប្រើក្នុងវីដេអូបទចម្រៀង «ជិះ HUMMER លេងនឹងបង » ច្រៀងដោយយុវជន រ័ត្ន តុលា និងនិពន្ធទំនុកច្រៀងដោយនាយ យ៉ាន ជាមួយបទភ្លេងដើមបទ «ជិះទូកលេងនឹងបង» របស់លោក ម៉ិញ សុធីវណ្ណ។ ក្នុងខារ៉ាអូខេនោះ លោក តុលា បើករថយន្ដ HUMMER កាតុង ហើយក៏មានការចូលរួមសំដែងពីកញ្ញា អេវ៉ាផង។

សូមបញ្ជាក់ថា ត្រូវបានថតសំឡេងក្នុងបន្ទប់បញ្ចូលសំឡេងរបស់សារព័ត៌មានថ្មីៗ។ រីឯឡានពិសេសរបស់នាយ យ៉ាន នោះថតហើយ ត្រូវបានផ្ដល់ឱកាសឲ្យវាមានជីវិតមួយទៀត គឺទុកឲ្យកូនក្មេងមណ្ឌលកុមារពិការលេងជាមួយ។